15 மாத வாடகை பாக்கி தராததால் தாலுகா அலுவலகத்தை பூட்டி அதிமுக பிரமுகர் உண்ணாவிரதம்: புவனகிரியில் பரபரப்பு

புவனகிரி:
சிதம்பரம் புவனகிரியில் வாடகை தராததால் தாலுகா
அலுவலக கட்டிடத்தை பூட்டி, அதன் கட்டிட உரிமையாளரான,
அதிமுக பிரமுகர் உண்ணாவிரதத்தில் ஈடுபட்ட சம்பவம்
பரபரப்பை ஏற்படுத்தியது.

சிதம்பரம் தாலுகா இரண்டாக பிரிக்கப்பட்டு புவனகிரி
தனி தாலுகாவாக உருவானது. புவனகிரியில் அதிமுக
பிரமுகரான முன்னாள் பேரூராட்சி தலைவர் செஞ்சிலெட்சுமி
என்பவருக்கு சொந்தமான வீட்டில் வாடகை கட்டணத்தில்
தாலுகா அலுவலகம் செயல்படுகிறது.

கடந்த 15 மாதங்களாக கட்டிடத்திற்கு வாடகை பாக்கி
தரவில்லை எனக்கூறி செஞ்சிலெட்சுமி நேற்று திடீரென
தாலுகா அலுவலக கதவை பூட்டி உண்ணாவிரத
போராட்டத்தில் ஈடுபட்டார்.

இதனால் பல்வேறு வேலை விஷயமாக அலுவலகத்திற்கு வந்த
பொதுமக்கள் சிரமப்பட்டனர். இதுகுறித்து செஞ்சிலெட்சுமி
கூறுகையில், முதலில் ஒரு வருடத்திற்கு மட்டுமே அரசு
நிர்வாகம் சார்பில் வாடகை கொடுக்கப்பட்டது.

பின்னர் கடந்த 15 மாதங்களாக வாடகை தரப்படவில்லை.
இதுகுறித்து கட்டிடத்தின் உரிமையாளர் என்ற முறையில்
தாலுகா அலுவலகத்தில் தாசில்தாரிடம் பலமுறை கேட்டும்,
வாடகை வழங்கப்படவில்லை.

இதற்காக ஏற்கனவே உண்ணாவிரதம் அறிவித்தபோது ஏப்ரல்
மாதத்தில் தருகிறோம் எனக் கூறியிருந்தனர். ஆனால் தற்போது
வரை வாடகை தரவில்லை. அதனால் போராட்டம் நடத்தினேன்
என்றார்.

அப்போது விரைவில் வாடகை பாக்கி வழங்கிட நடவடிக்கை
எடுக்கிறோம் என தாலுகா அலுவலக அதிகாரிகள் கூறியதால்
செஞ்சிலெட்சுமி போராட்டத்தை முடித்துக்கொண்டார்.

இச்சம்பவம் புவனகிரி பகுதியில் பரபரப்பை ஏற்படுத்தியது.
-
---------------------------------
தினகரன்