யோகக் கலையின் ஆச்சாரியார்கள்!

--
இந்தியாவில் தோன்றிய யோகக் கலை இப்போது உலக சொத்து. ஐக்கிய நாடுகள் அமைப்பு இந்த ஆண்டு ஜூன் 21-ம் தேதியை சர்வதேச யோகா தினமாக அனுசரித்ததே இதற்குச் சான்று. யோகக் கலையை உலகம் முழுவதும் பரப்பியதில் சித்தர்கள், முனிவர்களுக்கு மக்கியப் பங்கு உண்டு. ஆனால் சாமானிய மனிதர்களுக்கும் இவற்றைக் கற்றுத் தந்தர் ஆச்சார்யார்கள் வெகு சிலரே... அவர்களில் முதன்மையானவர் யோகாச்சார்யா ஸ்ரீ திருமலை கிருஷ்ணமாச்சாரியார்.
-
1888-ம் ஆண்டு கர்நாடக மாநிலத்தில் முசுகுந்தே என்ற கிராமத்தில் பிறந்த கிருஷ்ணமாச்சாரியா தன் தந்தையாரிடம் வேத சாஸ்திரங்களைக் கற்றுத் தேர்ந்தார். வைணவ ஆச்சாரியாரும், யோகியுமான நாத முனியின் பரம்பரையைச் சேர்ந்த இவர், யோகக் கலையைப் பயில வேண்டுமென்ற தீராத ஆர்வத்தால், இமயமலைக்குச் சென்று கைலாஷ் மானசரோவர் அடியில் வாழ்ந்த யோகி ராம மோஹன பிரம்மச்சாரியிடம் ஏழரை ஆண்டுகள் யோகாசனத்தை குருகுல முறைப்படி கற்றுத் தேர்ந்தார்.
-
பின்னர் குருவின் கட்டளைப்படி சொந்த மாநிலத்துக்குத் திரும்பி, மைசூர் அரசவையில் ஒரு யோகசாலையை நிறுவி, அனைவருக்கும் யோகா கற்றுக் கொடுத்து வந்தார். தன் குருவின் கட்டளைப்படி திருமணம் செய்துகொண்டு குடம்ப வாழ்க்கையிலும் ஈடுபட்டார். தன்னை நாடி வந்தவர்களுக்கு யோகாசனங்களைக் கற்றுக் கொடுத்தார். 101 வயதுவரை நிறைந்த வாழ்க்கை வாழ்ந்த அவரால் உருவாக்கப்பட்ட மாணவர்களும், அந்த மாணவர்களால் உருவாக்கப்பட்ட சிஷ்யர்களுமாக வாழையடி வாழையாக பலர் நாடு முழுவதிலும் யோகக் கலையை கற்பித்து வருகிறார்கள்.
-
அவர்களில் முக்கியமானவர்,
-
கிருஷ்ணமாச்சாரியாரின் மகன் தேசிகாச்சாரியார். பொறியியல் பட்டதாரியான தேசிகாச்சாரியார் பெரிய நிறுவனங்களில் வேலை பார்த்தவர். ஆயினும் தந்தையின் யோக அறிவையும், யோக சிகிச்சை மூலம் நோய்களுக்குத் தீர்வு காணும் அவரது ஆற்றலையும் பிரமிப்புடன் கண்டு தன்னையும் யோகத்தில் ஈடுபடுத்திக் கொண்டார். தந்தையிடமே பல ஆண்டுகள் முறைப்படி யோகாசனங்களைக் கற்றுத் தேர்ந்தார்.
-
தந்தையும், குருவுமான கிருஷ்ணமாச்சாரியார் தனக்கு கற்றுக் கொடுத்த யோகக் கலைக்கு குருதட்சிணையாக 1976ல் "கிருஷ்ணமாச்சார்யா யோக மந்திரம்' என்ற அமைப்பை சென்னையில் நிறுவி, பலருக்கும் யோகாசனங்களைக் கற்றுக் கொடுக்க ஆரம்பித்தார். உலகப் புகழ் பெற்ற இந்த நிறுவனத்தில் தற்போது யோகா சம்பந்தப்பட்ட ஆராய்ச்சிகள் மேற்கொள்ளப்படுகின்றன. தேர்ந்த ஆசிரியர்களால் பலதரப்பட்ட மக்களுக்கும் யோகாசனம் கற்றுத் தரப்படுகிறது.
-
கிருஷ்ணமாச்சாரியாவுக்கு பல சீடர்கள் இருந்தபோதிலும், முக்கியமாக நான்கு பேர் உலகப் புகழ் பெற்றவர்கள். அவர்கள்... பி.கே.எஸ். ஐயங்கார் (சமீபத்தில் காலமானார்), பட்டாபி ஜோஸ், இந்திரா தேவி (வெளிநாட்டுப் பெண்மணி), மகன் டி.கே.வி. தேசிகாச்சாரியார்.
-
யோகக் கலையில் கிருஷ்ணமாச்சாரியார் வகுத்துக்கொண்டு, கையாண்ட வழி முறைகள் மிகவும் பிரசித்தி பெற்றவை. அவற்றில் முக்கியமான சில:
-
* யோகாவை வயதுக்கேற்ப பிரித்து அளித்தல், அதாவது சிறுவர்களுக்கு,
நடுவயதினருக்கு, முதியோருக்கு என்று.
