மத்தியஅரசு நிதியை தமிழக அரசு செயல்படுத்தாதற்கு பா.ஜ., கண்டனம்

திருநெல்வேலி:
மத்திய அரசின் திட்டங்களை செயல்படுத்தாமல்
காலதாமதம் செய்யும் தமிழக அரசை கண்டித்து பா.ஜ.க.,
போராட்டத்தில் ஈடுபடும் என மாநில தலைவர்
தமிழிசை சவுந்தரராஜன் தெரிவித்தார்.

நெல்லையில் பா.ஜ.,கட்சி பிரமுகர் இல்ல திருமண விழாவில்
பங்கேற்ற மாநில தலைவர் தமிழிசை கூறியதாவது:
தமிழகத்தில் அரசியல் களம் விறுவிறுப்பாகியுள்ளது.

ரஜினி அரசியலுக்கு வருவதாக இருந்த 30 ஆண்டுகால
சஸ்பென்ஸ் முடிவுக்கு வந்திருக்கிறது.அவரது
நடவடிக்கைகளை பார்த்துவிட்டுத்தான் கருத்து சொல்ல
முடியும்.

ஊழலற்ற தன்மையை அவர் வலியுறுத்துவதை
வரவேற்கிறோம்.பா.ஜ.,வின் கிளைக்கட்சியாக அ.தி.மு.க.,
செயல்படுவதாக தி.மு.க.,செயல்தலைவர் ஸ்டாலின்
கூறியிருக்கிறார்.இரண்டும் வெவ்வேறு கட்சிகள்.

அ.தி.மு.க.,வில் நடக்கும் நிகழ்வுகளுக்கு நாங்கள் எப்படி
பொறுப்பேற்க முடியும்.

தாமிரபரணி நதிநீர் இணைப்பு திட்டத்திற்கு மத்திய அரசு
890 கோடி ரூபாய் ஒதுக்கியுள்ளதோடு, சுற்றுச்சூழல்துறையின்
அனுமதியும் வழங்கியுள்ளது.

35 அதிகாரிகளையும் நியமித்துள்ளது. ஆனால் இன்னமும்
திட்டத்தை செயல்படுத்தாமல் கிடப்பில் போட்டிருக்கும்
தமிழக அரசை கண்டிக்கிறோம். பயிர்பாதுகாப்பு காப்பீட்டு
திட்டத்தின் மூலம் புயலால் பாதிக்கப்பட்ட கன்னியாகுமரி
மாவட்டத்தில் 890 பேருக்கும், நெல்லை மாவட்டத்தில்
14 ஆயிரத்து 600 பேருக்கும் ஒரு ஏக்கருக்கு 29 ஆயிரம் ரூபாய்
நஷ்டஈட்டினை மத்திய அரசு வழங்கியுள்ளது.

ஆனால் இன்னமும் தொகை வழங்கப்படவில்லை என தகவல்
வருகிறது.

எனவே விவசாயிகளுக்கு பொங்கல் தினத்திற்கு முன்பாக
அதை வழங்கவேண்டும். இல்லையென்றால் பா.ஜ., தமிழக
அரசுக்கு எதிராக போராட்டத்தில் ஈடுபடும்.

ஆர்.கே.நகர் தேர்தலை நாங்கள் ஒரு தேர்தலாகவே
கருதவில்லை. அதில் எங்களுக்கு மட்டும் தோல்வியில்லை.
எல்லா கட்சிகளுக்கும் பின்னடைவுதான்.

ஸ்மார்ட் சிட்டி நகரங்களின் வளர்ச்சிக்காக மத்திய அரசு
தமிழகத்திற்கு இதுவரையிலும் 111 கோடி ரூபாய் ஒதுக்கியுள்ளது.
ஆனால் சேலம், தஞ்சை போன்ற நகரங்களுக்கு தமிழக அரசு
ஒரு சில லட்சங்களை மட்டுமே செலவழித்துள்ளது.

எனவே மத்திய அரசு தரும் நிதியினை முறையாக
திட்டங்களுக்கு செலவழிக்காவிட்டால் தமிழக அரசுக்கு
எதிராக போராட்டங்களை நடத்துவோம் என்றார்.
-
------------------------------
தினமலர்