பலாத்காரத்துக்கு ஆளாகும் ஆண் குழந்தைகளுக்கும் இழப்பீடு'

புதுடில்லி :
பெண் குழந்தைகளுக்கு உள்ளதை போல், பாலியல்
பலாத்காரத்துக்கு ஆளான, ஆண் குழந்தைகளுக்கும்
இழப்பீடு வழங்க வகை செய்யும் சட்ட திருத்தத்துக்கு,
மத்திய பெண்கள் மற்றும் குழந்தைகள் நலத் துறை
அமைச்சர் மேனகா, ஆதரவு தெரிவித்துள்ளார்.

நாட்டில் நிலவும் அநீதிகளை களைய, மாற்றங்களை
வலியுறுத்தும், 'சேஞ்ச்.ஆர்' என்ற இணையதளத்தில், பிரபல
திரைப்பட தயாரிப்பாளர், இன்ஸியா தாரிவாலா
பதிவேற்றம் செய்துள்ள மனுவில் கூறப்பட்டுள்ளதாவது:

பாலியல் பலாத்காரத்துக்கு ஆளாகும் ஆண் குழந்தைகளுக்கு,
பெண் குழந்தைகளுக்கு வழங்கப்படுவதை போல் இழப்பீடு
வழங்க வேண்டும். இவ்வாறு அதில் கூறியுள்ளார்.

இது குறித்து, பா.ஜ.,வை சேர்ந்த, மத்திய பெண்கள் மற்றும்
குழந்தைகள் நலத்துறை அமைச்சர், மேனகா கூறியதாவது:

ஆண்கள் பாலியல் பலாத்காரத்துக்கு ஆளாகும் விவகாரம்,
அலட்சியப்படுத்தப்படுகிறது. பாலியல் பலாத்காரம் என்பது,
இரு பாலினத்துக்கும் பொதுவானது. பாலியல்
பலாத்காரத்துக்கு ஆளாகும் ஆண் குழந்தைகள், அதை
வெளியே தெரிவித்தால், அசிங்கப்பட வேண்டும் என்ற
அச்சத்தில், சொல்லாமல், அந்த குற்ற உணர்வுடன் வாழ்க்கையை
நடத்துகின்றனர்.

இது, உடனடியாக கவனிக்க வேண்டிய முக்கியத்துவம் வாய்ந்த
பிரச்னை. பெண் குழந்தைகளை போல், பாலியல்
பலாத்காரத்துக்கு ஆளாகும் ஆண் குழந்தைகளுக்கும், தக்க
இழப்பீடு கிடைக்க வகை செய்யப்பட வேண்டும்.

இது தொடர்பான சட்டத்தில் திருத்தம் செய்யப்பட வேண்டும்.
இந்த விவகாரம் குறித்து விரிவான ஆய்வு செய்யும்படி,
என்.சி.பி.சி.ஆர்., எனப்படும், தேசிய குழந்தைகள் உரிமை
பாதுகாப்பு கமிஷனுக்கு உத்தரவிட்டுள்ளேன். இவ்வாறு அவர்
கூறினார்.
-
---------------------------------
தினமலர்