ஸ்மார்ட் ரேஷன் கார்டுகள் அறிமுகமான ஆந்திராவில் ஷாப்பிங் மால்களாக உருமாறும் ரேஷன் கடைகள்

ஆம்பூர்: ஸ்மார்ட் ரேஷன் கார்டை முதலில் அறிமுகப்படுத்திய ஆந்திராவில் அடுத்த அதிரடியாக ரேஷன் கடைகளை ஒருங்கிணைந்த ஷாப்பிங் மால்களாக உருமாற்றும் நடவடிக்கையில் முதல்வர் சந்திரபாபு நாயுடு தீவிரம் காட்டி வருகிறார். ஆந்திர முதல்வர் சந்திரபாபு நாயுடு பொதுவினியோகத்துறையில் நவீனத்தை புகுத்த ஆயத்தமாகி வருகிறார். ஏற்கனவே 10 ஆண்டுகளுக்கு முன்பு நாட்டிலேயே முன்மாதிரியாக ரேஷன் கார்டுகள் ஸ்மார்ட் கார்டுகளாக உருமாறின. இதன் தொடர்ச்சியாக மாநிலத்தில் பொது வினியோகத்துறையின் கீழ் வரும் ரேஷன் கடைகளை தரம் உயர்த்தும் நடவடிக்கையில் இறங்கியுள்ளார். இதற்காக தனியாருடன் இணைந்து ‘சந்திரண்ணா வில்லேஜ் ஷாப்பிங் மால்கள்’ என்ற பெயரில் அதிநவீன ஷாப்பிங் மால்களை உருவாக்கி வருகிறார்.
அதுவும் அந்தந்த ரேஷன் கடைகள் இருந்த அதே பகுதிகளில் வர உள்ளன. இந்த இடங்களில் ரேஷன் கடைகளில் விற்ற பொருட்கள் மட்டுமன்றி தனியார் ஷாப்பிங் மால்கள் மற்றும் சூப்பர் மார்க்கெட்டுகளில் விற்கப்படும் சுமார் 500க்கு மேற்பட்ட பொருட்கள் நியாயமான விலையில் விற்கப்படும்.
இந்த ‘சந்திரண்ணா வில்லேஜ் ஷாப்பிங் மால்களில்’ பொது மக்களுக்கு தேவையான மளிகை பொருட்கள், காய்கறிகள், வாசனை பொருட்கள், பாத்திரங்கள், உடைகள், மருந்து பொருட்கள், விவசாய கருவிகள், அலங்கார பொருட்கள், அத்தியாவசிய பொருட்கள் என அத்தனை பொருட்களும் கிடைக்கும் என்று ெதரிவிக்கின்றனர். விற்பனை விலையில் இருந்து சுமார் 20 சதவீதம் வரை குறைத்து விற்கப்படுவதால் நுகர்வோர் பயனடைவர். இதுவரை தனியார் உதவியுடன் ஆந்திராவில் 6500 ரேஷன் கடைகளுடன் இணைந்த ஷாப்பிங்மால்கள் துவங்கப்பட்டுள்ளது. 2018 ஜனவரியில் ஆந்திர மாநிலத்தில் சுமார் 29 ஆயிரம் ரேஷன் கடைகளை ‘சந்திரண்ணா வில்லேஜ் ஷாப்பிங் மால்’களாக மாற்ற ஆந்திர அரசு தீவிர முயற்சிகளை செய்து வருகிறது.
5 லட்சம் மதிப்பில் இந்த ஷாப்பிங் மால்கள் ஒவ்வொரு கிராமத்திலும் அமைக்கப்படும். இதுமட்டுமன்றி ரேஷன் அட்டை இல்லாதவர்களும் இந்த கடைகளில் குறைந்த விலையில் பொருட்களை பெறலாம் என ஆந்திர மாநில சிவில் சப்ளைத்துறை அமைச்சர் பிரதிபாதி புல்லா ரவி அறிவித்திருப்பது அந்த மாநில மக்களை மகிழ்ச்சியடைய செய்துள்ளது. இந்த மால்களில் 350 முதல் 550 பிராண்ட் பெயர் தாங்கிய பொருட்களும், 250 முதல் 300 வரையிலான பிராண்ட் இல்லாத பொருட்களும் விற்க முடிவு செய்யப்பட்டுள்ளது. இதுகுறித்து ஆந்திர மாநில பொதுவிநியோகத்துறை அதிகாரி ஒருவர் கூறுகையில், ‘5 லட்சத்தில் ஒவ்வொரு ரேஷன் கடையும் சந்திரண்ணா ஷாப்பிங் மாலாக மாற்றம் பெறும். இதற்கான 50 சதவீத தொகையை ரேஷன் கடை சார்பாகவும், 25 சதவீதத்தை மாநில அரசும், மீதமுள்ள 25 சதவீத முதலீட்டை பிரதம மந்திரி முத்ரா யோஜனா அல்லது வங்கி கடன்கள் மூலம் பெறப்படும். வரும் நாட்களில் வங்கி சேவை, மொபைல் உள்ளிட்ட தொலை தொடர்பு கருவிகள், மருந்துகள் மற்றும் வீட்டு உபயோக மற்றும் இதர எலக்ட்ரானிக் பொருட்கள் விற்பனையும் இங்கு நடக்கும்’ என்றார்.
நன்றி
தினகரன்