கந்தல் – கவிதை

**ayyasamy ram** · **ayyasamy ram** Wed Mar 14, 2018 7:59 pm

-
அண்ணனுக்கோ அப்பாவுக்கோ
வாங்கிய சட்டை
தம்பியை
உடுத்திக்கொள்கிறது
சில சமயம் அக்காவையும்
அல்லது தங்கையையும்கூட
–
பாப்பாவை தூங்கச்செய்கிறது
பாட்டியின் சேலை
அம்மாவின் கைகளில்
நுழைந்து
பாத்திரங்களின் சூடு
தாங்கும் அப்பாவின் பனியன்
அவ்வப்போது
சைக்கிளும் துடைக்கிறது
–
முக்கோணமாகவோ
சதுரமாகவோ
அல்லது தனக்கென்ற
உருவமில்லாத
மிச்சங்களை
திணித்துக்கொண்டு
தைக்கப்பட்ட
தம்பியின் டிராயர்
அப்பாவின் டியூசன்
கிளாசில் போர்டு துடைக்கிறது
–
அம்மாவின் காட்டன்
சேலையை கிழித்து செய்யப்பட்ட
அக்காவின் தாவணி
தங்கையைத் தழுவுகிறது
தலையணைக்கு உறையாகிறது
அவ்வப்போது கறையுமாகிறது.
–
————————–
– சுபா செந்தில்குமார்
குங்குமம்

krishnanramadurai · krishnanramadurai Wed Mar 14, 2018 8:31 pm

கந்தலை பயன்படுத்த மறந்தோம்
கிரெடிட் கார்டு, கந்துவட்டியால்
திளைத்தோம், பின் திகைத்தோம்
கந்தையை கசக்கி கட்டச்சொன்னாள் பாட்டி
கடனை பெறுவதில் நமக்குள் போட்டி
இப்படியே போனால்
நம் கதை கந்தல்.