`தமிழகத்தைச் சீரழிக்கும் திட்டங்கள் வேண்டாம்!’ - இயற்கைப் பாதுகாப்புக் குழுவின் கோரிக்கைகள்

தமிழகத்தில் தொடர்ந்து நடந்து வரும் பல வகையான இயற்கை வள கொள்ளைகளையும், சுற்றுச் சூழலுக்கு பாதிப்பு ஏற்படுத்தும் செயல்பாடுகளை தடுத்து நிறுத்துவதற்கும், அதன் அபாயங்களை மக்களிடம் கொண்டு செல்லவும் முப்பதுக்கும் மேற்பட்ட அமைப்புகளின் கூட்டமைப்பான இயற்கை பாதுகாப்புக் குழுவை சேர்ந்தவர்கள் நேற்று மதுரையில் மாநில அளவிலான கருத்தரங்கத்தை நடத்தினார்கள்.


அதில் இயற்றப்பட்ட தீர்மானங்களை பற்றி நம்மிடம் நிர்வாகிகள் ஜெகன், பேராசிரியர் இரா.முரளி கூறும்போது, ''இயற்கை வள கொள்ளைகள், ஹைட்ரோ கார்பன், நீயூட்ரினோ, அணுசக்தி எடுப்பு போன்ற பேரழிவுத் திட்டங்கள், பாதரசத் தொழிற்சாலை,தாமிர உருக்காலை என்று கடுமையாக மாசுபடுத்தும் தொழிற்சாலைகள் எனப் பல செயல்பாடுகள் தமிழகத்தில் தொடர்ந்து நடைபெற்று வருகின்றன. விவசாயிகள், மீனவர்கள், பழங்குடியினர், பட்டியலின மக்களின் வாழ்வாதரங்களைச் சீர்குலைக்கும் பல திட்டங்கள் வளர்ச்சி என்ற பெயரில் செயல்படுத்தப்பட்டு வருகின்றன.

நன்றி
விகடன்

பாதிக்கப்படும் மக்கள் இதுபோன்ற திட்டங்களை எதிர்த்துப் போராடி வருகிறார்கள். எங்களுடைய கருத்தரங்கு மூலமாக மத்திய, மாநில அரசுகளுக்கு சில கோரிக்கைகளை முன்வைக்கிறோம். நெடுவாசல், கதிராமங்கலம் பகுதிகளிலும் இதுபோன்று மற்ற பகுதிகளில் செயல்படுத்தப்படும் அழிவுத்திட்டமான ஹைட்ரோகார்பன் எடுக்கும் திட்டங்களை உடனடியாக நிறுத்தவேண்டும். காவிரிப் படுகையை அழிக்கும் மீத்தேன்,ஷேல் வாயு எடுக்கும் ஓ.என்.ஜி.சியின் செயல்பாடுகளை நிறுத்த வேண்டும். காவிரிப்படுகையில் எந்தவித மீத்தேனும் எடுக்கக்கூடாது என அறிவிக்க வேண்டும். காவிரிப் படுகையை ‘பாதுகாக்கப்பட்ட வேளாண் மண்டலமாக’ அறிவிக்க வேண்டும். மீனவர்களின் வாழ்வாதாரத்தைப் பாதிக்கும் சாகர் மாலா திட்டம் பற்றி வெள்ளை அறிக்கையை மத்திய, மாநில அரசுகள் வெளியிட வேண்டும். அப்படி இல்லையெனில், கடற்புரங்களில் மாபெரும் மக்கள் போராட்டங்கள் வெடிக்க வாய்ப்புகள் உள்ளன.
ஸ்டெர்லைட் ஆலையினால் மக்களுக்கு ஏற்பட்டுள்ள பாதிப்புக்களைக் கணக்கெடுக்கவேண்டும். இந்த நச்சு ஆலையை உடனடியாக மூட அரசுகள் உத்திரவிடவேண்டும். இருபது ஆண்டுகளுக்கும் மேலாக கொள்ளையடித்து வரும் தாது மணல் கொள்ளையர்கள் மீதும், அதற்குத் துணை நின்றவர்கள் மீதும் கடுமையான நடவடிக்கை எடுக்க வேண்டும். இனி தமிழகத்தில், உள்நாட்டு மற்றும் வெளிநாட்டு நிறுவனங்கள் இயற்கை வளங்களை முன்வைத்து தொழில் தொடங்க விரும்பினால், அதை அப்பகுதி வாழ் மக்களிடமும், உண்மையான வல்லுனர்களின் ஒப்புதலைப் பெற்று செயல்படுத்தவேண்டும். இயற்கை பாதுகாப்புக் குழு தொடர்ந்து இயற்கை வள சீரழிவு திட்டங்கள் மற்றும் செயல்பாடுகள் குறித்து மக்களுக்கு பரப்புரை செய்யத் திட்டமிட்டுள்ளது. இந்த வகையில் சூழல் பாதுகாப்புப் பிரச்சினைகள் குறித்த நூல் ஒன்றை வெளியிடவிருக்கிறது'' என்றனர்.