தமிழக அரசு பள்ளிகளில் சீருடை மாற்றம் ; அமைச்சர் தகவல்

சென்னை:
அரசுப் பள்ளிகளில் 8ம் வகுப்பு படிப்போருக்கு வழங்கப்படும்
சீருடை போல 9ம் வகுப்பு முதல் பிளஸ் 2 வகுப்புக்கு வரை
படிக்கும் மாணவர்களுக்கும் சீருடை வழங்கப்படும் என்று
பள்ளிக் கல்வித்துறை அமைச்சர் செங்கோட்டையன்
தெரிவித்தார்.

பள்ளிக் கல்வித்துறையின் கீழ் இயங்கும் பள்ளிகளில் 2016-2017ம்
ஆண்டுக்கான சிறந்த தொடக்க நடுநிலைப் பள்ளிகளுக்கு சுழல்
கேடயம் வழங்குதல், விடுமுறையே எடுக்காமல் 100 சதவீதம்
வருகை தந்த ஆசிரியர்களுக்கு சான்றிதழ் வழங்கும் நிகழ்ச்சி
சென்னை அண்ணா நூற்றாண்டு நினைவு நூலகத்தில் நேற்று ந
டந்தது.

இந்த விழாவில் பள்ளிக் கல்வித்துறை அமைச்சர்
செங்கோட்டையன் கலந்து கொண்டு 96 பள்ளிகளுக்கு கேடயம்,
51 ஆசிரியர்களுக்கு சான்றிதழும் வழங்கினார். அப்போது அவர்
பேசியதாவது:

பிளஸ் 2 முடித்த பிறகு வேலை வாய்ப்பு உறுதி செய்யும் வகையில்
பாடத்திட்டமும் தயாரிக்கப்படுகிறது. இந்நிலையில், பள்ளி
மாணவர்களுக்கான சீருடையில் மாற்றங்களை கொண்டு வர
உள்ளோம். ஏற்கெனவே 1 முதல் 8ம் வகுப்பு வரை படிக்கும்
மாணவர்களில் சத்துணவு சாப்பிடும் மாணவர்களுக்கு இலவச
சீருடை வழங்கப்படுகிறது.

அதற்கான துணி கோஆப்டெக்ஸ் மூலம் பெறப்படுகிறது.
இந்நிலையில் 9,10ம் வகுப்புக்கும், பிளஸ் 1 , பிளஸ் 2
வகுப்புகளுக்கும் இரண்டு நிறத்தில் சீருடை வழங்கப்படும்.
இந்த சீருடைக்கான துணி, தனியார் நிறுவனங்களில் இருந்து
பெறப்படும். அப்படி பெறும் போது 20 முதல் 30 சதவீதம் தள்ளு
படியில் பெறலாம்.

மொத்தமாக பார்க்கும் போது 1 முதல்5, 6 முதல் 8, 9,10ம் வகுப்புகள்,
பிளஸ்1, பிளஸ் 2 வகுப்புகள் என்று நான்கு பிரிவுகளாக சீருடைகள்
பிரிக்கப்பட்டு, நான்கு நிறத்தில் வழங்கப்படும்.
இவ்வாறு தெரிவித்தார்.
-

துணி தைக்க பணம்:

அமைச்சர் செங்கோட்டையன் பேசுகையில், தற்போது
உயர்வகுப்புகளுக்கு என்று இரண்டு சீருடை வழங்கப்பட உள்ளது.
குறைந்த செலவில் வழங்கவும் ஏற்பாடு செய்துள்ளோம்.
1 முதல் 8ம் வகுப்புவரை உள்ள சீருடையில் முன்பு இ ருந்த
நிறத்தில் ஒன்றும், மஞ்சள் நிறத்தில் ஒரு சீருடையும்
வழங்கப்படும். சீருடை தைப்பதில் அளவு வேறுபாடு
உள்ளதால், அடுத்த ஆண்டு முதல் ரொக்கமாக கொடுப்பது
குறித்தும் ஆலோசித்து வருகிறோம் என்றார்.
-

-------------------------------------------
தினகரன்