தமிழகம் தயாரிக்கப் போகும் ராணுவ உடைகள்

தமிழகம் தயாரிக்கப் போகும் ராணுவ உடைகள்

சென்னை:
இந்தியாவின் பொருளாதாரத்தின் பெரும் பகுதி, ராணுவ
நடவடிக்கைகளுக்காகவே செலவிடப்படுகிறது. அதனால்,
அதை எப்படியாவது கட்டுப்படுத்த வேண்டும் என, ராணுவ
அமைச்சர் நிர்மலா சீதாராமனுக்கு உத்தரவிட்டிருக்கிறார்.

அதன்படி, இந்திய பட்ஜெட்டில் ராணுவத்துக்காக செலவிடப்படும்
பல லட்சம் கோடிகளில், பாதியாக குறைக்க தேவையான
நடவடிக்கைகள் எடுக்கப்பட்டு வருவதாக, டில்லி மத்திய அரசு
வட்டாரங்கள் கூறுகின்றன.

அதற்காக, இந்தியாவை பதினோரு ராணுவ மண்டலங்களாக
பிரித்து வேகமான நடவடிக்கைகள் துவங்கப்பட்டுள்ளன.
தமிழகத்தின் சென்னை, கோவை, ஆந்திரா, தெலுங்கானா,
கர்நாடகா, கான்பூர் உள்ளிட்ட பதினோரு மண்டலங்களிலும்,
ராணுவத்துக்குத் தேவையான பொருட்களை தயார் செய்யும்
நடவடிக்கைகள் துவங்கப்பட்டுள்ளன.

தமிழகத்திற்கு முக்கியத்துவம்:

இதற்காக, சமீபத்தில் தமிழகம் வந்திருந்த ராணுவ அமைச்சர்
நிர்மலா சீதாராமன், ராணுவத்துக்கு தேவையான உடைகளை
தயார் செய்து கொடுக்கும் பணியில் திருப்பூர் மற்றும் கரூர்
பகுதியைச் சேர்ந்த ஆடை தயாரிப்பாளர்கள் பலரையும் சந்தித்துப்
பேசினார். நூறு கோடிக்கும் அதிகமான முதலீட்டில் வணிகத்தில்
ஈடுபட்டுக் கொண்டிருக்கும் பலரையும் சந்தித்துப் பேச,
அவர்கள் ராணுவத்துக்கு தேவையான பெட்சீட், உள்ளாடைகள்,
அங்கிகள் போன்றவற்றை தயார் செய்ய ஒப்புக் கொண்டுள்ளனர்

அதே போல, தமிழகத்தில் சென்னை ஆவடி, திருச்சி, ஊட்டி
அரவங்காடு போன்ற இடங்களில் ராணுவப் பொருட்களை தயார்
செய்து கொடுக்கும் தொழிற்சாலைகளை மேம்படுத்தவும் நடவடிக்கை
எடுக்கப்பட்டு வருகிறது.

இதற்கு தேவையான அனைத்து தொழில் நுட்ப உதவிகளையும்
இஸ்ரேல், சுவிட்சர்லாந்து, நார்வே, ஜெர்மனி போன்ற பல
நாடுகளில் இருந்தும் பெறவும் திட்டமிடப்பட்டு, அதற்காகவே,
அந்தந்த நாடுகளோடு ஒப்பந்தங்கள் போடப்பட்டு வருகின்றன.

இப்படி இந்தியாவின் பதினோரு மண்டலங்களிலும் ராணுவத்துக்கு
தேவையான பொருட்கள் வெளிநாட்டு தொழில்நுட்ப உதவியுடன்
தயாராகும்போது, வெளிநாடுகளில் இருந்து ராணுவத்துக்கு
தேவையான பொருட்கள் (ஆயுதங்கள் உட்பட) வாங்கப்படுவது
குறையும். இதனால், அளவுக்கு அதிகமான நிதி, ராணுவத்துக்கு
செலவிடுவது தடுக்கப்படும். மேக் இன் இந்தியா திட்டமும்
முழுமையாக ராணுவத்திலும் செயல்படுத்தப்படும் என்பதால்,
மத்திய அரசு, இந்த விஷயத்தில் தனது முழு வேகத்தை காட்டி வருகிறது.
-
---------------------------------
தினமலர்