-
* யோகாவை ஒவ்வொருவருக்கும் ஏற்றபடி தனித்து மாற்றி அமைத்து
வழங்கும் முறை.
-
* பெண்களுக்கு சிறப்பான யோகப் பயிற்சி.
-
* யோகா சிகிச்சையில் புதிய உத்திகள்.
-
யோகி கிருஷ்ணமாச்சாரியார் வகுத்துத் தந்த நெறிமுறைகளின்படி அமைந்த பல்வேறு யோகாசனங்களை நாம் இந்த தொடரில் பார்க்க போகிறோம். கிருஷ்ணமாச்சாரியா யோக மந்திரத்தில் யோகாசனம் பயிற்றுவிக்கும் ஆசிரியர்களும், அறிஞர்களும் நம் வாசகிகளுக்கு வழி காட்டப் போகிறார்கள்.
-
சாதாரண உடற்பயிற்சிக்கும், யோகாவுக்கும் என்ன வித்தியாசம்?
-
சென்னையிலுள்ள கிருஷ்ணமாச்சார்யா யோக மந்திரத்தின் யோகா டீச்சர் ஆண்டாள்: யோகத்தில் உடம்பும், மனசும், மூச்சும் ஒன்றிணைந்து செயல்படுகிறது. மனக் கட்டுப்பாடு யோகத்தில் முக்கிய இடம் வகிக்கிறது. மூச்சை உள்ளுக்கு இழுத்து, வெளியே விட்டு மனம் ஒன்றி யோகாசனங்களைச் செய்யும்போது, ஒரு ஃபோகஸ் கிடைக்கிறது. மனது அலைபாயாது. நாம் என் செய்கிறோம் என்கிற விழிப்புணர்வுடன் ஆசனங்களைச் செய்யும்போது, மனதுக்குள் ஒரு அமைதியும், நிறைவும் ஏற்படுகிறது.
-
மற்ற உடற்பயிற்சிகளை நாம் இயந்திரத்தனமாக செய்து கொண்டே போகலாம். அதில், மனசுக்கோ, மூச்சுப் பயிற்சிக்கோ இடமில்லை. உடம்பு மட்டும் ஒரு இடத்தில் இருக்கும்; பயிற்சி செய்து கொண்டே இருப்போம். மனசு எங்கேயோ அலை பாயும். யோகாவில் அதற்கெல்லாம் இடமேயில்லை. செய்யும்போது, மனதுக்கு ஒரு கட்டுப்பாடு வந்துவிடும்.
-
எந்த நேரத்தில் யோகா செய்வது நல்லது?
-
அதிகாலை நேரத்தில் யோகா செய்வது சிறந்தது. இரவில் நன்றாக உறங்கிவிட்டு காலையில் எழுந்தவுடன் யோகா செய்யும்போது, மனம் மிகவும் ஃப்ரெஷ்ஷாக இருக்கும். விடியற்காலை காற்று மாசில்லாமல் தூய்மையாக இருக்கும். வீட்டு வேலைகள், குழந்தைகளை கவனிப்பது, அலுவலகத்துக்குச் செல்லும் அவசரம் என்று பரபரப்பாக இயங்கும் பெண்களால், காலை நேரத்தில் யோகா செய்வது சாத்தியமாகாது. அதனால் மாலையில் செய்யலாம். அதுவும் முடியவில்லை என்றால் எப்போது நேரம் கிடைக்கிறதோ அப்போது செய்யலாம்.
-
காலையில் லைட்டாக டிபன் சாப்பிட்டு விட்டு, ஒரு மணி நேரம் கழிந்தபிறகு யோகா செய்யலாம். வயிறு முட்ட சாப்பிட்ட பிறகு யோகாசனங்களைச் செய்யக்கூடாது. குறிப்பாக அரிசி சாப்பாடு சாப்பிட்டபிறகு யோகா செய்வதைத் தவிர்க்க வேண்டும். அரிசி சாப்பாடு ஜீரணமாக நீண்ட நேரம் ஆகும் என்பதே இதற்குக் காரணம்.
-
அரை வயிறு சாப்பாடு, கால் வயிறு தண்ணீர், கால் வயிறு காலியாக இருக்க வேண்டும் என்பதுதான் சரியான உணவுமுறை. யோகா செய்பவர்கள் பால், பழங்கள் போன்ற சாத்வீக உணவுகளை எடுத்துக் கொள்ளலாம்.
-
யோகாசனப் பயிற்சிகளை செய்தவுடனே சாப்பிடக் கூடாது அல்லது ஒன்றிரண்டு மணி நேரங்கள் கழிந்தபிறகுதான் சாப்பிடவேண்டும் என்று சிலர் கூறுவார்கள். ஆனால், யோகப் பயிற்சிகளை முடித்தவுடனேயே சாப்பிடலாம். தவறில்லை.
-
-----------------
- ஜி. மீனாட்சி
மங்கையர் மலர்

நல்ல பயனுள்ள பதிவு . நன்றி அய்யா .