நேரடியாக நியமிக்கப்பட்ட முதல் பெண் வழக்கறிஞர் உச்ச நீதிமன்ற நீதிபதியாக இந்து மல்கோத்ரா பதவியேற்பு

-

புதுடெல்லி:
உச்ச நீதிமன்ற நீதிபதியாக நியமிக்கப்பட்ட இந்து மல்கோத்ரா
பதவியேற்றார். அவருக்கு தலைமை நீதிபதி தீபக் மிஸ்ரா
பதவிப் பிரமாணம் செய்து வைத்தார்.

உச்ச நீதிமன்றத்துக்கு தலைமை நீதிபதி உட்பட31 நீதிபதிகளை
நியமிக்க ஒப்புதல் அளிக்கப்பட்டுள்ளது. ஆனால், 24 நீதிபதிகள்
மட்டுமே பணியாற்றி வருகின்றனர்.

இந்நிலையில், உச்ச நீதிம்னற மூத்த பெண் வழக்கறிஞரான
இந்து மல்கோத்ரா (61), உத்தரகண்ட் உயர் நீதிமன்ற தலைமை
நீதிபதி கே.எம்.ஜோசப்பையும் உச்ச நீதிமன்ற நீதிபதிகளாக
நியமிக்கும்படி கடந்த ஜனவரியில் மத்திய அரசுக்கு ‘கொலிஜியம்’
எனப்படும் நீதிபதிகள் நியமனக்குழு பரிந்துரை செய்தது.

ஆனால், இவர்களில் இந்து மல்கோத்ராவுக்கு மட்டுமே
இருதினங்களுக்கு முன் மத்திய அரசு ஒப்புதல் அளித்தது.
நீதிபதி ஜோசப்பை நீதிபதியாக்க மத்திய அரசு மறுத்தது.

அந்த பரிந்துரையை நேற்று முன்தினம் கொலிஜியத்துக்கு திருப்பி
அனுப்பி, அதை மறுபரிசீலனை செய்யும்படி மத்திய அரசு கேட்டுக்
கொண்டது. உத்தரகண்டில் கடந்த 2016ல் காங்கிரஸ் அரசு
கலைக்கப்பட்டது செல்லாது என்று மத்திய அரசுக்கு எதிராக
நீதிபதி ஜோசப் தீர்ப்பு அளித்ததால், அவருடைய பெயரை இப்போது
மத்திய அரசு நிராகரித்து விட்டதாக குற்றம் சாட்டப்பட்டுள்ளது.

இந்நிலையில், இந்து மல்கோத்ரா நேற்று உச்ச நீதிமன்ற நீதிபதியாக
பதவியேற்றார். உச்ச நீதிமன்றத்தில் ஒன்றாவது நீதிமன்ற
அறையில் நடைபெற்ற விழாவில், மல்கோத்ராவுக்கு தலைமை
நீதிபதி தீபக் மிஸ்ரா பதவிப் பிரமாணமும், ரகசிய காப்பு பிரமாணமும்
செய்து வைத்தார்.

இதன் மூலம், உச்ச நீதிமன்ற நீதிபதிகளின் எண்ணிக்கை 24ல்
இருந்து 25 ஆக உயர்ந்துள்ளது. மேலும், உச்ச நீதிமன்றத்தின் 7வது
பெண் நீதிபதி என்ற பெருமையையும், வழக்கறிஞராக இருந்து
நேரடியாக உச்ச நீதிமன்ற நீதிபதியாக நியமிக்கப்பட்ட முதல் நீதிபதி
என்ற பெருமையையும் இந்து மல்கோத்ரா பெற்றுள்ளார்.

முதல் நாளிலேயே தலைமை நீதிபதி அமர்வில் இணைந்து
வழக்குகளை விசாரித்தார்.
-
-------------------------------
தினத்தந்தி

3வது முறையாக 2 பெண் நீதிபதி

உச்ச நீதிமன்றத்தின் 67 ஆண்டுகால வரலாற்றில் 2 பெண்
நீதிபதிகள் ஒரே நேரத்தில் பணியாற்றும் நிகழ்வு 3வது முறையாக
நடக்கிறது. முதல் முறையாக நீதிபதிகள் கியான் சுதா மிஸ்ராவும்,
ரஞ்சனா பிரகாஷ் தேசாயும் ஒரே காலக்கட்டத்தில் நீதிபதிகளாக
இருந்தனர்.

2வது முறையாக நீதிபதி ரஞ்சனாவும் நீதிபதி பானுமதியும்
பணியாற்றினர். மிஸ்ரா ஓய்வு பெற்ற பிறகு நீதிபதி பானுமதி
தொடர்ந்து பணியாற்றி வருகிறார்.
அவருடன் இப்போது நீதிபதி இந்து மல்கோத்ரா இணைந்துள்ளார்.

