முதியோர் இல்லத்தில் உயிரிழப்பவர்களின் உடல்கள் பணத்திற்காக விற்பனை: ஜனவரியில் மட்டும் 60 பேர் உயிரிழந்த அவலம்

காஞ்சிபுரம்:
காஞ்சிபுரம் மாவட்டம் பாலேஸ்வரத்தில் செயல்பட்டு வரும்
ஆதரவற்றோர் இல்லத்தில் உயிரிழப்பவர்களின் உடல்களை
பணத்திற்காக விற்பனை செய்வதாக புகார் எழுந்துள்ள
நிலையில், அந்த இல்லத்தில் சோதனை நடைபெற்று வருகிறது.

பாலேஷ்வரம் செயின்ட் ஜோசப் ஆதரவற்றோர் இல்லத்தில்
மாதந்தோறும் 40 முதல் 50 பேர் வரை மர்மமான முறையில்
மரணமடைவதாக புகார் எழுந்தது. அதன் அடிப்படையில்
கோட்டாட்சியர் ராஜுவின் தலைமையில் சமூக நலம்,
சுகாதாரம், காவல் மற்றும் வருவாய்த்துறை அதிகாரிகள்
80-க்கும் மேற்பட்டோர் அந்த ஆதரவற்றோர் இல்லத்தில் ஆய்வு
மேற்கொண்டு வருகின்றனர்.

கடந்த ஜனவரியில் மட்டும் அந்த இல்லத்தில் 60 பேர்
உயிரிழந்திருப்பதாக ஆய்வில் தெரியவந்துள்ளது. ஆதரவற்றோர்
இல்லத்தில் இறப்பவர்களின் விவரங்கள் குறித்து முறையான
தகவலை நிர்வாகம் தரவில்லை எனவும் ஆதரவற்றவர்களை
கொன்று உடல் உறுப்பு மற்றும் எலும்புகளை கடத்துவதாக எழுந்த
புகாரின்பேரில் தற்போது சோதனை நடைபெற்று வருகிறது.

அதிகாரிகளுக்கு தெரிந்தது எப்படி?
-
செங்கல்பட்டு அருகே சாலவாக்கத்தில் பார்ப்பதற்கு ஆம்புலன்ஸ்
போல் வடிவமைக்கப்பட்டிருந்த டாடா ஏஸ் வாகனம் ஒன்று
அதிவேகத்தில் சென்றுள்ளது. அதிலிருந்த மூதாட்டி ஒருவர் உதவி
கேட்டு அலறியுள்ளார்.

இதனை பார்த்த அப்பகுதி மக்கள் அந்த வாகனத்தை அதிரடியாக
மடக்கி நிறுத்தினர். பொதுமக்கள் வாகனத்தை நிறுத்தியதும்
ஓட்டுநர் வாகனத்தை நிறுத்திவிட்டு தப்பி ஓடியதால்
அங்கிருந்தவர்களுக்கு சந்தேகம் எழுந்துள்ளது. பின்னர் சத்தமிட்ட
மூதாட்டியை மீட்டு காவல்துறைக்கு தகவல் தெரிவித்தனர்.

சாப்பாடு தருவதாக கூறி செயின்ட் ஜோசப் கருணையில்லத்துக்கு
கடத்தி செல்வதாக மூதாட்டி தெரிவித்தார். இதனையடுத்து
ஆம்புலன்ஸை திறந்து பார்த்தபோது, மேலும் அதிர்ச்சி காத்திருந்தது.

அதில் துணியால் கட்டப்பட்ட சடலத்துக்கு அருகில் முதியவர் ஒருவர்
படுத்திருந்தார். போலி ஆம்புலன்ஸ், துணியால் சுற்றப்பட்ட சடலம்,
கடத்தப்பட்ட மூதாட்டி உள்ளிட்டவற்றை பார்த்த போலீசாருக்கு
சந்தேகம் ஏற்பட்டுள்ளது.

இதனையடுத்து திண்டுக்கல், இரும்புலியூர், பாலேஸ்வரம், வேலூர்
ஆகிய இடங்களில் உள்ள செயின்ட் ஜோசப் கருணை இல்லத்துக்கு
அதிகாரிகள் படை விரைந்து சென்று சோதனை நடத்தி வருகின்றனர்.
-
----------------------------------------
தினகரன்