3 முறை இரட்டை சதம் அடித்து ரோகித்சர்மா உலக சாதனை!

இந்தியா - இலங்கை அணிகளுக்கு இடையேயான 2-வது ஒருநாள் போட்டியில் மூன்றாவது முறையாக இரட்டை சதம் அடித்து ரோகித்சர்மா உலகசாதனை படைத்துள்ளார்.


இந்தியாவில் சுற்றுப்பயணம் மேற்கொண்டுள்ள இலங்கை அணி டெஸ்ட் தொடரை இழந்து தற்போது 3 ஒருநாள் போட்டிகள் கொண்ட தொடரில் விளையாடி வருகிறது. இதில் தர்மசாலாவில் நடந்த முதல் ஒருநாள் போட்டியில் இந்திய அணி மோசமான தோல்வியை தழுவியது. அதிலிருந்து மீள்வதற்காக 2 - வது ஒருநாள் போட்டியில் விறுவிறுப்புடன் களமிறங்கியது.

டாஸ் ஜெயித்த இலங்கை அணி பந்துவீச்சை தேர்வு செய்தது. அதன்படி பேட்டிங்கை ஆரம்பித்த இந்திய அணிக்கு ஆரம்பமே அமர்க்களமாக இருந்தது. ஓபனிக் இறங்கிய தவானும், ரோகித்சர்மாவும் அதிரடி காட்ட இலங்கை பந்துவீச்சாளர்கள் என்ன செய்வதென்று தெரியாமல் முழிபிதுங்கினார்.

சீராக சென்ற ஆட்டத்தில் தவான் 68(67) ரன்களை எடுத்து பதிரானா பந்துவீச்சில் கேட்ச் கொடுத்து ஆட்டமிழந்தார். அதன் பின்னர் இறங்கிய ஸ்ரேயாஸ் ஐயர் பொறுப்பான ஆட்டத்தை வெளிப்படுத்தினார். இதற்கிடையில் கேப்டன் ரோகித்சர்மா வெற்றிகரமாக தனது சதத்தை பதிவு செய்தார். மறுமுனையில் அதிரடியாக விளையாடிய ஸ்ரேயாஸ் 88(70) ரன்கள் எடுத்து ஆட்டமிழந்தார்.


இதனையடுத்து விக்கெட் ஒருபுறம் சாய்ந்தாலும், மறுபக்கம் ரோகித்சர்மா தனது அதிரடியை காட்ட இந்திய அணியின் ஸ்கோர் மளமளவென உயர்ந்தது. ஆட்டத்தின் இறுதி ஓவரில் முதல் பந்தில் ஒரு சிக்ஸ் அடித்ததோடு நிதானமாக ஆடி தனது 3 வது இரட்டை சாதத்தை பதிவு செய்தார். இதன் மூலம் உலக வரலாற்றில் ஒருநாள் போட்டியில் 3 முறை இரட்டைசதமடித்த ஒரே வீரர் என்ற பெருமையை ரோகித்சர்மா பெற்றுள்ளார்.

தற்போது 50 ஓவர் முடிவில் இந்திய அணி 392 ரன்களுக்கு 4 விக்கெட்டுகளை பறிகொடுத்துள்ளது. இலங்கை அணி சார்பில் பெரேரா 3 விக்கெட்டுகளையும், பதிரானா 1 விக்கெட்டையும் வீழ்த்தினார்.

நன்றி
IBC தமிழ் நியூஸ்

மீண்டும் மீண்டும் இரட்டை சதம் அடித்த ரோஹித் சர்மாவிட்கு வாழ்த்துக்கள்
-

ரோஹித் ஷர்மாவிற்கு வாழ்த்துக்கள்
-