7வது பெண் நீதிபதி

உச்ச நீதிமன்றம் 1950ல் நிறுவப்பட்டது. அதன் 67 ஆண்டு கால
வரலாற்றில் இதுவரை 7 பெண்கள் மட்டுமே நீதிபதிகளாக
நியமிக்கப்பட்டுள்ளனர். இவர்களில் இந்து மல்கோத்ரா 7வது
இடத்தை பிடித்துள்ளார்.

உச்ச நீதிமன்றத்தின் முதல் பெண் நீதிபதி என்ற பெருமையை
பெற்றவர் பாத்திமா பீவி. இவர் தமிழ்நாடு ஆளுநராகவும்
இருந்துள்ளார். உச்ச நீதிமன்றம் நிறுவப்பட்டு 39 ஆண்டுகளுக்குப்
பிறகு, 1989ல் பாத்திமா பீவி நீதிபதியாக நியமிக்கப்பட்டார்.

இதுவரை உச்ச நீதிமன்ற பெண் நீதிபதிகள்

1. பாத்திமா பீவி (1989 அக்.6 முதல் 1992 ஏப்.29 வரை)
2. சுஜாதா மனோகர் (1994, நவ.8 முதல் 1999, ஆகஸ்ட் 27 வரை)
3. ரூமா பால் (2000, ஜன.8 முதல் 2006 ஜூன் 2 வரை)
4. கியான் சுதா மிஸ்ரா (2010, ஏப்.30 முதல் 2014 ஏப்.27 வரை)
5 ரஞ்சனா பிரகாஷ் தேசாய் (2011, செப்.13 முதல் 2014, அக்.29 வரை)
6. பானுமதி (2014, ஆக.13ல் நியமிக்கப்பட்ட இவர், 2020, ஜூலை 19ல் ஓய்வு பெறுகிறார்.
7. இந்து மல்கோத்ரா (2018, ஏப்.27)
-
------------------------------

பெங்களூருவில் பிறந்தவர்

நீதிபதி இந்து மல்கோத்ரா 1956ல் பெங்களூருவில் பிறந்தார்.
தந்தை ஓம் பிரகாஷ் மல்கோத்ரா. தாய் சத்யா மல்கோத்ரா.
ஓம் பிரகாஷ் மல்கோத்ரா உச்ச நீதிமன்ற மூத்த வழக்கறிஞர்
ஆவார்.

இவருடைய கடைசி பிள்ளைதான் இந்து மல்கோத்ரா.
டெல்லியில் உள்ள கர்மேல் கான்வென்டில் பள்ளி படிப்பை
முடித்தார். பிறகு டெல்லியில் உள்ள ராம் கல்லூரியில்
பிஏ (ஹானர்ஸ்) அரசியல் அறிவியல் பட்டப்படிப்பு படித்தார்.
இதே கல்லூரியில் இதே பாடத்தில் பட்ட மேற்படிப்பையும்
முடித்தார். பிறகு மிராண்டா கல்லூரியிலும், விவேகானந்தா
கல்லூரியிலும் சில காலம் விரிவுரையாளராக
பணியாற்றினார்.

பின்னர், 1979ல் டெல்லி பல்கலைக் கழகத்தில் சட்டப் படிப்பில்
சேர்ந்து, 1982ல் முடித்தார். 1983ல் டெல்லி பார் கவுன்சிலில் பதிவு
செய்து தனது வழக்கறிஞர் தொழிலை தொடங்கினார்.

1988ல் உச்ச நீதிமன்றத்தில் அடியெடுத்து வைத்தார். உச்ச
நீதிமன்றத்தில் பெண் ஊழியர்களுக்கு எதிராக நடக்கும்
பாலியல் தொல்லை புகார்களை விசாரிப்பதற்காக உச்ச
நீதிமன்றம் நியமித்துள்ள 10 பேர் கொண்ட குழுவிலும் இடம்
பெற்றிருந்தார்.

உச்ச நீதிமன்றத்தில் இவருக்கு 2007ல் மூத்த வழக்கறிஞர்
அந்தஸ்து வழங்கப்பட்டது. 30 ஆண்டுகளுக்கு முன்பு இதே
போல் வேறொரு பெண் வழக்கறிஞருக்கு மட்டுமே இந்த
அந்தஸ்து வழங்கப்பட்டு இருந்தது.

அதற்கு பிறகு இந்த தகுதியை பெற்ற ஒரே பெண் வழக்கறிஞர்
இந்து மல்கோத்ராதான். உச்ச நீதிமன்றத்தில் இவர்
30 ஆண்டுகள் வழக்கறிஞராக பணியாற்றி உள்ளார்.
-
----------------------------
தினத்தந்தி