சுரண்டப்படும் மலைவளம், தரை மட்டமாகும் குன்றுகள் : எதிர்காலத்தில் அபாயங்கள் அதிகரிக்கும்

சேலம்: தமிழகத்தில் எம்.சாண்ட் மணல் உள்ளிட்ட பல்வேறு தேவைகளுக்காக மலைகளை சிதைப்பதும், குன்றுகளை தரைமட்டமாக்குவதும் அபாயத்தை ஏற்படுத்தும் என்ற அச்சம் எழுந்துள்ளது. தமிழகத்தில் நிலவளம், நீர்வளத்திற்கு இணையாக மலைவளம் உள்ளது. மேற்கு தொடர்ச்சி மலை, சேர்வராயன் மலை, கல்வராயன் மலை, கொல்லிமலை, ஜவ்வாது மலை, கஞ்சமலை, பச்ைசமலை என்று மலைகளின் பட்டியலை அடுக்கிக் கொண்டே போகலாம். இதில் மேற்கு தொடர்ச்சி மலைகளிலும், சேர்வராயன் மலைகளிலும் அதிகளவில் மரங்கள் உள்ளது. மழை வளத்திற்கு இந்த மலைகளும், மரங்களும் முக்கிய காரணிகளாக உள்ளது. இந்நிலையில், சமீப காலமாக தமிழகத்தில் மலைகள் உடைக்கப்படுவதும், குன்றுகள் தகர்க்கப்படுவதும் அதிகளவில் அரங்கேறி வருகிறது. சமீபத்திய ஆய்வுகளின் படி 30 சதவீதம் குன்றுகள் மாயமாகிவிட்டது.
தொடரும் இதுபோன்ற விபரீதங்கள், எதிர்காலத்தில் அபாயங்களை உருவாக்கும் என்ற அச்சம், இயற்கை ஆர்வலர்களிடம் எழுந்துள்ளது. இது குறித்து இயற்கை ஆர்வலர்கள் கூறியதாவது: பல கோடி ஆண்டுகளுக்கு முன்பு இயற்கையில் ஏற்பட்ட மாற்றாங்களால் மலைவளம் உருவானது. மலைகளால் ஏராளமான நன்மைகள் இருக்கின்றன. மரங்கள், தாவரங்கள் வளர்வதற்கும், அரிய உயிரினங்கள், விலங்குகள் வாழ்வதற்கும் மலைப்பகுதியே உகந்தது. ஓரிடத்தில் பூகம்பம் ஏற்படும்போது அதை தாங்கி நிறுத்தும் சக்தி மலைகளுக்கு உள்ளது. மலையில் பெய்யும் மழை நீரை அடிவாரத்திற்கு கொண்டு வந்து, அதை ஆறு, குளம், ஏரிகளுக்கு திருப்பி விடுவதால் விவசாயம் செழிக்கிறது. இப்படி சிறப்பு வாய்ந்த மலைவளம் சுரண்டப்படுவது வேதனைக்குரியது. குறிப்பாக மலைகள் சூழ்ந்த பகுதி என்பதால் சைலம் என்று அழைக்கப்பட்ட மாவட்டம் காலப்போக்கில் சேலம் என்று மாறியது.
நன்றி
தினகரன்

இங்கு திரும்பிய திசைகள் எல்லாம் மலைகளே தென்பட்ட நிலையில், தற்போது அவற்றை உடைத்து தரைமட்டமாக்கும் அவலங்கள் கண்ணில் படுகிறது. சாலைப்பணிக்காகவும், வீடுகள் கட்டவும், ஏற்றுமதி செய்யவும் மலைவளம் அதிகளவில் சுரண்டப்படுகிறது. இந்நிலையில் மணல் தட்டுப்பாடு ஏற்பட்டுள்ளதால், கட்டுமான பணிக்கு எம்.சாண்ட் பயன்படுத்திக்கொள்ள, அரசு அனுமதி வழங்கியுள்ளது. இதை பயன்படுத்திக்கொண்டு எம்.சாண்ட் குவாரி உரிமையாளர்கள் அதிகளவில் மலைகளை அழித்து வருகின்றனர். இதே போல் சாலைப்பணிக்காகவும் மலைவளம் அதிகளவில் சுரண்டப்படுகிறது. சாலை நன்றாக இருக்க வேண்டும் என்பது முக்கியம் தான். ஆனால், இதற்கான ஜல்லிகள் மலைகளை உடைத்து எடுக்கும் கருங்கல்லில் இருந்தே உருவாக்கப்படுகிறது.
தமிழகத்தை பொறுத்தவரை சரியான திட்டமிடல் இல்லாதால் மலை வளம் அதிகளவில் வீணாகிறது. மலைவளம் நன்றாக இருந்தால்தான் அனைத்து உயிரினங்களும் நல்ல நிலையில் இருக்கும். இதை சிதைப்பதற்கு அதிகாரிகள், ஒப்பந்ததாரர்கள் என்று பலரும் கரம் கோர்ப்பது வேதனைக்குரியது. இயற்கை தந்த மலைவளத்தை, அழித்தால் பூகம்பம் போன்ற இயற்கை சீற்றங்களில் இருந்து எதிர்காலத்தில் நம்மை தற்காத்துக் கொள்ள முடியாது. எனவே எதிர்கால அபாயங்களை கருத்தில் கொண்டு மலை வளம் காக்க அனைவரும் முன்வரவேண்டும். எந்த பொருளை வேண்டுமானாலும் மனிதனால் உருவாக்க முடியும். ஆனால் மலை வளத்தை உருவாக்க முடியாது என்பதை உணர்ந்து, அதை காப்பதற்கு உறுதியேற்க வேண்டும். இவ்வாறு இயற்கை ஆர்வலர்கள் தெரிவித்தனர்.