திரையிசையில் சங்கத்தமிழ்.

Guest · Guest Sun Feb 04, 2018 12:11 am

சிவா படத்தில் புலமைப்பித்தன் வரிகளில் அடி வான்மதி………...என்ற பாடல். பாடியவர்கள்: எஸ். பி. பாலசுப்ரமணியம், கே. எஸ். சித்ரா.

கோடைக் காலங்களில், குளிர் காற்று நீயாகிறாய்,
வாடை நேரங்களில், ஒரு போர்வை நீயாக வந்தாய்!

வெம்மையையுடைய வேனிலில் தண்ணியளாகவும் குளிர் மிகுதியை யுடைய பனிக்காலத்தில் சிறுவெம்மையளாகவும் தலைவியிருத்தலின், எக்காலத்தும் அணைதற்கு இனியளானாள்.

இணையத்தில் தேடிய போது கிடைத்த இந்தப் பொருளில் வரும் …..குறுந்தொகைப் (நெய்தல்) பாடல்.

மன்னுயி ரறியாத் துன்னரும் பொதியிற்

சூருடை யடுக்கத் தாரங் கடுப்ப

வேனி லானே தண்ணியள் பனியே

வாங்குகதிர் தொகுப்பக் கூம்பி யையென

அலங்குவெயிற் பொதிந்த தாமரை

பாடல் 376:நெஞ்சே, மன் உயிர் அறியா - நிலைபெற்ற உயிர்த் தொகுதியினரால் முற்ற அறியப்படாத, துன் அரு பொதியில் - அணுகுதற்கரிய பொதியில் மலையிலுள்ள, சூர்உடை அடுக்கத்து - தெய்வங்களையுடைய பக்கத்தில்வளர்ந்த, ஆரம் கடுப்ப - சந்தனத்தைப்போல, வேனிலானே - வேனிற்காலத்தில், தண்ணியள் - இத்தலைவி குளிர்ச்சியையுடையாள், பனி - பனிக்காலத்தில், வாங்கு கதிர் - அடக்கிக்கொண்ட சூரியனுடைய கதிர்கள், தொகுப்ப - மறைய,கூம்பி - குவிந்து, ஐயென - அழகிதாக, அலங்கு வெயில் - அசைகின்ற வெயிலை, பொதிந்த தாமரை - உட்பொதிந்ததாமரை மலரின், உள் அகத்து அன்ன - உள்ளிடத்தைப்போன்ற, சிறு வெம்மையள் - சிறிய வெம்மையை உடையாள்.

நன்றி-உ.வே.சா.உரை

தமிழ் அறிஞர்கள் தவறிருந்தால் சுட்டிக் காட்டவும். நன்றி.

Guest · Guest Sun Feb 04, 2018 9:56 pm

வீரபாண்டிய கட்டப்பொம்மன் படத்தில் கு.மா.பாலசுப்பிரமணியம் எழுதிய பாடலை இரத்தினமாலா பாடியிருக்கிறார்.இசை ஜி.இராமனாதன்.

புற நானூற்றுப் பாடல் இது……...

காலனுங் காலம் பார்க்கும் பாராது
வேலீண்டு தானை விழுமியோர் தொலைய
வேண்டிடத் தடூஉம் வெல்போர் வேந்தே

திசையிரு நான்கு முற்க முற்கவும்
பெருமரத், திலையி னெடுங்கோடுவற்றல் பற்றவும்
வெங்கதிர்க் கனலி துற்றவும் பிறவும்
அஞ்சுவரத் தகுந புள்ளுக்குர லியம்பவும்
எயிறுநிலத்து வீழவு மெண்ணெ யாடவும்
களிறுமேல் கொள்ளவுங் காழக நீப்பவும்
வெள்ளி நோன்படை கட்டிலொடுகவிழவும்

கனவி னரியன காணா நனவிற்
செருச்செய் முன்பநின் வருதிற னோக்கி
மையல் கொண்ட வேமமி லிருக்கையர்
புதல்வர் பூங்கண் முத்தி மனையோட
கெவ்வங் கரக்கும் பைதன்மாக்களொடு
பெருங்கலக் குற்றன்றாற் றானே காற்றோ
டெரிநிகழ்ந் தன்ன செலவிற்
செருமிகு வளவநிற் சினைஇயோர் நாடே.

தீக் கனா - எட்டுத் திசைகளிலும் எரிமீன் விழுதல், பச்சை மரம் பற்றி எறிதல், சூரியன் விழுங்கல், அச்சம் தரும் பறவைகள் ஒலித்தல், பல் நிலத்தில் விழுதல் ,தலையில் எண்ணெய் தேய்த்துக் குளித்தல், யானை அடங்காமை, மேலாடை கீழே விழுதல் ,அரியணை கவிழ்தல் ,

இப்படியெல்லாம் கனவு காணும்படி நனவிலேயே போரிடும் வல்லமை உடையவன் நீ. இப்படி நீ வருவதைப் பார்த்த பகைவர் தன் மகனை முத்தமிட்டுக்கொண்டு மனைவி முன் தன் கண் கலங்குவதை மறைத்துக்கொண்டு நிற்பர். காற்றும் செருப்பும் வீசுவது போல பகை நாட்டின்மீது நீ செல்வாய்.

நன்றி-உ.வே.சா. உரை/ முனைவர் பிரபாகரன்,மேரிலண்ட்,USA.

திரையிசையில் சங்கத்தமிழ்.

திரையிசையில் சங்கத்தமிழ்.

Re: திரையிசையில் சங்கத்தமிழ்.

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக