சிவன்மலை ஆண்டவன் கோவில் உத்தரவு பெட்டியில் கணக்கு நோட்டு!

காங்கேயம் : சிவன்மலை ஆண்டவர் உத்தரவு பெட்டியில், கணக்கு நோட்டு வைக்கப்பட்டு உள்ளது. இதனால், பினாமி சொத்துகளுக்கு ஆபத்து வருமென, பக்தர்கள் மத்தியில் எதிர்பார்ப்பு எழுந்துள்ளது.

திருப்பூர் மாவட்டம், காங்கேயம் அடுத்த, சிவன்மலை சுப்ரமணிய சுவாமி கோவில், அருணகிரிநாதரால் பாடல் பெற்றது. இங்கு, ஆண்டவன் உத்தரவு பெட்டி உள்ளது.இதில் வைத்து பூஜை செய்யப்படும் பொருட்கள், சமுதாயத்தில் ஏதாவது ஒரு தாக்கத்தை ஏற்படுத்தும். அதே சமயம், சில நிகழ்வுகளை முன்கூட்டி அறிவிப்பதாகவும் அமையும் என்பது, பக்தர்களின் நம்பிக்கையாக உள்ளது.


உலக உருண்டை
பக்தர்கள் கனவில், சிவன்மலை ஆண்டவர் சுப்ரமணிய சுவாமி கூறும் பொருள், பெட்டியில் வைக்கப்படுவது வழக்கமாக உள்ளது.இதுவரை பெட்டியில், மண், துப்பாக்கி, ஏர் கலப்பை, ரூபாய் நோட்டு, நோட்டு புத்தகம், சைக்கிள், அரிசி, மஞ்சள், இளநீர், தங்கம் சர்க்கரை, கணக்கு நோட்டு, பூமாலை, இருப்பு சங்கிலி, ருத்ராட்சம் என, பல்வேறு பொருட்கள் இடம் பெற்றுள்ளன.கடந்த ஆண்டு மே, 3 முதல், நேற்று முன்தினம் வரை, உலக உருண்டை வைக்கப்பட்டிருந்தது.தேனி மாவட்டத்தைச் சேர்ந்த, மலர்விழி, 35, என்ற பெண் பக்தரின் கனவில், கணக்கு நோட்டு வைக்க உத்தரவாகி உள்ளது.



கார்கில் போர்
இதையடுத்து நேற்று முதல், கணக்கு நோட்டு வைத்து பூஜிக்கப்படுகிறது. பெட்டியில் துப்பாக்கி வைத்த போது, கார்கில் போர் ஏற்பட்டது.உலக உருண்டை வைத்தது முதல், வட கொரியா - அமெரிக்கா இடையே, மோதல் போக்கு நிலவுகிறது. இந்நிலையில், கணக்கு நோட்டு வைக்கப்பட்டு உள்ளது. இதனால், பினாமி சொத்துகள் மீட்கப்படும் என, பக்தர்கள் மத்தியில் பேச்சு எழுந்துள்ளது.


2-வது முறை கடந்த, 2015 அக்., 10ல், கணக்கு நோட்டு, உத்தரவு பெட்டிக்குள் வைக்கப்பட்டது. அப்போது, மத்திய அரசு, கறுப்புப் பணத்தை ஒழிக்க நடவடிக்கை எடுத்தது. தற்போது இரண்டாவது முறையாக, கணக்கு நோட்டு வைக்கப்பட்டு உள்ளது.

நன்றி தினமலர்