'தலித்களின் வீடுகளில் இரவில் கொசு தொல்லை'

லக்னோ,
தலித்களின் வீடுகளில், இரவு முழுவதும் கொசுக்கடி தொல்லை
இருந்தாலும், அவர்களின் வீடுகளுக்கு சென்று அரசு திட்டங்களின்
பயன்களை அளித்ததாக, உ.பி., மாநில பெண் அமைச்சர்,
கூறியது சர்ச்சையை ஏற்படுத்தி உள்ளது.

உ.பி.,யில், பா.ஜ.,வை சேர்ந்த, யோகி ஆதித்யநாத் முதல்வராக
உள்ளார். இம்மாநிலத்தை சேர்ந்த அமைச்சர், சுரேஷ் ராணா,
சமீபத்தில், தலித்து சமூகத்தைச் சேர்ந்த ஒருவரின் வீட்டுக்கு
சென்று, அவர்கள் தந்த உணவை சாப்பிடாமல், வெளியில்
இருந்து வரவழைத்து சாப்பிட்டது சர்ச்சையை ஏற்படுத்தியது.

மற்றொரு அமைச்சரான, ராஜேந்திர பிரதாப் சிங், தலித்
சமூகத்தை சேர்ந்த ஒருவரின் வீட்டுக்கு சென்றதை,
ராமாயணத்தில், சபரி என்ற ஏழை மூதாட்டி வீட்டுக்கு, ராமர்
சென்ற நிகழ்வுடன்ஒப்பிட்டு பேசியதும், சர்ச்சையை கிளப்பியது.

இந்நிலையில், உ.பி., மாநில பெண், கல்வி அமைச்சர்
அனுபமா ஜெய்ஸ்வால் கூறியதாவது:தலித்களின் வீடுகளில்,
இரவு முழுவதும் கொசுக்கள் கடிக்கின்றன. அதை
பொருட்படுத்தாமல், அவர்களின் வீடுகளுக்கு சென்று,
அரசு திட்ட பயன்களை அளித்து வருகிறோம்.

இந்த அனுபவம் எங்களுக்கு மகிழ்ச்சியை அளிக்கிறது.
அமைச்சர்களில் சிலர், இரு தலித்களின் வீடுகளுக்கு செல்லும்படி
கூறினால் ஏற்க மறுக்கின்றனர்.

ஆனால், நான், நான்கு தலித்களின் வீடுகளுக்கு செல்ல
விரும்புகிறேன். இந்த பணி, எனக்கு திருப்தியை அளிக்கிறது.
எனக்கு ஒதுக்கப்பட்டதை விட அதிக தலித்களின் வீடுகளுக்கு
நான் சென்று வருகிறேன்.இவ்வாறு அவர் கூறினார்.

தலித்களின் வீடுகளில் கொசுத்தொல்லை அதிகமாக இருக்கும்
என, அமைச்சர் கூறியது சர்ச்சையை ஏற்படுத்தி உள்ளது.
-
---------------------------------
தினமலர்

Advertisement