தண்ணீர் தட்டுப்பாடு எதிரொலி : மைக்ரோ ஸ்பிரிங்லரில் நீர் பாய்ச்சும் விவசாயிகள்

ஊட்டி: கோடை காலமான தற்போது தண்ணீர் தட்டுப்பாட்டால் மைக்ரோ ஸ்பிரிங்லர் பயன்படுத்தி விவசாயிகள் பயிர்களுக்கு தண்ணீர் பாய்ச்சி வருகின்றனர். நீலகிரி மாவட்டத்தில் ஆண்டு தோறும் ஜூன் மாதம் துவங்கி நவம்பர் மாதம் வரை தென்மேற்கு மற்றும் வடகிழக்கு பருவமழை பெய்யும். இச்சமயங்களில் அனைத்து விதமான மலை காய்கறிகளும் பயிரிடப்படும். குறிப்பாக, உருளைக்கிழங்கு, கேரட், பீட்ரூட், முட்டைகோஸ், பீன்ஸ் போன்ற காய்கறிகள் பயிரிடப்படுகிறது.
மலை மாவட்டம் என்பதால், கோடையில் தண்ணீர் பஞ்சம் ஏற்படும். இது போன்ற சமயங்களில் மலைப்பாங்கான பகுதிகளில் விவசாயம் செய்வதை விவசாயிகள் தவிர்க்கின்றனர். சிலர் மழையை நம்பியே விவசாயம் செய்கின்றனர். அதே சமயம் சமமான பகுதிகளில் விவசாயம் செய்பவர்கள் குறைந்த தண்ணீர் இருந்தாலும், மைக்ரோ ஸ்பிரிங்லர் மூலம் அனைத்து பயிர்களுக்கும் தேவையான தண்ணீர் பாய்ச்சி வருகின்றனர்.
தற்போது கோடை காலம் என்பதால், மழை இன்றி போதுமான தண்ணீர் கிடைப்பதில்லை. இந்நிலையில், விவசாயிகள் தங்களது தோட்டங்களில் பிளாஸ்டிக் கிணறுகளில் தண்ணீர் தேக்கி வைத்து, அதனை மைக்ரோ ஸ்பிரிங்லர் மூலம் காலை மற்றும மாலை நேரங்கிளில் தண்ணீர் பாய்ச்சி விவசாயம் செய்கின்றனர். குறிப்பாக கப்பத்தொரை, நஞ்சநாடு போன்ற பகுதிகளில் மைக்ரோ ஸ்பிரிங்கலர் பயன்படுத்தி விவசாயிகள் தண்ணீர் பாய்ச்சி வருகின்றனர்.

நன்றி
தினகரன்