தமிழகத்திற்கு அதிர்ச்சி கொடுத்த மத்திய அரசு: மேலாண்மை வாரியம் இல்லை!

காவிரி நதிநீர் பங்கீட்டு வழக்கில் கடந்த பிப்ரவரி 16-ஆம் தேதி இறுதித்தீர்ப்பளித்த உச்சநீதிமன்றம், 6 வாரங்களுக்குள் காவிரி மேலாண்மை வாரியம் அமைக்க உத்தரவிட்டிருந்தது. அந்த கெடு முடிந்தும், மத்திய அரசு காவிரி மேலாண்மை வாரியம் அமைக்காத நிலையில், தமிழக அரசு நீதிமன்ற அவமதிப்பு வழக்கு தொடர்ந்தது.
பின்னர் நீதிமன்றத்தின் கடும் கண்டனத்தைத் தொடர்ந்து, கடந்த 14 ஆம் தேதி காவிரி நதிநீர் பங்கீடு குறித்த வரைவு செயல்திட்டத்தை மத்திய அரசு தாக்கல் செய்தது. அப்போது, அந்த அறிக்கையை தமிழகம், கர்நாடகா, கேரளா மற்றும் புதுச்சேரி மாநில அரசுகளுக்கு அனுப்ப வேண்டும் என்றும், அதில் உள்ள நிறைகுறைகளை மாநிலங்கள் தெரிவிக்க வேண்டும் என உச்சநீதிமன்றம் உத்தரவிட்டிருந்தது. இதுகுறித்த விசாரணை, நேற்று உச்சநீதிமன்றத்தில் விசாரணைக்கு வந்தது.

எனினும், இந்த வழக்கு விசாரணை இன்று விசாரிக்கப்படும் என ஒத்திவைத்து உச்சநீதிமன்றம் நேற்று உத்தரவிட்டது.
காவிரி அமைப்பின் முடிவை மாநில அரசுகள் அமல்படுத்தவில்லை எனில் மத்திய அரசு இறுதி முடிவெடுக்கலாம் என்ற விதியை மாற்றவும், காவிரி அமைப்பின் தலைமையகம் டெல்லியில் அமைக்கப்பட வேண்டும் எனவும், நீர்ப் பங்கீடு தொடர்பாக மத்திய அரசை காவிரி அமைப்பு அணுகத் தேவையில்லை; காவிரி வாரியத்தின் முடிவே இறுதியானது எனவும் உச்சநீதிமன்ற நீதிபதிகள் மத்திய அரசுக்கு உத்தரவு பிறப்பித்துள்ளனர்.

இந்நிலையில்,  ஒய்வு பெற்ற நீதிபதிதான் காவிரி அமைப்பின் தலைவராக இருக்க வேண்டும் என தமிழகத்தின் சார்பில் கோரிக்கை வைக்கப்பட்டது. ஆனால் உச்சநீதிமன்றம் இதனை நிராகரித்துள்ளது.
நன்றி
செய்தி புனல்

மேலும், நேற்று திடீர் திருப்பமாக கர்நாடகாவில் ஆட்சி அமைவதில் இழுபறி நீடிப்பதால் இந்த வழக்கை ஒத்திவைத்து கோடை விடுமுறைக்கு பிறகு விசாரிக்க கோரிக்கை வைக்கப்பட்டது. ஆனால் உச்சநீதிமன்ற நீதிபதிகள் அதனை தள்ளுபடி செய்தனர். மேலும் கேரளா அரசு முரண்டு பிடித்து வருகிறது. 4 % மட்டுமே நீரை பெரும் நாங்கள் 15 % செலவை எப்படி ஏற்க முடியும் எனவும் கேள்வியெழுப்பியுள்ளது.

இந்நிலையில் கர்நாடகத்தில் இன்று பாஜக ஆட்சி அமைத்துள்ளதால் கர்நாடகா மீண்டும் இந்த கோரிக்கையை வைக்க வாய்ப்பில்லை.
இந்நிலையில் திருத்தப்பட்ட வரைவு செயல் திட்டத்தை உச்ச நீதிமன்றத்தில் சற்றுமுன் தாக்கல் செய்தது மத்திய அரசு. காவிரி மேலாண்மை வாரியம் என பெயர் சூட்ட வேண்டும் என்ற தமிழக அரசின் கோரிக்கை நிராகரிப்பு செய்யப்பட்டு அமைப்புக்கு காவிரி நீர் மேலாண்மை ஆணையம் என பெயர் சூட்ட திருத்தப்பட்ட வரைவு செயல் திட்டம் கூறியுள்ளது.

திருத்தப்பட்ட வரைவு செயல் திட்டம், உச்சநீதிமன்ற தீர்ப்புக்கு உட்பட்டுள்ளதா என ஆராய்ந்து தீர்ப்பு வழங்கப்படும் என உச்சநீதிமன்றம் அறிவித்துள்ளது. நாளை மாலை 4 மணிக்கு தீர்ப்பு வழங்கப்படும் எனவும் அப்படி முடியவில்லை என்றால் 22 ஆம் தேதி தீர்ப்பு வழங்கப்படும் எனவும் அறிவித்துள்ளார்கள்.