சேலம்-சென்னைக்கு விரைவில் விமான சேவை : பிப்ரவரியில் கனவு நனவாக வாய்ப்பு

சேலம்: சேலத்தில் இருந்து சென்னைக்கு விரைவில் நிரந்தர விமான சேவை தொடங்க வாய்ப்புள்ளதாக அதிகாரிகள் தெரிவித்துள்ளனர். சேலம் மாவட்டம் ஓமலூர் அருகே காமலாபுரத்தில், கடந்த 1993ம் ஆண்டு விமான நிலையம் அமைக்கப்பட்டது. இங்கு ரன்வே 6 ஆயிரம் அடி தூரம் மட்டுமே உள்ளதால், சிறிய ரக விமானங்கள் மட்டுமே இயங்கும் சூழல் உள்ளது. இதனிடையே, சேலத்தில் இருந்து 2 முறை தனியார் நிறுவனங்கள் மூலம், சென்னைக்கு விமான சேவை தொடங்கப்பட்டது. ஆனால் பயணிகளிடையே போதிய வரவேற்பு இல்லாததால், ஒரு சில மாதங்களில் விமான சேவை நிறுத்தப்பட்டது. இந்நிலையில் சிறு விமான நிலையங்களுக்கு உயிரூட்டும் வகையில், மத்திய அரசு உதான் திட்டத்தை கொண்டு வந்தது. இதன் மூலம், விமான சேவைகளில் ஏற்படும் நஷ்டத்தை மத்திய அரசு 80 சதவீதமும், மாநில அரசு 20 சதவீதமும் ஏற்று கொள்ள வழி வகை செய்யப்பட்டது.

அதன்படி, ஒடிஷா நிறுவனத்திற்கு சென்னையில் இருந்து நெய்வேலிக்கும், சேலத்தில் இருந்து புதுச்சேரி வழியாக சென்னைக்கும், விமான சேவை இயக்க அனுமதி அளிக்கப்பட்டது. இதனால் வியாபாரிகள் மற்றும் தொழில் அதிபர்கள் மகிழ்ச்சி அடைந்தனர். நிரந்தர விமான சேவை தொடங்கினால் ஜவுளி வியாபாரம், சிறு, குறுந்தொழில்கள் மேம்படும். மாணவர்களின் நீண்டநாள் கனவான சேலம் தொழில் நுட்பபூங்காவில் கிளைகள் தொடங்க பிரசித்தி பெற்ற கம்ப்யூட்டர் நிறுவனங்கள் முன்வரும் என்ற எதிர்பார்ப்பு அதிகரித்தது. மாநில அரசுகளுடன் புரிந்துணர்வு ஒப்பந்தம் உள்பட அனைத்து பணிகளும் முடிந்த நிலையில், பெரும்பாலான விமான நிலையங்களில், கடந்த செப்டம்பர் மாதத்தில் விமான சேவை தொடங்கியது. ஆனால் 3 மாதங்களுக்கு மேலாகியும், சேலத்தில் இருந்து இதுவரை விமான சேவை தொடங்கப்படாதது அதிருப்தியை ஏற்படுத்தி உள்ளது.

இது குறித்து விமான நிலைய அதிகாரிகள் கூறுகையில், ‘உதான் திட்டத்தில் அனுமதி பெற்ற தனியார் நிறுவனம், சேலத்தில் விமான சேவையை தொடங்க தயாராக உள்ளது. விமான சேவை தொடக்க விழாவுக்கான மாநில அரசின் அனுமதி உள்ளிட்ட சில காரணங்களால் தாமதம் ஏற்பட்டுள்ளது,’ என்றனர். இதனிடையே, விமான நிலையத்தில் அனைத்து பணிகளும் முடிந்து உள்ளதால், விமான சேவை பிப்ரவரி மாத இறுதிக்குள் தொடங்கும். தமிழக முதல்வர் எடப்பாடி பழனிசாமி பங்கேற்று, விமான சேவையை தொடங்கி வைப்பதற்கான நடவடிக்கைகள் மேற்கொள்ளப்பட்டு வருகிறது என அதிகாரிகள் தெரிவித்துள்ளனர்.
நன்றி
தினகரன்