மென்பொருளில் தகவல் புதுப்பிக்காததால் பல துறையினருக்கு புதிய ஊதியம் வழங்குவதில் சிக்கல்

கருவூலத் துறையின் மென்பொருளில் தகவல்கள் புதுப்பிக்கப்படாத காரணத்தால், தலைமைச் செயலகத்தின் சில துறைகள் உள்பட பல்வேறு அரசு அலுவலர்களுக்கு புதிய ஊதிய விகிதங்களின் அடிப்படையில் இந்த மாதம் சம்பளம் வழங்கப்படவில்லை.
அரசு ஊழியர்கள், ஆசிரியர்களுக்கு ஏழாவது ஊதியக் குழு பரிந்துரைகளின் அடிப்படையில் கடந்த அக். 1-ஆம் தேதி முதல் புதிய ஊதிய விகிதங்கள் வழங்கிட தமிழக அரசு உத்தரவிட்டுள்ளது. ஊதிய நிலுவைத் தொகையானது தனியாக நவம்பர் மாத மத்தியில் அளிக்கப்படும் எனவும் அறிவிப்பு வெளியிடப்பட்டு இருந்தது.
புதிய ஊதிய விகிதம்: அடிப்படை ஊதியம், தர ஊதியம் என அனைத்து நிலைகளிலும் மாறுபாடு இருப்பதால் அரசு ஊழியர்கள், ஆசிரியர்களுக்கான ஊதியப் பட்டியலிலும் திருத்தம் செய்ய வேண்டியிருக்கிறது. இந்தப் பணிகளை ஒவ்வொரு அரசு அலுவலகங்களிலும் உள்ள ஊதியம் வழங்கும் அலுவலர் மேற்கொள்வார். அதேசமயம், ஊதியம் வழங்கும் பணியை மேற்கொண்டு வரும் கருவூலத் துறையிலும் அதற்கென தனியான மென்பொருள் உள்ளது.
புதிய ஊதிய விகிதங்கள் நடைமுறைப்படுத்தப்பட்டதால், அதற்கேற்ப கருவூலத் துறையின் மென்பொருளிலும் திருத்தங்கள் செய்ய வேண்டும். இந்தப் பணியை தேசிய தகவலியல் மையம் மேற்கொள்ளும்.
ஊதிய விகிதங்கள் இல்லை: தலைமைச் செயலகத்தின் பொதுத்துறை, சுகாதார இயக்ககம் என பல்வேறு அரசுத் துறைகளில் பணியாற்றும் ஊழியர்களுக்கான புதிய ஊதிய விகிதங்கள் கருவூலத் துறையின் மென்பொருளில் திருத்தியமைக்கப்பட வில்லை. இதுகுறித்து, அரசுத் துறை ஊழியர்கள் கூறுகையில், புதிய ஊதிய நிலுவைத் தொகை குறித்த காலத்தில் அளிக்கப்படவில்லை. இந்தத் தொகையும் நவம்பர் மாத இறுதியிலேயே கிடைக்கப் பெற்றுள்ளது. இந்த நிலையில், கருவூலத் துறையின் மென்பொருளில் புதிய ஊதிய விகிதங்கள் மாற்றியமைக்கும் பணிகள் மிகவும் தாமதமாகவே நடைபெறுகின்றன. இதனால், அந்தந்த கருவூலத் துறையில் உள்ள தரவுகளும், விவரங்களும் புதிய ஊதிய விகிதத்துக்கு மாற்றப்பட்ட பிறகே ஊழியர்களுக்கு வழங்கப்படுகின்றன. ஆனால் இந்த புதுப்பிப்புப் பணி பல இடங்களில் நடைபெறவே இல்லை. இதனால், மென்பொருளில் திருத்தங்கள் செய்யப்படாதவர்களுக்கு நவம்பர் 30-ஆம் தேதி புதிய ஊதிய விகிதப்படி ஊதியங்கள் அளிக்கப்படவில்லை. டிசம்பர் 31-ஆம் தேதி புதிய ஊதிய விகிதப்படி ஊதியங்கள் கிடைக்கும் என அதிகாரிகள் தெரிவித்தனர்.
நன்றி
தினமணி