ஆர்.கே.நகர் இடைத்தேர்தல்: சுயேட்சையாக போட்டியிட்ட டிடிவி தினகரனின் வெற்றி உறுதியானது

சென்னை: ஆர்.கே.நகர் இடைத்தேர்தலில் சுயேட்சையாக குக்கர் சின்னத்தில் போட்டியிட்ட டிடிவி தினகரனின் வெற்றி உறுதியானது. தமிழக இடைத்தேர்தல் வரலாற்றில் வெற்றி பெற்ற முதல் சுயேட்சை வேட்பாளர் தினகரன் என்ற பெருமையை தினகரன் பெற்றுள்ளார். ஜெயலலிதா மறைவை தொடர்ந்து, காலியாக இருந்த ஆர்.கே.நகர் தொகுதிக்கு கடந்த 21ம் தேதி வாக்குபதிவு நடந்தது.

இத்தேர்தலில், திமுக சார்பில் மருதுகணேஷ், அதிமுக சார்பில் மதுசூதனன், பாஜ சார்பில் கரு.நாகராஜன், சுயேச்சை வேட்பாளர் டிடிவி தினகரன் உள்ளிட்ட 59 வேட்பாளர்கள் போட்டியிட்டனர். வாக்குபதிவு அன்று வாக்காளர்கள் ஆர்வமுடன் வாக்களித்தனர். 258 வாக்கு சாவடி மையங்களில் 84 மையங்களில் இரவு 8 மணி வரை வாக்காளர்கள் நீண்ட வரிசையில் நின்று வாக்களித்தனர். இத்தேர்தலில் முன்பு எப்போதும் இல்லாத அளவிற்கு 77.5 சதவீதம் வாக்குகள் பதிவாகியுள்ளது.

ராணிமேரி கல்லூரியில் தள்ளுமுள்ளு
ஆர்கே நகர் இடைத்தேர்தல் வாக்கு என்னும் மையமான ராணிமேரி கல்லூரி அருகே தள்ளுமுள்ளு ஏற்பட்டுள்ளது. அனுமதிக்கும் நேரம் முன்பாக வேட்பாளர்களின் அரசியல் கட்சிகளின் முகவர்கள் திரண்டதால் போலீசார், முகவர்கள் இடையே தள்ளுமுள்ளு ஏற்பட்டது.

19 சுற்றுகளாக வாக்கு எண்ணிக்கை
ஆர்.கே.நகரில் 258 வாக்குச்சாவடிகளில் பதிவான 1.76 லட்சம் வாக்குகள் 19 சுற்றுகளாக எண்ணப்படுகிறது.
ஒவ்வொரு மேஜைக்கு ஒரு மத்திய அரசு பணியாளர் நுண் பார்வையாளராக நியமிக்கப்பட்டுள்ளார். வாக்கு எண்ணிக்கை முழுவதுமாக வீடியோ பதிவு செய்யப்படுகிறது.

தபால் ஒட்டு மருத்துகணேஷுக்கு
தபால் வாக்கில் பதிவான ஒரு ஓட்டும் திமுக வேட்பாளர் மருத்துகணேஷுக்கு கிடைத்துள்ளது.

அதிகாரிகள் மீது அதிமுக-வினர் தாக்குதல்
வாக்கு எண்ணும் பணியில் ஈடுபட்டு வரும் அதிகாரிகள் மீது அதிமுக-வினர் தாக்குதல் நடத்தினர். மேலும் நாற்காலிகள், தண்ணீர் பாட்டில்களை வீசி தாக்குதல் நடத்தியதில் அதிகாரிகள் காயம் அடைந்தனர்.

அதிமுகவினர் சாலை மறியல்
சென்னை ராணிமேரி கல்லூரி முன்பு அதிமுகவினர் சாலை மறியலில் ஈடுபட்டனர். சாலை மறியலில் ஈடுபட்டவர்களை அப்புறப்படுத்தப்படும் பணியில் போலீசார் தீவிரம் காட்டி வருகின்றனர்.

ஆர்.கே நகரில் வாக்கு எண்ணிக்கை மீண்டும் தொடங்கியது
ஆர்.கே நகரில் வாக்கு எண்ணிக்கை மீண்டும் தொடங்கியது. முன்னதாக ஆர்.கே நகரில் வாக்கு எண்ணும் பணியில் ஈடுபட்டு வரும் அதிகாரிகள் மீது அதிமுக-வினர் தாக்குதல் நடத்தினர். மேலும் நாற்காலிகள், தண்ணீர் பாட்டில்களை வீசி தாக்குதல் நடத்தியதில் அதிகாரிகள் காயம் அடைந்தனர்.

ஆர்.கே.நகர் இடைத்தேர்தல் நிலவரம்
டி.டி.வி தினகரன்(சுயேட்சை) : 81,317 வாக்குகள்
மதுசூதனன் (அதிமுக): 44,522வாக்குகள்
மருதுகேணஷ் (திமுக): 22,962 வாக்குகள்
கலைக்கோட்டுதயம் (நாம் தமிழர் கட்சி): 3645
கரு.நாகராஜன் (பாஜக): 1236
நோட்டா: ௨௨௦௩

நன்றி
தினகரன்