பொன்னி அரிசி 25 கிலோவுக்கு ரூ.400 வரை குறைந்தது : வேலூர், ஆரணி மார்க்கெட்டில் அரிசி விலை கடும் சரிவு

வேலூர்: வேலூர் மற்றும் ஆரணி மார்க்கெட்டில் அரிசி விலை கடும் சரிவை கண்டுள்ளதால் பொதுமக்கள் மகிழ்ச்சியடைந்துள்ளனர். பொன்னி அரிசி 25 கிலோவுக்கு ரூ.400 வரை குறைந்துள்ளது.தமிழகத்தில் நடப்பு சீசனில் பருவ மழை தொடர்ந்து பெய்தது. இதன் மூலம் விவசாய பணிகளும் தீவிரமாக நடந்து வருகிறது. தற்போது நெல் அறுவடை தீவிரமாக நடந்து வருகிறது. இதனால் மார்க்கெட்டுக்கு நெல் வரத்து அதிகரித்துள்ளது. இதனால் டிசம்பர் வரை உச்சத்தில் இருந்து நெல் மற்றும் அரிசி விலை சரிவு காண தொடங்கியது.
வேலூர், திருவண்ணாமலை மாவட்டங்களின் பிரதான நெல், அரிசி சந்தையான ஆரணி சந்தையில் நெல் வரத்தும், அரிசி வரத்தும் அதிகரித்துள்ளது. இங்கு திருவண்ணாமலை, செய்யாறு, வந்தவாசி, சேத்துப்பட்டு, விழுப்புரம் மாவட்டம் செஞ்சி வட்டாரங்களில் இருந்து அரிசி ஆலைகளுக்கு அதிகளவில் நெல்வரத்து உள்ளது. இதன் மூலம் கடந்த மாதமே நெல், அரிசி விலை சரிவை கண்டது.
நேற்றைய நிலவரப்படி ஆரணி சந்தையில் 25 கிலோ எடை கொண்ட வெள்ளை பொன்னி புதியது ஒரு சிப்பம் ரூ.1,000 முதல் 1,100 வரையும், ஏடிடி 45 ரகம் புதியது ஒரு சிப்பம் ரூ.700 ஆகவும், பிபிடி புதியது ஒரு சிப்பம் ரூ.850 முதல் ரூ.950 ஆகவும் விற்பனை செய்யப்படுகிறது.
பழைய ரகம் வெள்ளை பொன்னி ரூ.1,300 முதல் ரூ.1,350 ஆகவும், ேசானா பச்சரிசி ரூ.1,250 முதல் ரூ.1,300 ஆகவும், பிபிடி ரூ.1,100 முதல் ரூ.1,200 ஆகவும் விற்பனை செய்யப்படுகிறது. 75 கிலோ எடை கொண்ட வெள்ளை பொன்னி நெல் ஒரு மூட்டை ரூ.1,300 முதல் ரூ.1,600 ஆகவும், ஏடிடி45 நெல் ரூ.1,050 ஆகவும், பிபிடி ரூ.1,400 முதல் ரூ.1,500 ஆகவும் விற்பனை ஆகிறது.
ஆரணி சந்தையில் நிலவும் விலையே பெரும்பாலும் வேலூர் சந்தையிலும் காணப்பட்டது. அதன்படி, வேலூர் அரிசி மார்க்கெட்டில் ₹1,400 வரை விற்கப்பட்ட புதிய வெள்ளை பொன்னி 25 கிலோ எடை கொண்ட ஒரு சிப்பம் ரூ.1,000 க்கும், டீலக்ஸ் பொன்னி ரூ.850 க்கும், ரூ.1,200 க்கு விற்ற பிபிடி 950க்கும் விற்கப்படுகிறது. ரூ.1,100 க்கு விற்ற கர்நாடக சோனா பச்சரிசி ரூ.950 க்கும், ரூ.1,100 க்கு விற்ற ஸ்டீம் அரிசி ரூ.1,100 க்கும், ₹800 க்கு விற்பனை செய்யப்பட்ட ஏடிடி 45 அரிசி ரூ.700 க்கும் விற்பனை செய்யப்படுகிறது.இதுகுறித்து ஆரணி நெல், அரிசி வியாபாரிகள் சங்க நிர்வாகி ஏ.எஸ்.கே.குமார் கூறும்போது, ‘ஆலைகளுக்கு நெல் வரத்து தொடர்ந்து அதிகரித்து வருகிறது. இதனால் அரிசி விலையில் மேலும் சரிவு ஏற்படும்’ என்றார்.
நன்றி
தினகரன்