சென்னையில் போலி எஸ்.ஐ. சிக்கினார்: 600 ரூபாய் செலவழித்து ரூ.65 ஆயிரம் வசூல்

600 ரூபாய் செலவழித்து 10 நாளில் போலீஸ் எஸ்.ஐ போல் ஜாம் பஜார்
பகுதியில் மாமுல் வாங்கி வலம் வந்த போலி போலீஸ் எஸ்.ஐ. கைது
செய்யப்பட்டார்.

சென்னை திருவல்லிக்கேணி காவல் மாவட்டத்துக்குட்பட்ட பகுதியில்
ஜாம் பஜார் காவல் நிலையம் உள்ளது. இப்பகுதியில் ஒருவர்
மிடுக்கான போலீஸ் உடையில் மோட்டார் பைக்கில் சென்று கடைகள்,
தள்ளுவண்டிகள், மார்க்கெட் பகுதிகளில் மாமுல் வாங்கியுள்ளார்.

சினிமாவில் வரும் போலீஸ் அதிகாரி போல் மிரட்டலுடன் போலீஸ்
என்று போட்ட மோட்டார் சைக்கிளில் அவர் வலம் வந்ததை பார்த்து
நிஜ போலீஸாரே சில இடங்களில் சல்யூட் அடித்துள்ளனர்.

போகும் இடமெல்லாம் உபசரிப்பு, மாமுல் என பத்து நாளில்
ரூ.65 ஆயிரம் வரை அந்த 'அதிகாரி' வசூல் செய்துள்ளார்.

எஸ்.ஐ ஒருவர் சுற்றி சுற்றி வருவதும் பொதுமக்கள், வியாபாரிகளை
மிரட்டி மாமுல் வாங்குவதும் ஜாம் பஜார் போலீஸாருக்கு புகாராகப்
போனது. யார் வருகிறார்? என்று வண்டி நம்பரை பார்த்துச்
சொல்லுங்கள் என்று கூற வாகன எண்ணை வியாபாரிகள் குறித்துக்
கொடுத்துள்ளனர்.

அப்படிப்பட்ட வாகனம் எதுவும் ஜாம் பஜார் போலீஸ் ஸ்டேஷனில்
இல்லையே என்று போலீஸார் அந்த நபரை விசாரிக்கக்
காத்திருந்தனர்.

அந்த நபர் அருகிலுள்ள ஒரு ஓட்டலில் தங்கியிருப்பது தெரிய வந்தது.
ஓட்டலில் சென்று விசாரித்தபோது எஸ்.ஐ. அய்யாவா இங்குதான்
தங்கியுள்ளார் என்று அவர் தங்கியிருந்த அறையை காண்பித்துள்ளனர்.

உள்ளே சென்ற போலீஸார் அவரை மடக்கிப் பிடித்தனர். பின்னர்
அவர் யார் என்று விசாரித்தபோது ஸ்பெஷல் டூட்டியில் வந்துள்ள
எஸ்.ஐ. என்று மழுப்பியுள்ளார்.

பின்னர் போலீஸ் பாணியில் விசாரித்த போது அவர் போலி போலீஸ்
எஸ்.ஐ. என தெரிய வந்துள்ளது.

அவரைப் பிடித்து வெளியே இழுத்து வரும்போது தான் ஓட்டல்
நிர்வாகத்துக்கே அவர் போலி எஸ்.ஐ. என தெரிய வந்தது. சார் ஓட்டல்
ரூம் வாடகை பாக்கியே ரூ.12,000 தரவேண்டும் என மேனேஜர்
போலீஸாரிடம் கூறியுள்ளார்.

அந்த நபரை ஸ்டேஷனுக்கு அழைத்து வந்த போலீஸார் அவரிடம்
விசாரணை நடத்தியதில் அவர் பெயர் அஷோக் (28) கோயம்புத்தூர்,
பெரியபாளையத்தைச் சேர்ந்தவர் என தெரிய வந்தது.

10-ம் வகுப்பு வரை மட்டுமே படித்த தனக்கு போலீஸில் சேர்ந்து
சேவை செய்ய வேண்டும் என்று ஆசை, ஆனால் படிப்பு குறைவு
என்பதால் மூர் மார்க்கெட் பக்கம் சென்று ரூ.600-க்கு போலீஸ்
உடை, ஷூ, எஸ்.ஐ. பெல்ட், 2 ஸ்டார் போன்றவற்றை வாங்கி வந்து
போலீஸ் எஸ்.ஐ. போல் நடிக்க ஆரம்பித்தேன்.

எஸ்.ஐ. என்றவுடன் ரூம் வாடகை கூட கேட்காமல் உடனடியாக
தங்க இடம் கிடைத்தது. பார்ப்பதற்கு நேரடியாக பயிற்சி முடித்து
வந்த எஸ்.ஐ. போலிருந்ததால் போலீஸார் கூட சில சமயம் சல்யூட்
அடித்தனர், இதைப் பார்த்தவுடன் ஆசை வந்தது.

தினமும் இரவு 2 மணிக்கு மேல் ரோந்து கிளம்புவேன். வழியில் சில
இடங்களில் வாகன சோதனை கூட செய்துள்ளேன் என்று கூறியுள்ளார்.

போலீஸாக சேவை செய்வது என்றால் உடுப்பு போட்டு மாமுல்
வாங்குவதா? என்று போலீஸார் கேட்டு எவ்வளவு மாமுல்
வாங்கியிருப்பாய் என்று கேட்டதற்கு 10 நாளில் ரூ.65 ஆயிரம் வரை
வசூல் வந்துள்ளது என்று தெரிவித்த அஷோக் போலீஸ் என
நம்புவதற்காக தனது பெயருடன் அஷோக் பாண்டியன் என்று
சேர்த்து நேம் பேட்ஜ் அணிந்துள்ளார்.

வேறு என்ன செய்வாய்? என்று கேட்டபோது மாலையில் மெரினா
கடற்கரைக்கு செல்வேன், அங்கு காதலர்கள் பொதுமக்களுக்கு
இடையூறாக அமர்ந்திருப்பதைப் பார்த்து வெறுப்பாக இருக்கும்.

அவர்களை விரட்டுவதையே தினமும் செய்து வந்துள்ளேன்,
ஆனால் அவர்களிடம் மாமுல் எதையும் வாங்கவில்லை என்று
கூறியுள்ளார்.

அஷோக்கை கைது செய்த போலீஸார் அவர் மீது மோசடி,
ஆள்மாறாட்டம் உள்ளிட்ட பிரிவுகளின் கீழ் வழக்குப் பதிவு
செய்துள்ளனர்.
-
---------------------------------------
தி இந்து