நீதித்துறையில் தலையீடா? நீதிபதி குற்றச்சாட்டுக்கு மத்திய அரசு மறுப்பு

புதுடெல்லி,

நீதிபதி கடிதம்

சுப்ரீம் கோர்ட்டு நீதிபதி ஜே.செல்லமேஸ்வர், தலைமை நீதிபதி
தீபக் மிஸ்ராவுக்கு 6 பக்க கடிதம் ஒன்றை எழுதியுள்ளார்.

அதில், கர்நாடகாவில், பாலியல் புகாரில் சிக்கிய மாவட்ட நீதிபதி
பி.கிருஷ்ணா பட் என்பவரை கர்நாடக ஐகோர்ட்டு நீதிபதியாக
நியமிக்க 2 தடவை சுப்ரீம் கோர்ட்டு ‘கொலிஜியம்’ சிபாரிசு
செய்தும், மத்திய அரசு அதை நிராகரித்து விட்டதாக கூறியுள்ளார்.

மேலும், கிருஷ்ணா பட் மீதான பாலியல் புகாரை மீண்டும்
விசாரிக்கும்படி, கர்நாடக ஐகோர்ட்டு தலைமை நீதிபதிக்கு மத்திய
சட்ட அமைச்சகம் நேரடியாக உத்தரவிட்டதாகவும், இது
நீதித்துறையில் குறுக்கிடும் செயல் என்றும் ஜே.செல்லமேஸ்வர்
தெரிவித்துள்ளார்.

மத்திய அரசு மறுப்பு

இந்நிலையில், நீதிபதியின் குற்றச்சாட்டை மத்திய அரசு மறுத்துள்ளது.
இதுகுறித்து பெயர் குறிப்பிட விரும்பாத மத்திய அரசு உயர் அதிகாரிகள்
கூறியதாவது:-

நீதிபதிகள் பதவி உயர்வு, நீதிபதிகள் நியமனம் தொடர்பான வழிகாட்டு
நெறிமுறைகளில், இத்தனை நாட்களுக்குள் முடிவு எடுக்க வேண்டும்
என்று எதுவும் குறிப்பிடப்படவில்லை. எனவே, நாங்கள் பொறுமையாக
முடிவு எடுக்க உரிமை உள்ளது. அவசரப்பட்டு முடிவு எடுக்க முடியாது.

விசாகா என்பவரது வழக்கில், பாலியல் புகார் குறித்து சுப்ரீம் கோர்ட்டு
வகுத்த விதிமுறைகளை சுப்ரீம் கோர்ட்டு ‘கொலிஜியம்’
பின்பற்றாததால்தான், நீதிபதி கிருஷ்ணா பட் நியமனம் தொடர்பான
கோப்புகளை 2 தடவை திருப்பி அனுப்ப வேண்டியதாகி விட்டது.

அதாவது, பெண் நீதிபதியின் பாலியல் புகாரை ‘கொலிஜியம்’
கண்டுகொள்ளவில்லை.

தலையிடவில்லை

2-வது தடவை நாங்கள் அந்த கோப்பை திருப்பி அனுப்பியபோது,
அந்த பெண் நீதிபதி, பிரதமர் அலுவலகத்துக்கும், ஜனாதிபதி
மாளிகைக்கும் புகார் அனுப்பி இருந்தார். அந்த புகார்கள், மத்திய சட்ட
அமைச்சகத்துக்கு வந்து சேர்ந்தன. அவற்றை சம்பந்தப்பட்ட
துறைக்கு அனுப்பி, அதன் கருத்தை கேட்பது வழக்கமான நடைமுறை.

அதன்படி, கர்நாடக ஐகோர்ட்டு பதிவாளருக்கு அந்த புகார்களை
அனுப்பி, அவற்றை பரிசீலிக்குமாறு சட்டத்துறை கேட்டுக்கொண்டது.
புகார்கள் மீது விசாரணை நடத்துமாறு ஐகோர்ட்டு தலைமை
நீதிபதியை நாங்கள் கேட்டுக்கொள்ள முடியாது.

அந்த அதிகாரம் எங்களுக்கு இல்லை. எனவே, நாங்கள் நீதித்துறையில்
தலையிடவில்லை.

மேலும், நீதிபதி கிருஷ்ணா பட் நிரபராதி என்று முன்பு விசாரணை
அறிக்கை சமர்ப்பிக்கப்பட்டுள்ளது. அதில், பாதிக்கப்பட்ட பெண்
நீதிபதி, தனது குற்றச்சாட்டை விளக்க நியாயமான வாய்ப்பு
வழங்கப்பட்டதாக எந்த இடத்திலும் குறிப்பிடப்படவில்லை.
அதன்மூலம், அவரது புகாரை கண்டுகொள்ளாதது தெளிவாகிறது.

இவ்வாறு அவர்கள் கூறினர்.
-
----------------------------------
தினத்தந்தி

_________________