20 மாநிலங்களுக்கு அபாய அறிவிப்பு.. தமிழகம் எந்த நிலையில்..? மீண்டும் விடுக்கப்படும் எச்சரிக்கை..!

இந்திய தலைநகர் டெல்லி உள்பட பல நகரங்களை புழுதி புயல் தாக்கிய நிலையில் மேலும் 20 மாநிலங்களுக்கு மீண்டும் புயல் எச்சரிக்கை விடுக்கப்பட்டுள்ளது.
நேற்று டெல்லி, சண்டிகர், அரியானா, மாநிலங்களில் இடி, மின்னலுடன் கூடிய பலத்த புயல் தாக்கியது.
தலைநகர் டெல்லி, சண்டிகரை நேற்று நள்ளிரவு புயல் தாக்கியது. டெல்லி பல பகுதிகளில் இடி, மிண்டலுடன் கூடிய பலத்த மழை பெய்து வருகிறது.
பல இடங்களில் மின்சாரம் தடைப்பட்டு டெல்லி மாநகரம் இருளில் மூழ்கியது. இதனால் மக்களின் இயல்பு வாழ்க்கை பாதிக்கப்பட்டுள்ளது. ராஜஸ்தான் மாநிலத்திலும் கன மழை பெய்து வருகிறது. மின்சாரம் துண்டிக்கப்பட்டுள்ளது.
மணிக்கு 90 கி.மீட்டர் வேகத்தில் காற்று வீசக்கூடும் என்று எச்சரிக்கை விடுக்கப்பட்டுள்ளதால், மிகுந்த எச்சரிக்கையுடன் ரயில் இயக்கப்படும் என்று டெல்லி மெட்ரோ நிர்வாகம் தெரிவித்து உள்ளது.
90 கி.மீட்டர் வேகத்திற்கு மேல் காற்று வீசினால், மெட்ரோ ரயில் பிளாட்பார்மில் நிறுத்திவைக்கப்படும் என்று டெல்லி மெட்ரோ ரயில் நிர்வாகம் அறிவித்து உள்ளது.
மேலும், 20 மாநிலங்களில் மோசமான வானிலை நிலவக்கூடும் என எச்சரிக்கை விடுக்கப்பட்டுள்ளது.
தமிழ்நாடு, கேரளா ஆகிய மாநிலங்களில் ஒரு சில இடங்களிலும் இடியுடன் கூடிய மிதமான மழை பெய்ய வாய்ப்பு உள்ளதாக இந்திய வானிலை ஆய்வு மையம் தெரிவித்து உள்ளது.
நன்றி
செய்தி புனல்