விளைச்சல் அமோகம்: பொன்னி அரிசி விலை மூட்டைக்கு ரூ.150 வரை... குறைந்தது!

வட கிழக்கு பருவ மழை கைகொடுத்ததால், விளைச்சல் அமோகமாகி, ஆலைகளுக்கு நெல் வரத்து, தொடர்ந்து அதிகரித்து வருகிறது. இதன் எதிரொலியாக, மக்கள் அதிகம் விரும்பி வாங்கும், புதிய ரக பொன்னி அரிசி, 25 கிலோ மூட்டைக்கு, 100 - 150 ரூபாய் வரை குறைந்துள்ளது. ஆந்திர நெல் வரத்தும் கணிசமாக இருப்பதால், அரிசி விலை மேலும் சரியும் என, எதிர்பார்க்கப்படுகிறது.
தமிழகத்தில் கடந்த இரண்டு ஆண்டுகளாக, வெள்ளம், வர்தா புயல் ஆகியவற்றால் விவசாயம் பாதித்தது. ஆனால், கடந்தாண்டு இறுதியில், வடகிழக்கு பருவமழை, சீராக பெய்து, விவசாயத்திற்கு உதவியது. இதனால், தமிழகம் மட்டுமின்றி, ஆந்திரா, கர்நாடகா உள்ளிட்ட பிற மாநிலங்களிலும், நெல் விளைச்சல் அதிகரித்தது.
சென்னை அடுத்த திருவள்ளூர் மாவட்டத்தில் மட்டும், 57 ஆயிரம் ஏக்கரில் சம்பா சாகுபடி நடந்தது. அதில், பாபட்லா பொன்னி எனப்படும், பி.பி.டி., ரக நெல் விளைச்சல் மட்டும், 70 சதவீதம் செய்யப்பட்டதாக விவசாயிகள் தெரிவித்தனர். இதனால், திருவள்ளூர் மாவட்டம் மட்டுமின்றி, ஆந்திராவில் இருந்தும், தை பருவ அறுவடை மூலம், சென்னைக்கு நெல் வரத்து நீடிக்கிறது. அதனால் தற்போது, அரிசி உற்பத்தி அதிகரித்துள்ளது.
மக்கள், சன்ன ரக அரிசியை, அதிக அளவில் விரும்பி வாங்குகின்றனர். அந்த வகையில் புதிய பொன்னி உட்பட சன்ன ரக அரிசிகள், 25 கிலோ உடைய., ஒரு மூட்டைக்கு, 100 - 150 ரூபாய்க்கும், 1 கிலோவுக்கு 50 காசு முதல் 1.50 காசு வரையிலும் விலை குறைந்துள்ளது. ஓராண்டு பழைய, பாசுமதி அரிசி நீளம் மற்றும் தரத்திற்கு ஏற்றவாறு, 1 கிலோ, 85 ரூபாய் முதல், 155 ரூபாய் வரை விற்பனையாகிறது. அவை 5, 10, 25 கிலோ பாக்கெட்டுகளிலும் விற்பனையாகின்றன.
நன்றி
தமிழ் மித்ரன்

