திருச்செந்தூர் சுப்பிரமணிய சுவாமி கோயிலில் வெளிப்பிரகாரம் இடிக்கும் பணி தொடங்கியது

திருச்செந்தூர்: திருச்செந்தூர் சுப்பிரமணியசுவாமி கோயிலில் பிரகாரம் இடிந்து பெண் பலியானதை தொடர்ந்து பிரகாரம் முழுவதையும் இடிக்கும் பணி நேற்று தொடங்கியது. இந்த பணிகளை 5 நாட்களில் முடிக்க ஏற்பாடுகள் செய்யப்பட்டுள்ளன. அறுபடை வீடுகளில் 2ம் படை வீடான திருச்செந்தூர் சுப்பிரமணியசுவாமி கோயிலுக்கு தினமும் ஆயிரக்கணக்கான பக்தர்கள் வந்து செல்கின்றனர். கோயிலுக்கு வரும் பக்தர்கள் வெளிப்பிரகாரத்தை சுற்றிவிட்டு கடலில் நீராடி சாமி தரிசனம் செய்வர். கடந்த 14ம் தேதி காலை வடக்கு பகுதி முக்கில் உள்ள பிரகார மேற்கூரை திடீரென இடிந்து விழுந்தது. அப்போது அங்கு மோர் விற்றுக்கொண்டிருந்த பேச்சியம்மாள்(44) என்பவர் இடிபாடுகளுக்குள் சிக்கி உயிரிழந்தார். 2 பேர் காயமடைந்தனர்.
இந்நிலையில் பிரகாரம் முழுவதும் இடித்து விட்டு புதிதாக கட்ட நடவடிக்கை எடுக்கப்படும் என அறநிலையத்துறை தெரிவித்தது. அதன்படி பிரகாரம் முழுவதும் இடிக்கும் பணி பொக்லைன் மூலம் நேற்று அதிகாலை தொடங்கியது. ஆர்டிஓ கணேஷ்குமார், தாசில்தார் அழகர், அறநிலையத்துறை இணை ஆணையர் பாரதி, கோயில் தக்கார் கோட்டை மணிகண்டன், மதுரை அறநிலையத்துறை நிர்வாக பொறியாளர் வெண்ணிலா, டிஎஸ்பி (பொறுப்பு) பாலச்சந்திரன், இன்ஸ்பெக்டர்கள் ரகுராஜன், ஷீஜாராணி, உதயகுமார், உதவி ஆணையர் ராமசாமி, முதுநிலை கணக்கர் மதிவாணன், டாக்டர் ரவி, அலுவலக சூப்பிரண்ட் யக்ஞ நாராயணன், மண்டல துணை தாசில்தார் கண்ணன், ஆர்ஐ செந்தில்முருகன், விஏஓ கார்த்திகேயன், மேலாளர் சிவநாதன், இணை ஆணையர் நேர்முக உதவியாளர் கார்த்திகேயன், பிஆர்ஓ மாரிமுத்து, உதவி செயற்பொறியாளர்கள் கந்தவேல், குமரன், சந்தானகிருஷ்ணன், நெல்லைகுமார், திருநாகலிங்கம், தீயணைப்பு நிலைய அதிகாரி முத்துக்குமார் உள்ளிட்ட பணியாளர்கள் ஈடுபட்டனர்.
நன்றி
தினகரன்

இதுகுறித்து இணை ஆணையர் பாரதி கூறுகையில், ‘‘திருச்செந்தூர் சுப்பிரமணியசுவாமி கோயில் பிரகாரம் இடிக்கும் பணி 5 நாளில் முடிக்க திட்டமிட்டுள்ளோம். பணி முடிந்ததும், அமைச்சர் மற்றும் அதிகாரிகளுடன் ஆலோசனை நடத்தி புதிய பிரகாரம் கட்டும் பணி பற்றி முடிவு செய்யப்படும்’’ என்றார். பிரகாரம் இடிக்கும்போது கலையரங்கம் பகுதியில் உள்ள கடைகளின் முன் பகுதியும் இடிக்கப்பட்டது. கடைகளில் இருந்த பொருட்கள் அகற்றப்படாத நிலையில் இந்த பணி நடந்ததால் வியாபாரிகள் ஆத்திரமடைந்தனர். அதிகாரிகளுக்கும், அவர்களுக்குமிடையே கடும் வாக்குவாதம் ஏற்பட்டதால் பரபரப்பு நிலவியது. ஆனாலும் இடிக்கும் பணி தொடர்ந்து நடக்கிறது.