வரும் ஜூலைக்குள், 'ரயில் - 18' நவீன பெட்டி

சென்னை:
'ஐ.சி.எப்.,பில், ரயில் - 18 திட்டத்திற்கு, உலகத் தரத்தில்,
நவீன ரயில் பெட்டிகள், வரும் ஜூலைக்குள் தயாரிக்கப்படும்'
என, அதிகாரிகள் தெரிவித்தனர்.

சென்னையில் உள்ள, ரயில் பெட்டி இணைப்பு தொழிற்
சாலையான, ஐ.சி.எப்.,பில், ஜெர்மன் தொழில்நுட்பத்தில்,
'லிங் ஹாப்மென் புஷ்' என்கிற, எல்.எச்.பி., நவீன ரயில்
பெட்டிகள், தயாரிக்கப்பட்டு வருகின்றன.

இத்துடன், உலகத்தரத்தில், 'ரயில் - 18' திட்டத்திற்கு, ரயில்
பெட்டிகள் தயாரிக்கப்படுகின்றன.

இத்திட்டம் மற்றும் பெட்டிகள் தயாரிப்பு குறித்து,
சென்னையில் நேற்று, நிருபர்கள் சந்திப்பில், ஐ.சி.எப்.,
பொதுமேலாளர் மணி, இயந்திர பிரிவு துணை தலைமை
பொறியாளர், திலிப்குமார் ஆகியோர் கூறியதாவது:

'ரயில் - 18' திட்டத்திற்கு, ரயில் பெட்டிகள் தயாரிக்கும்
பணி துவங்கப்பட்டுள்ளது. இத்திட்டத்தில், முதலில்,
ஒரு ரயிலுக்கான, 16 பெட்டிகள் தயாரிக்கப்படும்.
இந்த பெட்டி வரும் ஜூலைக்குள், முழுவதுமாக தயாராகி
விடும்.

முழுவதும், இந்திய தளவாடங்களை பயன்படுத்தி,
தயாரிக்கப்படும். இந்த ரயிலுக்கு, தனியாக இன்ஜின்
கிடையாது. அனைத்து பெட்டிகளிலும், மோட்டார்
பொருத்தப்பட்டிருக்கும்.

இதனால், ரயிலின் இழுவை திறன் அதிகரிக்கும். ரயிலை
அதிவேகமாக இயக்க, உதவியாக இருக்கும். சொகுசு
இருக்கை வசதிகளுடன், பெட்டிகள் முழுவதும் எல்.இ.டி.,
விளக்குகள் பொருத்தப்பட்டிருக்கும்.

இரண்டு பெட்டிகளுக்கு இடையேயான இணைப்பு பகுதி,
அகலமாக வடிவமைக்கப்படுவதால், பயணியர் உள்ளிருந்து
பார்க்கும் போது, 16 பெட்டிகளும், ஒரே பெட்டி போல இருக்கும்.

பெட்டியில், தானியங்கி கதவுகளுடன், தானியங்கி படியும்
இருக்கும். நிலையத்தில் ரயில் நின்றதும், தானியங்கி படி,
பெட்டிக்கும், பிளாட்பாரத்திற்கும் இடையே, தற்காலிக
பாலம் போல் நீளும்.

இதனால், பயணியர் பெட்டியில் ஏறும்போது, தவறி கீழே
விழும் நிலை ஏற்படாது. ரயில் போக்குவரத்து குறித்த
தகவல்கள், ஜி.பி.எஸ்., வசதியில், 'டிஸ்பிளே போர்டில்'
தெரிந்து கொள்ளலாம்.

இந்த ரயிலில் பயணம் செய்வது, விமானத்தில் பயணம்
செய்வது போல இருக்கும். பெட்டி, 160 கி.மீ., வேகத்தில்
இயங்கக்கூடியது.

உலக தரத்தில், 'ரயில் - 20' திட்டத்திற்கான பெட்டிகள்
முழுவதும், அலுமினியத்தால் தயாரிக்க திட்டமிடப்பட்டுள்ளது.

ஐ.சி.எப்.,பில், 2018 - 19ல், 3,000 பெட்டிகள் தயாரிக்க இலக்கு
நிர்ணயிக்கப்பட்டுள்ளது.

இவ்வாறு இருவரும் கூறினர்.
-
------------------------------
தினமலர்