2014 ஏப்ரலில் இருந்து மோடி அரசு விளம்பரத்திற்கு ரூ. 3,755 கோடி செலவு செய்து உள்ளது ஆர்டிஐ தகவல்

புதுடெல்லி,


மத்திய தகவல் மற்றும் ஒளிபரப்பு அமைச்சகம் அளித்து
உள்ள ஆர்.டி.ஐ. பதிலில் மோடியின் அரசு மின்னணு ஊடகங்கள்,
அச்சு ஊடகங்கள் மற்றும் வெளிப்புற விளம்பரத்திற்கு
ரூ. 37,54,06,23,616, செலவு செய்து உள்ளது என தெரிவிக்கப்பட்டு
உள்ளது.

கிரேட்டர் நொய்டாவை சேர்ந்த சமூக ஆர்வலர் ராம்வீர் தன்வார்
இந்த பதிலை பெற்று உள்ளார். ஆர்.டி.ஐ. மூலம் பெறப்பட்டு
உள்ள தகவலின்படி மத்திய அரசு ரேடியோ, டிஜிட்டல் சினிமா,
தூர்தர்ஷன், இன்டர்நெட், எஸ்எம்எஸ் மற்றும் டிவி போன்ற
மின்னணு ஊடகங்களில் வெளியிடப்பட்ட விளம்பரத்திற்கு
ரூ. 1,656 கோடி செலவு செய்து உள்ளது. அச்சு ஊடகங்களில்
வெளியான விளம்பரங்களுக்கு ரூ. 1,698 கோடி செலவு செய்து
உள்ளது.

பேனர்கள், போஸ்டர்கள், காலண்டர்கள் போன்ற பிற வெளிப்புற
விளம்பரங்களுக்கு ரூ. 399 கோடி செலவு செய்து உள்ளது என
தெரியவந்து உள்ளது.

விளம்பரத்திற்கு செலவு செய்யப்பட்ட தொகையானது
சில முக்கியமான அமைச்சகம் மற்றும் முக்கியமான
திட்டங்களுக்கு அரசு ஆண்டு பட்ஜெட்டில் ஒதுக்கும் தொகையை
விட அதிகமானது.

அரசு மாசு கட்டுப்பாட்டிற்கு அரசு ஒதுக்கும் தொகையானது
கடந்த மூன்று வருடங்களாக ரூ. 56.8 கோடியாக உள்ளது.
பிரதமர் மோடி மாதம் தோறும் வானொலியில் உரையாற்றி
வருகிறார், இதற்காக ஜூலை 2015 வரையில் விளம்பரம்
செய்யப்பட்டதற்கு ரூ. 8.5 கோடி செலவு செய்யப்பட்டு உள்ளது
என மற்றொரு ஆர்.டி.ஐ. மூலம் தெரியவந்தது.

கடந்த 2015-ம் ஆண்டு டெல்லி மாநில ஆம் ஆத்மி அரசு
விளம்பரத்திற்கு ரூ. 526 கோடி செலவு செய்ததற்கு காங்கிரஸ்
மற்றும் பா.ஜனதா கடுமையாக விமர்சனம் செய்தன என்பது
குறிப்பிடத்தக்கது.
-
------------------------------------
தினத்தந்தி