இரட்டை இலைச் சின்னம் வழக்கு விசாரணை மே 1-ஆம் தேதிக்கு ஒத்திவைப்பு

இரட்டை இலைச் சின்னம் ஒதுக்கீடு தொடர்பான வழக்கு
விசாரணையை மே 1-ஆம் தேதிக்கு தில்லி உயர் நீதிமன்றம்
ஒத்திவைத்தது.

தில்லி உயர் நீதிமன்ற நீதிபதிகள் ஜி.எஸ். சிஸ்தானி,
சங்கீதா தீங்க்ரா ஷெகல் ஆகியோர் அடங்கிய அமர்வு முன்
வெள்ளிக்கிழமை இந்த வழக்கு விசாரணைக்கு வந்தபோது,
வி.கே. சசிகலா, டி.டி.வி. தினகரன் ஆகியோர் சார்பில் மூத்த
வழக்குரைஞர் அபிஷேக் சிங்வி ஆஜராகி முன் வைத்த வாதம்
வருமாறு:

இரட்டை இலைச் சின்னம் வழக்கில் பல்வேறு சட்டப்பூர்வ
கொள்கைகளைக் கருத்தில் கொள்ளாமல் தேர்தல் ஆணையம்
உத்தரவிட்டுள்ளது. இந்த விவகாரத்த்துக்கும் சாதிக் அலி
வழக்குக்கும் பெரிய அளவில் வேறுபாடு உள்ளது.

தேர்தல் ஆணையத்தில் தாக்கல் செய்யப்பட்ட பிரமாணப்
பத்திரங்களைச் சரிபார்க்கவோ, பிரமாணப் பத்திரங்கள்
தொடர்பாக குறுக்கு விசாரணையோ செய்யவில்லை.

எங்கள் தரப்பு வேண்டுகோளை தேர்தல் ஆணையம் நிராகரித்து
விட்டது. கட்சியின் விதிகளை மாற்றம் செய்ய பொதுக் குழுவுக்கு
அதிகாரம் இருந்தாலும், பொதுச் செயலாளரை நீக்கும் அதிகாரம்
இல்லை.

இதுபோன்ற சூழலில், எதன் அடிப்படையில் கட்சியின் பொதுச்
செயலாளர் பதவி நீக்கப்பட்டது? பொதுச் செயலாளர் பதவியை
நீக்குவது தொடர்பாக தேர்தல் நடைபெற்றதா? கட்சியின் பொதுச்
செயலாளரை அடிப்படை உறுப்பினர்கள் தேர்வு செய்வார்கள்
என்ற விதியில் மாற்றம் செய்யவே முடியாது.

வி.கே. சசிகலாவை கட்சியின் தாற்காலிகப் பொதுச் செயலாளராக
நியமிக்க முன்மொழிந்தவர்களே பின்னாளில் அவருக்கு எதிராக
செயல்படவும் செய்தனர். அதிமுகவின் பொதுச் செயலாளர்
வி.கே. சசிகலா என அங்கீகரிக்கும் வகையில் தேர்தல்
ஆணையக் கடிதப் போக்குவரத்தில் தெரிவிக்கப்பட்டுள்ளது'
என்றார்.

இந்த வாதங்களைப் பதிவு செய்து கொண்ட நீதிபதிகள்,
வழக்கு விசாரணயை மே 1-ஆம் தேதிக்கு ஒத்திவைத்து
உத்தரவிட்டனர். இவ்வழக்கு விசாரணைக்கு வந்ததையொட்டி,
தமிழக சட்ட அமைச்சர் சி.வி. சண்முகம் நீதிமன்றத்துக்கு
வந்திருந்தார்.

முன்னதாக, தமிழக முதல்வர் எடப்பாடி பழனிசாமி,
துணை முதல்வர் ஓ. பன்னீர்செல்வம் அணிக்கு இரட்டை இலைச்
சின்னத்தை ஒதுக்கி தேர்தல் ஆணையம் கடந்த ஆண்டு நவம்பர்
23-இல் பிறப்பித்த உத்தரவுக்கு எதிராக டி.டி.வி. தினகரன்,
வி.கே. சசிகலா ஆகியோர் சார்பில் தில்லி உயர் நீதிமன்றத்தில்
தனித் தனியாக மேல்முறையீட்டு மனுக்கள் தாக்கல் செய்யப்பட்டன.

அந்த மனுக்கள் தில்லி உயர் நீதிமன்றத்தில் கடந்த 20-ஆம் தேதி
விசாரணைக்கு வந்தது. அப்போது, வி.கே. சசிகலா, டிடிவி தினகரன்
ஆகியோர் சார்பில் ஆஜரான மூத்த வழக்குரைஞர் கபில் சிபல், '
அதிமுக சட்ட விதிகளின்படி உச்சபட்ச அதிகாரம் பொதுச்
செயலாளருக்கு உள்ளது. பொதுச் செயலாளர் பதவியை நீக்கிவிட்டு,
ஒருங்கிணைப்பாளர், இணை ஒருங்கிணைப்பாளர் என்ற புதிய
பதவிகள் தற்போது உருவாக்கப்பட்டுள்ளன.

கட்சியின் விதிகளில் மாற்றம் செய்து கொள்ளலாமே தவிர,
கட்சியின் அமைப்பு முறையை மாற்றம் செய்தது கட்சி விதிகளுக்கு
எதிரானது' என்பன உள்ளிட்ட வாதங்களை முன்வைத்தார்.
வாதங்களைப் பதிவு செய்து கொண்ட நீதிபதிகள், வழக்கு
விசாரணயை ஏப்ரல் 24-ஆம் தேதிக்கு ஒத்திவைத்து
உத்தரவிட்டிருந்தனர்.

-
---------------------------------
தினமணி