தி.மு.க.,வில் ஸ்டாலின் அமைக்கிறார், 'கேபினட்' : ஆட்சியாளர்களுக்கு நெருக்கடி தர திட்டம்

தமிழக அரசின் மீதான ஊழல் குற்றச்சாட்டுகளை ஆதாரத்துடன்
கூறுவதற்காக, அமைச்சரவையை போல், ஸ்டாலினும்,
தன் கட்சியில், எம்.எல்.ஏ.,க்கள் குழுவை நியமிக்க முடிவு
செய்துள்ளார்.

இது குறித்து, தி.மு.க., வட்டாரங்கள் கூறியதாவது:

ஜெயலலிதா, முதல்வராக இருந்தபோது, அரசின் ஒவ்வொரு
துறையிலும் நடக்கும் முறைகேடு தொடர்பாக, தி.மு.க., தலைவர்
கருணாநிதி, அறிக்கை விடுவார்.

அதற்கு, ஜெயலலிதா பதில் தருவார். சில நாட்களுக்கு பின்,
முறைகேடு கண்டறிப்பட்டால், துறை அமைச்சர் மாற்றப்படுவார்;
துறை அதிகாரிகளும் இடமாற்றம் செய்யப்படுவர்.

ஜெயலலிதா மறைவால், தற்போது, முதல்வராக பழனிசாமியும்,
துணை முதல்வராக பன்னீர்செல்வமும் உள்ளனர். தினகரன்
ஆதரவு, எம்.எல்.ஏ.,க்கள் தகுதி நீக்கத்தால், சட்டசபையில்,
அ.தி.மு.க., - எம்.எல்.ஏ.,க்களின் பலம் குறைந்துள்ளது.

அரசுக்கு குடைச்சல் :

இதனால் அவர்கள், தங்கள் ஆதரவு, பழனிசாமி அரசுக்கு கட்டாயம்
தேவை என்ற, தைரியத்தில் உள்ளனர். எந்த கட்சி, ஆட்சியில்
இருந்தாலும், அந்த கட்சியைச் சேர்ந்த, எம்.எல்.ஏ.,க்கள் உள்ளிட்டோர்,
அரசு ஒப்பந்த பணிகளை எடுப்பது, ஒப்பந்த நிறுவனங்களிடம்
கமிஷன் பெறுவது வழக்கமானது.

தற்போது, ஆளுங்கட்சி எம்.எல்.ஏ., - எம்.பி.,க்களாக இருப்பவர்கள்,
தங்கள் கட்சியில் ஏற்பட்டுள்ள பிளவால், மீண்டும் பதவிக்கு வர
முடியுமா என்ற, சந்தேகத்தில் உள்ளனர். இதனால், அவர்கள்,
கமிஷன் தொகையை உயர்த்தி வசூலிப்பதாகக் கூறப்படுகிறது.

கருணாநிதி, தீவிர அரசியலில் இருந்தபோது, அறிக்கை,
கேள்வி - பதில், கட்டுரை என, ஏதேனும் ஒன்றை வெளியிட்டு,
அரசுக்கு குடைச்சல் தருவார்.

தற்போது, உடல்நலம் பாதிக்கப்பட்டு, அவர் ஓய்வெடுத்து
வருகிறார். ஆனால், செயல் தலைவர் ஸ்டாலின், குட்கா முறைகேடு
தவிர்த்து, மற்ற துறைகளில் நடக்கும் ஊழல்கள் குறித்து, விரிவாக
புகார் எழுப்புவதில்லை.சட்ட அமைச்சர், சி.வி.சண்முகம், கூட்டுறவு
துறை அமைச்சர் ராஜு உள்ளிட்ட அமைச்சர்கள், ஸ்டாலினை,
கடுமையாகவும், ஒருமையிலும் பேசுகின்றனர்.

அதற்கு, தி.மு.க., தரப்பில் இருந்து, பெரிய அளவில் எதிர்ப்பு
தெரிவிப்பதில்லை.

முறைகேடு :

இதேநிலை தொடர்ந்தால், தி.மு.க., மீது, மக்கள் அதிருப்தி
அடைய கூடும் என்ற விபரத்தை, சில ஓய்வுபெற்ற, ஐ.ஏ.எஸ்.,
அதிகாரிகள், ஸ்டாலின் கவனத்திற்கு எடுத்து சென்றுள்ளனர்.

இதையடுத்து, அரசின் மீதான ஊழல் குற்றச்சாட்டுகளை கூற,
அமைச்சரவையை போல், ஸ்டாலினும், தன் கட்சியில்,
எம்.எல்.ஏ.,க்கள் குழுக்களை நியமிக்க முடிவு செய்துள்ளார்.

இதற்காக, மூன்று எம்.எல்.ஏ.,க்களுக்கு, ஒரு துறை என்று
ஒதுக்கப்படும். அதில் ஒருவர், முன்னாள் அமைச்சராக இருப்பார்.
அவர்கள், தங்களுக்கு ஒதுக்கியுள்ள துறையில் நடக்கும் முறை
கேடுகளை, தங்களுக்கு வேண்டிய அதிகாரிகள் வாயிலாக,
ஆதாரங்களுடன் திரட்டி, ஸ்டாலினிடம் வழங்க வேண்டும்.

அவர் அதை, பொது மக்களுக்கு வெளியிட்டு, அரசுக்கு நெருக்கடி
கொடுக்க திட்டமிட்டுள்ளார்.இவ்வாறு, தி.மு.க., வட்டாரங்கள்
கூறின.

- நமது நிருபர் -
தினமலர்

திமுக ஊழலில் ஈடுபட்ட போது
இதேபோல் யாரும் யோசிக்காமல்
இருந்து விட்டனர்.