அன்பு ஆரோக்கியமும் தரும்!

நன்றி குங்குமம் டாக்டர்

‘பப்ளியாக இருப்பது போலவும் தோன்ற வேண்டும்; ஆனால், குண்டு என்று யாரும் சொல்லி விடக் கூடாது’ என்கிற ஒரு மெலிசான கோடு பாலிசியை மெயின்டெயின் பண்ணுவது சாதாரண வேலையில்லை. ஆனால், ஹன்சிகா அதை சாதாரணமாக செய்து வருகிறார். எப்படி... இப்படி?

“உணவு என்பது நம் ஆரோக்கியத்துக்கு உதவ வேண்டுமே தவிர, உடல்நலனைக் கெடுப்பதாக அமைந்துவிடக் கூடாது என்பதை தெரிந்தவள் நான். அதனால், டயட்டைப் பின்பற்றுவதில் எனக்கு எந்த சிரமமும் இல்லை. என்னதான் புதிய, புதிய இடங்களுக்கு, வெவ்வேறு நாடுகளுக்குச் செல்ல வேண்டியிருந்தாலும் உணவு விஷயத்தில் இந்த தெளிவு எப்போதும் என்னுடன் இருக்கும். சில விஷயங்களை கண்டிப்பாக பின்பற்றுவேன்.

காலை எழுந்தவுடன் 2 டம்ளர் தண்ணீர். அப்புறம் ஒரு கப் க்ரீன் டீ. எத்தனை அவசர வேலையாக இருந்தாலும் காலை உணவைத் தவிர்க்க மாட்டேன். பிரேக் ஃபாஸ்ட் என்பது மிகவும் முக்கியமானது என்பது என்னுடைய நம்பிக்கை. காலையில் ஸ்கிம்டு மில்க் மற்றும் ஆப்பிள் சாப்பிடுவேன். காலை 11 மணி அளவில் வேகவைத்த 3 முட்டையின் வெள்ளைக்கருவோடு மல்டிக்ரைன் டோஸ்ட் எடுத்துக் கொள்வேன்.

மதியம் கொஞ்சம் உணவோடு நிறைய வேகவைத்த காய்கறிகளை உண்பேன். மாலையில் 2 பிஸ்கட் மற்றும் ஒரு கப் க்ரீன் டீ. இரவு உணவை 6 மணிக்கு முன்பாகவே முடித்துக் கொள்வேன். தண்ணீர் நிறைய குடிப்பது என்னுடைய இயல்பான பழக்கம். ட்ரீட், டின்னர் என்று செல்ல வேண்டியிருந்தாலும் அளவு மீறுவது கிடையாது’’ என்று சொல்லும் ஹன்சிகா கார்டியோ மற்றும் எடைப்பயிற்சிகள் என இரண்டையும் கலந்து செய்கிறார்.

தினமும் ஜிம்மில் 2 மணிநேர உடற்பயிற்சிகள். ஒரு நாள் விட்டு ஒருநாள் மாலையில் நீச்சல் பயிற்சியும் உண்டு. உடலையும் மனதையும் லைட்டாக வைத்துக்கொள்ள யோகா உதவுவதாகவும் நம்புகிறார். ‘ஒவ்வொரு நாளையும் அதன் இயல்பிலேயே வரவேற்கிறேன். நேற்று அல்லது நாளை பற்றி நினைப்பதே இல்லை. இன்று எப்படி போகிறதோ அதன் போக்கிலேயே செல்வேன். ஒவ்வொரு நாளும் புதிதாக கற்றுக் கொள்ள விரும்புவேன்.

டோன்ட் ஒர்ரி, பி ஹேப்பி என்ற பாலிஸி யும் என் ஃபிட்னஸுக்குக் காரணமாக இருக்கலாம்’ என்கிறார். இந்த பக்குவம்தான் ஹன்சிகாவை 30-க்கும் மேற்பட்ட குழந்தைகளைத் தத்தெடுத்து வளர்க்க வைக்கிறது, யார் உதவி கேட்டாலும் செய்ய வைக்கிறது, திடீரென்று நடைபாதைவாசிகளுக்குப் போர்வைகளையும், உடைகளையும் கொடுக்க வைக்கிறது என்கிறார்கள் சினிமா வட்டார நண்பர்கள். அன்பு ஆரோக்கியமும் தரும் என்பதற்கு ஹன்சிகா ஓர் இனிய உதாரணம்தான்!

- இந்துமதி
நன்றி
தினகரன்