கிராம மக்களின் அனுமதியோடு கீழடி அகழாய்வு பொருட்கள் சென்னைக்கு பயணம்

திருப்புவனம்: கீழடி அகழாய்வில் கண்டெடுக்கப்பட்ட தொல்லியல் பொருட்கள் கிராம மக்கள் அனுமதியோடு சென்னைக்கு கொண்டு செல்லப்பட்டன.
சிவகங்கை மாவட்டம், திருப்புவனம் அருகே கீழடியில், மத்திய தொல்லியல் துறை சார்பில் 3 கட்டமாக அகழாய்வு நடந்தது. இதில் 5 ஆயிரத்துக்கும் மேற்பட்ட அரிய பொருட்கள் கண்டெடுக்கப்பட்டன. கீழடி சேவை மையத்தில் பாதுகாப்பாக வைக்கப்பட்டிருந்த பொருட்களை, கடந்த மாதம் 2ம் தேதி இரவு லாரி மூலம் சென்னை கொண்டு செல்ல தொல்லியல் துறைகள் அதிகாரிகள் முயற்சித்தனர். இதற்கு எதிர்ப்பு தெரிவித்து கீழடி கிராம மக்கள் லாரியை சிறைப்பிடித்தனர். இங்கேயே அருங்காட்சியகம் அமைத்து பாதுகாக்க வலியுறுத்தினர். இதனைதொடர்ந்து பொருட்கள் சேவை மையத்திலேயே இறக்கி வைக்கப்பட்டன.
இதுதொடர்பாக, திருப்புவனம் தாசில்தார் கமலா தலைமையில் கிராம மக்கள் மற்றும் தொல்லியல் துறை அதிகாரிகளிடையே மூன்று கட்டமாக சமரச பேச்சுவார்த்தை நடந்தது. அப்போது தொல்லியல் பொருட்களை, சென்னை தலைமை செயலகத்தில் உள்ள அருங்காட்சியகத்தில் பாதுகாப்பாக வைக்க பொதுமக்களுக்கு அறிவுறுத்தப்பட்டது. இதனைதொடர்ந்து தொல்லியல் துறை துணை கண்காணிப்பாளர் ராஜேஷ், தொல்லியலாளர் வீரராகவன் ஆகியோரிடம் நேற்று மாலை பொருட்கள் ஒப்படைக்கப்பட்டன. அதன் பிறகு லாரி மூலம் பொருட்கள் சென்னைக்கு கொண்டு செல்லப்பட்டன.
தாசில்தார் கமலா கூறுகையில், ‘‘கீழடியில் அருங்காட்சியகம் அமைத்த பின்னர், அனைத்து பொருட்களையும் கீழடியில் ஒப்படைப்பது, அகழாய்வின்போது பாதிக்கப்பட்ட மரங்களுக்கு இழப்பீடு வழங்குவது குறித்து பொதுமக்கள் விதித்த நிபந்தனையை தொல்லியல் துறை அதிகாரிகள் ஏற்றதால் பொருட்களை எடுத்து செல்ல மக்கள் அனுமதித்தனர்’’ என்றார்.
நன்றி
தினகரன்