நுகர்வோர் வசதிக்காக :
இரண்டு ஆண்டுகளாக, வியாபாரிகள் மற்றும் நுகர்வோரின் வசதிக்காக, 25 கிலோ மூட்டை தயாரிக்கப்படுவது குறிப்பிடத்தக்கது. 75 கிலோ கொண்ட பெரிய மூட்டையின் விலை, மொத்த விற்பனையை பாதித்தது. அதனால், அதை மூன்றாக பிரித்து, 25 கிலோ எடை கொண்ட சிறிய மூட்டையாக, கவர்ச்சிகரமான பாலிதீன் மற்றும் துணி பைகளில் தயாரித்தனர். அரிசியும் பாதுகாப்பாக இருந்ததுடன், வாகனங்களில் எடுத்து செல்லவும் எளிதாக இருந்தது. மேலும், நுகர்வோர், தங்களிடமுள்ள பணத்திற்கு ஏற்ப, ஒன்றிரண்டு மூட்டைகளை வாங்கவும் வசதியாக உள்ளது. இதனால், இப்போது, 25 கிலோ அரிசி மூட்டைகளே தயாரிக்கப்படுகின்றன.
விற்பனை அதிகரிப்பு :
சென்னை செங்குன்றம், அம்பத்துார், ஆவடி, கொளத்துார், வில்லிவாக்கம், அண்ணா நகர் என, முக்கிய பகுதிகளில், முழுக்க முழுக்க அரிசி மட்டுமே விற்பனை செய்யும் கடைகள் அதிகரித்துள்ளன. இது தவிர சூப்பர் மார்க்கெட்டுகளிலும் அரிசி விற்பனைக்கு தனி பிரிவுகள் அமைக்கப்பட்டுள்ளன. செங்குன்றத்தில் மட்டும், 50க்கும் மேற்பட்ட அரிசி மண்டி மற்றும் மொத்த விற்பனை கடைகள் உள்ளன. சென்னை மற்றும் மாவட்டப் பகுதிகளில் பிரியாணி ஓட்டல் மற்றும் சிறு ஓட்டல்கள் அதிகரித்துள்ளதும், அரிசி விற்பனை கடைகள் அதிகரித்திருப்பதற்கு காரணம் என, கூறப்படுகிறது.
கடந்த சில மாதங்களாக, அரிசி விற்பனை மிதமாக உள்ளது. இப்போது, தை பருவ அறுவடை நடந்து வரும் நிலையில், அடுத்த ஓரிரு மாதங்களில், சித்திரை பருவ அறுவடை துவங்கிவிடும். இதனால் அதிகரிக்கும் அரிசி வரத்தால், புதிய ரகங்கள் விலை குறைவாக கிடைக்கின்றன. ஆறு மாதங்கள் மற்றும் ஓராண்டு இருப்பில் உள்ள, பழைய அரிசிகள் தரத்திற்கேற்ற விலையில் கிடைக்கின்றன.
-சி. பாபு, 52. அரிசி வியாபாரி, செங்குன்றம்

தமிழகத்தின், ஒரு மாத தேவைக்கான அரிசி உற்பத்தியில், 60 சதவீதம் தமிழகத்தில், விவசாயம் மூலம் கிடைக்கிறது. மீதமுள்ள, 40 சதவீத அரிசி, ஆந்திரா, கர்நாடகா உள்ளிட்ட பிற மாநிலங்களில் இருந்து கிடைக்கிறது. கடந்தாண்டு நீடித்த பருவ மழை, விவசாயிகளுக்கு நம்பிக்கை அளித்தது. தமிழகத்தில் தேவையான அளவு அரிசி கையிருப்பு உள்ளதால், மக்களின் பொருளாதார வசதிக்கேற்ப, விலையும் குறைந்துள்ளது. இதனால், விவசாயிகள், உற்பத்தியாளர்கள் மற்றும் நெல், அரிசி உற்பத்தி தொழில் சார்ந்த வியாபாரிகள், தொழிலாளர்கள், சீரான முறையில் தொழில் அபிவிருத்தியை மேற்கொள்ள முடியும். மத்திய, மாநில அரசுகள், அரிசி ஏற்றுமதிக்குரிய தேவைகளை நிறைவேற்றினால், விவசாயம் மற்றும் அரிசி உற்பத்தி தொழில் மேம்படும்.
-டி.துளசிங்கம், 60, தலைவர்,தமிழ்நாடு நெல், அரிசி மொத்த வியாபார சங்கங்களின் சம்மேளனம். சென்னை
25 கிலோ மூட்டைரூபாய்என்.எல்.ஆர்., - சன்ன ரகம்650 - 700ஏ.டி.டி., 39 - ஆந்திர சொர்ணா675 - 700பி.பி.டி., - புதுசு825 - 1,000பி.பி.டி., - 6 மாதம் பழையது900 - 1,100பி.பி.டி., - ஓராண்டு பழையது1,100 - 1,200கர்நாடகா சோனா - ஓராண்டு பழையது1,280 - 1,320ஏ.டி.டி., 37 - இட்லி அரிசி780 - 850பொங்கல் அரிசி - வெஸ்ட் பெங்கால்675 - 725பி.பி.டி., பச்சரிசி - புதுசு875 - 925பி.பி.டி., பச்சரிசி - புதுசு875 - 925பி.பி.டி., பச்சரிசி - பழையது1,100 - 1,200கர்நாடகா சோனா பச்சரிசி1,200 - 1,300