'மன் கி பாத்' நிகழ்ச்சியில் என்ன பேசலாம்?- மோடிக்கு ராகுல் கூறிய 3 ஆலோசனைகள்

மன் கி பாத்' வானொலி நிகழ்ச்சியில் என்ன பேசலாம் என்பது குறித்து பிரதமர் மோடிக்கு காங்கிரஸ் தலைவர் ராகுல் காந்தி ட்விட்டரில் சுவாரஸ்யமான ஆலோசனைகளை வழங்கியுள்ளார்.

கடைசி ஞாயிறு

மாதந்தோறும் கடைசி ஞாயிற்றுக்கிழமை அன்று வானொலி மூலம் 'மன் கி பாத்' (மனதின் குரல்) நிகழ்ச்சி மூலம் பிரதமர் மோடி மக்களுக்கு உரையாற்றி வருகிறார். இந்த நிகழ்ச்சியில் எந்த விஷயத்தை, பிரச்சினையைப் பற்றிப் பேசலாம் என்பது குறித்து மக்களிடம் கருத்துகளைக் கேட்டு அதன்படி பிரதமர் மோடி பேசி வருகிறார்.

முதல் 'மன் கி பாத்'

அதேபோல இந்த ஆண்டின் முதல் 'மன் கி பாத்' நிகழ்ச்சி வரும் 28-ந்தேதி ஒலிபரப்பாகிறது. அந்த நிகழ்ச்சியில் பேச வேண்டிய விஷயங்கள் குறித்து மக்கள் கருத்துகளை தனது 'என்.எம்.' மொபைல் செயலியில் தெரிவிக்கலாம் என பிரதமர் மோடி ட்விட்டரில் தெரிவித்து இருந்தார்.

3 ஆலோசனைகள்

அதன்படி, 'மன் கி பாத்' நிகழ்ச்சியில் பிரதமர் மோடி, அடுத்து எந்தெந்த விஷயங்கள் குறித்து பேசலாம் என்பது குறித்து காங்கிரஸ் தலைவர் ராகுல் காந்தி ட்விட்டரில் ஆலோசனைகள் வழங்கியுள்ளார்.

அவர் ட்விட்டரில் பதிவிட்ட கருத்தில் கூறியிருப்பதாவது:

''அன்புக்குரிய நரேந்திர மோடி, வரும் 28-ம் தேதி ஒலிபரப்பாகும், நீங்கள் மட்டும் பேசும் 'மன் கி பாத்' நிகழ்ச்சியில் எந்த மாதிரியான விஷயங்கள் குறித்து பேசலாம், அதற்கு ஆலோசனை தாருங்கள் என கேட்டு இருந்தீர்கள்.

1 நம்முடைய நாட்டில் வேலைகிடைக்காமல் திண்டாடும் இளைஞர்களுக்கு வேலைவாய்ப்பு அளிக்கும் திட்டத்தைப் பற்றிப் பேசலாம்.

2. சிக்கிம் மாநிலத்தில் உள்ள டோக்லாம் பகுதியில் சீனாவின் ஆதிக்கத்தை எப்படி முறியடிக்கலாம் என பேசலாம்.

3. ஹரியாணா மாநிலத்தில் சமீபகாலமாக அதிகரித்து வரும் பெண்களுக்கு எதிரான பாலியல் வன்முறை சம்பவங்கள் குறித்தும் பேசலாம்.

நீங்கள் எப்படி திட்டமிடப் போகிறீர்கள் என எங்களிடம் கூறுங்கள்.''

இவ்வாறு அவர் பதிவிட்டுள்ளார்.

தி இந்து