கருணாநிதி மகள் செல்வி மீதான வழக்கை தொடர்ந்து நடத்த சுப்ரீம் கோர்ட்டு அனுமதி

புதுடெல்லி,

சென்னை, வளசரவாக்கத்தைச் சேர்ந்த வி.நெடுமாறன்
என்பவர் சென்னை போலீஸ் கமி‌ஷனர் அலுவலகத்தில் 2012–ம்
ஆண்டு ஒரு புகார் மனு அளித்தார்.

அதில், ‘‘தி.மு.க. தலைவர் கருணாநிதி மகள் செல்வி, மருமகன்
வி.எம்.ஜோதிமணி ஆகியோரிடம் இருந்து செங்கல்பட்டு அருகே
தாழம்பூர் கிராமத்தில் அவர்களுக்கு சொந்தமான 2.94 ஏக்கர்
நிலத்தை வாங்குவதற்காக ரூ.3.50 கோடி வரைவோலையாகவும்,
ரொக்கமாகவும் அளித்தேன்.

பத்திரம் பதிவு செய்து தராததால் பணத்தை திருப்பிக்
கேட்டதற்கு என்னை இருவரும் மிரட்டினர்’’ என்று முறையீடு
செய்திருந்தார். இது தொடர்பான வழக்கு பூந்தமல்லி கோர்ட்டில்
நடந்து வந்தது.

இந்தநிலையில், செல்வி தரப்பில், ‘‘மனுதாரர் மிரட்டியதாக
கூறிய அன்று, தான் சென்னையில் இல்லை என்றும் அன்று
காலையில் கொல்கத்தாவுக்கு சென்றுவிட்டு, இரவு தான்
சென்னை திரும்பியதாகவும் இந்த குற்றச்சாட்டுக்கும்,
தனக்கும் தொடர்பு இல்லை. எனவே, வழக்கில் இருந்து தன்னை
விடுவிக்க வேண்டும்’’ என செல்வி தரப்பில் சென்னை
ஐகோர்ட்டில் மனு தாக்கல் செய்யப்பட்டது.

அதை விசாரித்த சென்னை ஐகோர்ட்டு, வழக்கில் இருந்து
செல்வியை விடுவித்து கடந்த ஆண்டு ஜனவரி மாதம் 12–ந்தேதி
உத்தரவிட்டது.

இந்த நிலையில் சென்னை ஐகோர்ட்டின் தீர்ப்புக்கு எதிராக
சுப்ரீம் கோர்ட்டில் தமிழக அரசு மற்றும் வி.நெடுமாறன்
மேல்முறையீட்டு மனுதாக்கல் செய்தனர். இதன் மீதான
விசாரணை சுப்ரீம் கோர்ட்டில் நீதிபதிகள் ஜே.எஸ்.கேஹர்,
அருண் மிஸ்ரா ஆகியோர் அடங்கிய அமர்வு முன்பு நடந்து
வந்தது.

தமிழக அரசு தரப்பில் அரசு வக்கீல் யோகேஷ் கன்னா,
செல்வி தரப்பில் மூத்த வக்கீல் கவு‌ஷல் யாதவ் ஆகியோர்
ஆஜராகி வாதாடினர்.

இந்த வழக்கின் மீதான விசாரணை முடிவடைந்து தேதி
குறிப்பிடாமல் தீர்ப்பு ஒத்தி வைக்கப்பட்டிருந்தது.
நேற்று இந்த வழக்கின் மீதான தீர்ப்பை சுப்ரீம் கோர்ட்டு
நீதிபதிகள் அருண் மிஸ்ரா, மோகன் எம்.சந்தானகவுடர்
அறிவித்தனர்.

அதில், தமிழக அரசின் மேல்முறையீட்டு மனுவை ஏற்றுக்
கொள்வதாகவும், கடந்த ஆண்டு ஜனவரி மாதம் சென்னை
ஐகோர்ட்டு வழங்கிய தீர்ப்பை ரத்து செய்வதாகவும்
இந்த வழக்கை பூந்தமல்லி கோர்ட்டில் தொடர்ந்து நடத்தலாம்
எனவும் உத்தரவிட்டனர்.
-
--------------------------------------
தினத்தந்தி

ஊழல் வாதிகளை பார்த்தல் செருப்பால் அடிக்கவேண்டும் என்று கூறிய செயல் தலைவருக்கு இது தெரியாமல் பார்த்துக்கொள்ள வேண்டும்