கூடங்குளத்தில் விரைவில் மின்உற்பத்தி நீராவி சோதனை நடப்பதால் பீதிவேண்டாம்

திருநெல்வேலி:
கூடங்குளம் முதலாவது அணுமின் நிலையத்தில் விரைவில்
மின்உற்பத்தி துவக்குவதன் முன்னோட்டமாக நீராவி
சோதனை நடத்தப்பட உள்ளது.

கூடங்குளத்தில் ஒவ்வொன்றும் ஆயிரம் மெகாவாட் மின்உற்பத்தி
திறன் கொண்ட இரண்டு அணுஉலைகள் அமைக்கப்பட்டுள்ளன.
இதில் முதலாவது அணுஉலை கடந்த 2013ம் ஆண்டு ஜூலை 13ல்
மின் உற்பத்திக்கு தயாரானது.

அக்.,22 முதல் மின்உற்பத்தியை துவங்கியது. இடையிடையே
ஆய்வுகளுக்காக நிறுத்தப்பட்டது. 2014 ஜூன் 7ல் தமது முழு
அளவான ஆயிரம் மெகாவாட் மின்உற்பத்தியை எட்டியது

.வணிகரீதியிலான மின்உற்பத்தி நடந்தது. மின்உற்பத்தி நடந்த
வரையிலும் டர்பைன் 9 ஆயிரத்து 267 மணிநேரம் இயக்கப்பட்டு
687.5 கோடி யூனிட் மின்உற்பத்தி மேற்கொண்டது. இதன்மூலம்
ஆயிரத்து 565 கோடி ரூபாய் வருமானமாக கணக்கிடப்பட்டுள்ளது.

இருப்பினும் சில பழுதுகள் காரணமாக 2015 ஜூன் 24ல் மின்உற்பத்தி
நிறுத்தப்பட்டது. 60 நாட்களில் பழுதுநீக்கப்பட்டு மீண்டும்
இயக்கப்படும் என தெரிவிக்கப்பட்டது. 6 மாதங்கள் கடந்தும்
மின்உற்பத்தி தள்ளிப்போகிறது.

ஏற்கனவே உற்பத்தியில் இருந்த மூன்றில் ஒரு பங்கு எரிகோல்கள்
அகற்றப்பட்டு புதிய எரிகோல்கள் நிரப்பப்பட்டுள்ளன. விரைவில்
மின்உற்பத்தியை துவங்குவதற்கு முன்னோட்டமான நீராவி
வெளியேற்றுச் சோதனை இன்னும் சில தினங்களில் நடத்தப்படுகிறது.

இதுகுறித்து அணுமின்நிலைய வளாக இயக்குநர் ஆர்.எஸ்.சுந்தர்
விடுத்துள்ள அறிக்கையில், இத்தகைய நீராவி வெளியேற்ற
சோதனையின் போது சத்தம் அதிக அளவில் கேட்கும். இதனால்
கூடங்குளம் சுற்றுவட்டார மக்கள் பீதியடைவேண்டாம்.

பகலில்தான் இந்த பணி நடக்கும் என தெரிவித்துள்ளார். எனவே
இந்த மாத இறுதியிலோ பிப்ரவரி துவக்கத்திலோ கூடங்குளம்
முதலாவதுஅணுமின்நிலையம் மீண்டும் மின்உற்பத்தி
துவங்குவதற்கானவாய்ப்புகள் உள்ளன.
-
----------------------
தினமலர்