மதிப்பெண் முறைகேடு புகார் எதிரொலி: பாலிடெக்னிக் விரிவுரையாளர் தேர்வு திடீர் ரத்து- ஆசிரியர் தேர்வு வாரியம் நடவடிக்கை

மதிப்பெண் முறைகேடு புகார் எதிரொலி: பாலிடெக்னிக் விரிவுரையாளர் தேர்வு திடீர் ரத்து- ஆசிரியர் தேர்வு வாரியம் நடவடிக்கை
-
கடந்த செப்டம்பர் 16-ம் தேதி நடத்தப்பட்ட அரசு பாலிடெக்னிக் விரிவுரையாளர் தேர்வு முடிவு ரத்து செய்யப்படுவதாக ஆசிரியர் தேர்வு வாரியம் அறிவித்துள்ளது. மதிப்பெண் முறைகேடு புகார் தொடர்பாக இந்த நடவடிக்கை எடுக்கப்பட்டுள்ளது.

தமிழகத்தில் உள்ள அரசு பாலிடெக்னிக் கல்லூரிகளுக்கு 1,058 விரிவுரையாளர்களை நேரடி யாகத் தேர்வு செய்வதற்காக கடந்த ஆண்டு செப்டம்பர் மாதம் 16-ம் தேதி போட்டித்தேர்வு நடத்தப்பட்டது. ஆசிரியர் தேர்வு வாரியம் நடத்திய இந்த தேர்வை 1 லட்சத்து 33,567 பேர் எழுதினர். தேர்வுக்கான உத்தேச விடைகள் கடந்த அக்டோபர் 6-ம் தேதி வெளியானது.

அதைத்தொடர்ந்து, தேர்வு முடிவு கடந்த நவம்பர் மாதம் 7-ம் தேதி வெளியானது. தேர்வில் தேர்ச்சி பெற்ற பொறியியல் அல்லாத பாடப்பிரிவினருக்கு (ஆங்கிலம், கணிதம், இயற்பியல் வேதியியல்) நவம்பர் இறுதி வாரத்தில் சான்றிதழ் சரிபார்ப்பு நடத்தப்பட்டது. பொறியியல் பாடப்பிரிவினருக்கு (சிவில், மெக்கானிக்கல் இன்ஜினீயரிங் போன்றவை) சான்றிதழ் சரிபார்ப்பு நடைபெறவில்லை.

இந்நிலையில், விரிவுரையா ளர் தேர்வு முடிவை டிசம்பர் மாதம் 11-ம் தேதி திடீரென ஆசிரியர் தேர்வு வாரியம் வாபஸ் பெற்றது. தேர்வர்களின் ஸ்கேன் செய்யப்பட்ட விடைத்தாள்களை (ஓஎம்ஆர் ஷீட் நகல்) இணையதளத்தில் வெளியிட்டது.

இந்தச் சூழலில் முதலில் வெளியான தேர்வு முடிவுகளின்படி 130, 139, 146, 149 என அதிக மதிப்பெண் எடுத்து சான்றிதழ் சரிபார்ப்புக்கு தகுதிபெற்ற பலரின் மதிப்பெண் 45, 48, 54 என குறைந்ததும் ஏறத்தாழ 200 பேரின் மதிப்பெண்ணில் குளறுபடிகள் ஏற்பட்டிருப்பதும் தெரியவந்தது.

இதுதொடர்பான தகவல்கள் சமூக வலைத்தளங்களில் ஆதாரத்தோடு பரவின. இதைத்தொடர்ந்து, பாலிடெக்னிக் விரிவுரையாளர் தேர்வில் முறைகேடுகள் நடந்திருப்பதாகவும் எனவே தேர்வை ரத்து செய்ய வேண்டும் என்று அரசியல் கட்சிகள் போர்க் கொடி உயர்த்தின.

அடுத்தடுத்து பலர் கைது

இதற்கிடையே, மதிப்பெண் குளறுபடி தொடர்பாக சென்னை மத்திய குற்றப்பிரிவு போலீஸில் ஆசிரியர் தேர்வு வாரியம் சார்பில் புகார் அளிக்கப்பட்டது. போலீஸ் விசாரணை தீவிரமாக நடந்து வந்த நிலையில், முறைகேடு தொடர்பாக அடுத்தடுத்து ஏராளமானோர் கைதானார்கள். எனவே, வழக்கு விசாரணை முடிவடைந்ததும் புதிதாக தேர்வு முடிவுகள் வெளியிடப்படும் என்று தேர்வர்கள் எதிர்பார்த்து வந்தனர். இந்த நிலையில், ஆசிரியர் தேர்வு வாரியம் விரிவுரையாளர் தேர்வை ரத்து செய்வதாக நேற்று அறிவித்தது.

இதுதொடர்பாக ஆசிரியர் தேர்வு வாரியத்தின் தலைவர் சீனிவாசன் நேற்று வெளியிட்ட செய்திக்குறிப்பில் கூறியிருப்ப தாவது:

அரசு பாலிடெக்னிக் விரிவுரையாளர் நேரடி நியமனத்துக்காக கடந்த செப்டம்பர் 16-ம் தேதி நடத்தப்பட்ட எழுத்துத்தேர்வு ரத்து செய்யப்படுகிறது. இந்தத் தேர்வுக்கான விளம்பரம் (புதிய அறிவிக்கை) மே முதல் வாரத் தில் வெளியிடப்பட்டு ஆகஸ்ட் முதல் வாரத்தில் தேர்வு நடத்தப்படும்.

இத்தேர்வுக்கு ஆன்லைன் மூலம் விண்ணப்பிக்க வேண்டிய தேதி மற்றும் தேர்வு நாள் விரை வில் அறிவிக்கப்படும். ஏற்கெனவே வெளியிடப்பட்ட விளம்பரத்தின்படி விண்ணப்பித்த தேர்வர்கள் மீண்டும் விண்ணப்பிக்க வேண்டும். ஆனால், அவர்கள் தேர்வுக்கட்டணம் செலுத்த தேவையில்லை. அதே நேரம் புதிய விண்ணப்பதாரர்களும் தேர்வுக்கு விண்ணப்பிக்கலாம். இவ்வாறு அவர் கூறியுள்ளார்.

தேர்வு முடிவு ரத்து செய்யப்படுவது ஆசிரியர் தேர்வு வாரிய வரலாற்றில் இதுவே முதல்முறை என்பது குறிப்பிடத்தக்கது.
--------------
தி இந்து