பசுமை நாடுகள் பட்டியலில் 177வது இடத்தில் இந்தியா

பசுமை நாடுகள் பட்டியலில் 177வது இடத்தில் இந்தியா

-
டாவோஸ்:
சுற்றுச்சூழல் பாதிப்படைந்த நாடுகளின் பட்டியலில் 177 வது
இடத்தில் இந்தியா உள்ளது. இந்த பட்டியலில் மொத்தம்
180 நாடுகள் மட்டுமே உள்ளன.

சுவிட்சர்லாந்தில் உள்ள டாவோஸ் நகரில் 48-வது உலக
பொருளாதார மாநாடு நடந்து வருகிறது. இந்த மாநாட்டில்
பிரதமர் மோடி கலந்து கொண்டு சிறப்புரை ஆற்றினார்.

இந்த மாநாட்டில் நேற்று காற்று மாசு மற்றும் காடுகள்
பாதுகாப்பு உள்பட உலகளாவிய பசுமை நாடுகளுக்கான
சுற்றுச்சூழல் செயல்திறன் பட்டியலை வெளியிட்டனர்.

இது குறித்த புள்ளி விபரங்களில் கூறப்பட்டுள்ளதாவது:

சுத்தமான தண்ணீர், சுத்தமான காற்று, காடுகள் அழிப்பு,
மீன் வளம், மீத்தேன், கரிய அமில வாயு வெளியேறுதல்,
கழிவு நீர் சுத்திகரிப்பு, விவசாயம், பல்லுயிர் அழிப்பு உள்பட
10 வகையான பிரச்னைகள், 24 வகையான அளவீடுகள்
வைத்து மொத்தம் 180 நாடுகளில் செய்யப்பட்ட ஆய்வில்
இந்தியா 177வது இடத்தில் இருப்பது தெரிய வந்துள்ளது.

கடந்த இரண்டு ஆண்டுகளுக்கு முன்பு 141 வது
இடத்திலிருந்த இந்தியா தற்போது 177 இடத்திற்கு
பின்நோக்கி சென்றுள்ளது அதிர்ச்சியை உண்டாக்கி உள்ளது.

கொலம்பியா பல்கலைகழகமும் உலக பொருளாதார
அமைப்பும் இணைந்து நடத்திய ஆய்வில் இந்த முடிவுகள்
வெளியாகியுள்ளது.இரண்டு ஆண்டுகளுக்கு ஒரு முறை
நடத்தப்படும் இந்த ஆய்வில் சுவிட்சர்லாந்து நாடு சுற்றுச்
சூழலை பாதுகாப்பதில் முதலிடத்தை பிடித்துள்ளது.

அதற்கு அடுத்தபடியாக பிரான்ஸ், டென்மார்க், மால்ட்டா,
சுவீடன் ஆகிய நாடுகள் உள்ளது. பாகிஸ்தான், சீனா, இந்திய
ஆகிய 3 நாடுகள் கடைசி இடத்தைப் பிடித்துள்ளது.

காடுகளை அழிப்பது, காற்று மாசுபாடுகளை கண்டறிந்து
கட்டுப்பாட்டில் வைக்காமலிருப்பது, தொழிற்சாலை கழிவுகள்,
நீர் மேலாண்மையில் போதிய கவனமில்லாமல் இருப்பது
உள்பட பல்வேறு காரணங்களால் இந்தியா கடைசி 3 வது
இடத்திலிருப்பது ஆய்வில் தெரிய வந்துள்ளது.
-
--------------------------------
தினகரன்