வரத்து அதிகரிப்பால் வெங்காயம் கிலோ ₹12ஆக சரிவு!

பெரிய வெங்காயம் வரத்து அதிகரிப்பால் மொத்த விலையில் கிலோ ₹12ஆக சரிந்துள்ளது. இந்தியாவில் மகாராஷ்டிரா, கர்நாடகா, ஆந்திராவில் பெரிய வெங்காயம் அதிகளவில் சாகுபடி செய்யப்படுகின்றன. இங்கு கடந்த ஒன்றரை மாதமாக பெரிய வெங்காயம் அமோக விளைச்சலை தந்துள்ளது. இதன் காரணமாக, சேலம் மார்க்கெட்டுக்கு வழக்கத்தைவிட, பெரிய வெங்காயம் வரத்து 50 முதல் 60 சதவீதம் அதிகரித்துள்ளது. இதன் காரணமாக பெரிய வெங்காயம் விலை படிப்படியாக குறைந்து வருகிறது.
இது குறித்து சேலம் லீ பஜார் மொத்த வெங்காயம் வியாபாரிகள் கூறியதாவது: வட மாநிலங்களில் பெரிய வெங்காயம் அமோக விளைச்சலை தந்துள்ளது. வழக்கமாக சேலம் மார்க்கெட்டுக்கு நாள் ஒன்றுக்கு 100 முதல் 120 டன் பெரிய வெங்காயம் வரும்.

ஆனால் கடந்த ஒன்றரை மாதமாக 250 முதல் 300 டன் வருகிறது. இதன் காரணமாக கடந்த மாதத்தை விட, நடப்பு மாதத்தில் பெரிய வெங்காயம் விலை குறைந்துள்ளது.
கடந்த மாதம் (மொத்த விலையில்) ஒரு கிலோ ₹20 முதல் ₹25 என விற்கப்பட்டது. நேற்று நிலவரப்படி ₹12 முதல் ₹15 என விலை சரிந்துள்ளது. அதே நேரத்தில் சின்ன வெங்காயம் விலையும் குறைந்து வருகிறது. கடந்த மாதம் வரை ஒரு கிலோ சின்ன வெங்காயம் ₹25 முதல் ₹30 என விற்பனை செய்யப்பட்டது. தற்போது ₹20 என விற்பனை செய்யப்படுகிறது.
இவ்வாறு வியாபாரிகள் கூறினர்
நன்றி
தினகரன்