ஐஏஎஸ் சம்பள செலவு விவரம் தரவில்லை: மத்திய அரசு மீது நாடாளுமன்ற குழு அதிருப்தி

முரளி மனோகர் ஜோஷி
---
நாட்டில் உள்ள ஐஏஎஸ், ஐபிஎஸ், ஐஎப்எஸ் அதிகாரிகளின்
சம்பளம், சலுகைகளுக்கு எவ்வளவு செலவாகிறது என்ற
விவரங்களை மத்திய அரசு வழங்காமல் இருப்பதற்கு,
நாடாளுமன்ற ஆய்வுக் குழு அதிருப்தி தெரிவித்துள்ளது.

நாட்டில் உள்ள ஐஏஎஸ், ஐபிஎஸ், ஐஎப்எஸ் (இந்திய வனத்துறை சேவை)
மற்றும் பிற அதிகாரிகளின் செயல்பாடுகள் மற்றும் அவர்களுக்கான
செலவுகள் குறித்து, பாஜக மூத்த தலைவர் முரளி மனோகர் ஜோஷி
தலைமையிலான நாடாளுமன்ற குழுவினர் ஆய்வு செய்து
வருகின்றனர்.

இக்குழுவினர், ‘மதிப்பீடு மற்றும் இந்திய அரசுப் பணியில் உள்ள
அதிகாரிகளின் செயல்திறன் மறுமதிப்பீடு’ என்ற தலைப்பில்
சமீபத்தில் மக்களவையில் அறிக்கையை சமர்ப்பித்துள்ளனர்.
அந்த அறிக்கையில் அவர்கள் கூறியிருப்பதாவது:

நாட்டின் வளர்ச்சிக்காக ஐஏஎஸ், ஐபிஎஸ், ஐஎப்எஸ் மற்றும் பிற
உயரதிகாரிகளின் பங்களிப்பு எந்தளவுக்கு உள்ளது என்பதை
மதிப்பீடு செய்வதற்கு சரியான நடைமுறை எதுவும் இல்லை.

அதிகாரிகளின் செயல்பாடுகளை ஆய்வு செய்வதற்கான
முயற்சிகளையும் அரசு எடுக்கவில்லை. அரசு சாரா அமைப்புகள்
கூட இதுபோன்ற ஆய்வை நடத்தவில்லை.

எனவே, நாட்டின் வளர்ச்சிக்கு அவர்களுடைய பங்களிப்பு எப்படி
இருக்கிறது என்பதை அறிய செயல்திட்டத்தை மத்திய அரசு
கொண்டு வரவேண்டும்.

மத்தியிலும், மாநிலங்களிலும் உள்ள ஐஏஎஸ், ஐபிஎஸ், ஐஎப்எஸ்,
பிற உயரதிகாரிகளின் சம்பளம், சலுகைகள், ஓய்வூதியம்
போன்றவற்றுக்கு எவ்வளவு செலவாகிறது, அவர்களுக்கான
அலுவலக கட்டமைப்பு, நாற்காலி, மேசைகளுக்கு எவ்வளவு
செலவாகிறது என்ற விவரங்களும் அளிக்கப்படவில்லை.

இதை கணக்கிடுவதற்கு எந்த அமைப்பும் இல்லை. மத்திய
பணியாளர் துறையாலும் அந்த விவரங்களை தரமுடியவில்லை.

எனவே, அவர்களுக்கு எவ்வளவு செலவாகிறது என்ற முழு
விவரங்களையும் ஆண்டுவாரியாக 3 மாதங்களுக்குள் மத்திய
அரசு அளிக்க வேண்டும்.

இவ்வாறு நாடாளுமன்ற குழுவினர் அறிக்கையில்
தெரிவித்துள்ளனர். கடந்த 2016-ம் ஆண்டு நாட்டில் ஐஏஎஸ்
அதிகாரிகளின் எண்ணிக்கை 6,396 ஆக உயர்த்த அனுமதி
வழங்கப்பட்டது. கடந்த ஜனவரி 1-ம் தேதிப்படி நாட்டில்
4,863 ஐபிஎஸ், 3,152 ஐஎப்எஸ் பணியிடங்களுக்கு ஒப்புதல்
அளிக்கப்பட்டுள்ளது குறிப்பிடத்தக்கது.
-
----------------------------------------
தி இந்து

ஒரு ஐஏஎஸ் - 50000 மாதம் என்றாலும் 50000 X 6396 = 319800000

ஒரு ஐபிஎஸ் - 40000 மாதம் என்றாலும் 40000 X 4863 = 194520000

இதற்க்கே அதிக செலவு ஆகும் போல