ராஜ்யசபாவை புறக்கணித்த எதிர்க்கட்சிகள்

பிப்-6
புதுடில்லி:
நிர்வாக பிரச்னைகளை எழுப்பவும், பேசவும், அவை தலைவர்
அனுமதி மறுப்பதாக கூறி, ராஜ்யசபாவை எதிர்க்கட்சிகள்
புறக்கணித்து, வெளிநடப்பு செய்தன.

ராஜ்யசபா இன்று துவங்கியதும், மேற்கு வங்க அரசின்
நிர்வாகத்தில் கவர்னர் தலையிடுவதாக கூறி திரிணமுல்
காங்கிரஸ் எம்.பி., டெரிக் ஓ பிரையன் நோட்டீஸ் அளித்தார்.

தெலுங்கு தேசம் மற்றும் அகாலிதள கட்சி எம்.பி.,க்களும்
நோட்டீஸ் அளித்திருந்தனர்.

இந்த நோட்டீசை அவை தலைவரான வெங்கையா நாயுடு
நிராகரித்தார். இதனால், அமளி ஏற்பட அவையை பிற்பகல்
2 மணி வரை ஒத்திவைத்தார்.

தொடர்ந்து 2 மணிக்கு அவை கூடிய போது அமளி ஏற்பட்டதால்,
மீண்டும் ஒத்திவைக்கப்பட்டது. இதனால், அதிருப்தியடைந்த
எதிர்க்கட்சிகள், பிரச்னைகள் குறித்து கேள்வி எழுப்பவும்,
பேசவும் ராஜ்யசபாவில் அனுமதி வழங்கப்படவில்லை எனக்கூறி,
அவையை புறக்கணித்து வெளிநடப்பு செய்தனர்.

இதில், காங்கிரஸ், சமாஜ்வாதி, இந்திய கம்யூனிஸ்ட், மார்க்சிஸ்ட்
கம்யூனிஸ்ட், தேசியவாத காங்கிரஸ், திமுக ஆகியவை கலந்து
கொண்டன.

தொடர்ந்து எதிர்க்கட்சி தலைவர்கள் ஆலோசனை நடத்தினர்.
தொடர்ந்து, ஜனநாயகம் படுகொலை செய்யப்படுவதாக
அக்கட்சிகள் குற்றம்சாட்டியுள்ளன.

அனுமதியில்லை

குலாம் நபி ஆசாத் கூறுகையில், எதிர்க்கட்சிகளின் குரல்
ஒடுக்கப்பட்டது. இதனை நடக்க அனுமதிக்க மாட்டோம் எனக்
கூறினார்.

காங்கிரஸ் எம்.பி., ஆனந்த் சர்மா கூறியதாவது:
இது ஜனநாயகத்திற்கு எதிரானது. இது தொடர்பாக அவை
தலைவரிடம் எழுத்துப்பூர்வமாக புகார் கூறியுள்ளோம்.
நாட்டின் பல்வேறு பகுதிகளில் இருந்து வந்த எம்.பி.,க்கள்
அவையில் பேச அனுமதிக்கப்படவில்லை எனக்கூறினார்.

சமாஜ்வாதி கட்சி எம்.பி., நரேஷ் அகர்வால் கூறுகையில்,
ராஜ்யசபா நடத்தப்படும் விதமானது, எதிர்க்கட்சிகளின்
குரலை முற்றிலும் ஒடுக்கும் வகையில் உள்ளது.
மக்களின் குரலை அமைதியாக்க பார்க்கின்றனர்.
இதனால், பார்லிமென்ட் நடப்பதால் என்ன பயன் என கேள்வி
எழுப்பினார்.
-
------------------------------------------
தினமலர்