இறந்த மயிலுக்கு மூவர்ண கொடி போர்த்தி போலீஸ் மரியாதை

-

புதுடெல்லி:
இறந்த தியாகிகள் மற்றும் நாட்டின் முக்கிய தலைவர்களுக்கு
அரசு மரியாதை அளிக்கும் வகையில் மூவர்ணக் கொடி
போர்த்தி இறுதி சடங்குகள் செய்யப்படும்.

தற்போது இந்த நெறிமுறை தேசிய பறவையான மயிலுக்கும்
நீட்டிக்கப்பட்டுள்ளது. கடந்த வெள்ளிக்கிழமை, உயர்
நீதிமன்றத்தின் 5வது கேட்டின் வெளியே மயில் ஒன்று
காயங்களுடன் கிடப்பதாக போலீசாருக்கு தகவல் கிடைத்தது.

அதனைத்தொடர்ந்து அங்கு வந்த போலீசார், சாந்தினி சவுக்கில்
உள்ள ஜெயின் கால்நடை மருத்துவமனைக்கு கொண்டு சென்றனர்.
ஆனால், மயில் இறந்து விட்டதாக தெரிவிக்கப்பட்டது.

அதனைத் தொடர்ந்து மயிலுக்கு தெற்கு டெல்லி ஜானாபுரியில்
உள்ள மருத்துவமனையில் உடற்கூறு பரிசோதனை மேற்
கொள்ளப்பட்டது.

அதனை வனத்துறை அதிகாரிகள் முன்னிலையில் போலீசார்,
மூவர்ண கொடி போர்த்தி மரப்பெட்டியில் வைத்து நல்லடக்கம்
செய்தனர். இது குறித்து திலக் மார் போலீசார் கூறுகையில்,

‘மயில் இந்தியாவின் தேசியப்பறவை என்பதால் அதனை
மூவர்ண கொடி போர்த்தி நல்லடக்கம் செய்யும் நெறிமுறையை
பின்பற்றி வருகிறோம்.

இதுபோன்று மேலும் இறந்த மயில்கள் எங்களது கட்டுப்பாட்டில்
வந்தால், மரியாதையுடன் நல்லடக்கம் செய்வோம். பிரேத
பரிசோதனை அறிக்கை அடுத்த வாரம் வந்துவிடும்.

அதன்பின் மயிலின் இறப்புக்கான காரணம் தெரியவரும்.
முதல்கட்ட விசாரணையில் இறந்த மயில் மரத்திலிருந்து கீழே
விழுந்திருக்கலாம் என தெரிகிறது’ என்று தெரிவித்தார்.

வனத்துறை அதிகாரிகள் கூறுகையில், ‘ போலீசார் நடத்தி
உள்ள இந்த நல்லடக்கத்தால் வனத்துறை விதி மீறப்பட்டுள்ளது.
இந்த விதிப்படி இறந்த முதல் வரிசை பிரிவு விலங்குகள் மாநில
அரசு சொத்தாகும்.

பிரேத பரிசோதனைக்கு பின் அதனை மாநில வனத்துறை தான்
அடக்கம் அல்லது தகனம் செய்ய வேண்டும்’ என்றனர்.
ஜெயின் பறவை மருத்துவமனை மேலாளர் சுனில் ஜெயின்,
‘ஒவ்வொரு மாதமும் 10 மயில்கள் காயங்களுடன் வருகின்றன.
இதில் சில ஹீட் ஸ்ட்ரோக்கால் பாதிக்கப்பட்டிருக்கும்,

சில மயில்கள் நாய் கடி அல்லது போக்குவரத்து நெரிசலில் சிக்கி
காயத்தால் உயிரிழக்க நேரிடும்’ என்று தெரிவித்தார்.
-
----------------------------------------
தினகரன்