சமூக அக்கறை தேவை

தமிழகத்தில் வருங்காலத்தில் பள்ளி, கல்லூரிகள் உள்ளிட்ட கல்வி நிறுவனங்களில் அரசு மற்றும் தனியார் பொருட்காட்சிகள் நடத்தக் கூடாது; கல்வி நிறுவனங்களை படிப்பதற்கு மட்டுமே பயன்படுத்த வேண்டும் என்று பொது நலன் வழக்கு ஒன்றில் சென்னை உயர் நீதிமன்றம் அதிரடி உத்தரவு பிறப்பித்துள்ளது. மாநிலத்தில் இந்த பிரச்னை மட்டுமின்றி, இதுபோல பல விஷயங்களில் நீதிமன்றம் தலையிட வேண்டிய சூழ்நிலையே நிலவுகிறது. பள்ளி, கல்லூரி மாணவர்களை அரசு விழாக்களுக்கு பஸ்களில் அழைத்துச் செல்லக் கூடாது என்று சமீபத்தில் நீதிமன்றம் தடை உத்தரவு பிறப்பித்தது. அதேபோல், பள்ளி, கல்லூரி பேருந்துகளை முறையாக பராமரிக்க வேண்டும்; அது தொடர்பான விதிமுறைகளை மிகுந்த கவனத்துடன் பரிசீலனை செய்ய வேண்டும் என்று அறிவுறுத்தியது.
மாநிலம் முழுவதும் உள்ள அரசு பள்ளி, கல்லூரி கட்டிடங்கள் பொதுப்பணித் துறையால் பராமரிக்கப்பட்டு வருகின்றன. சமீபத்தில் மேற்கொள்ளப்பட்ட ஆய்வில் ஆயிரத்துக்கும் மேற்பட்ட கட்டிடங்கள் பழுதாகி இருப்பதும் அவற்றை உடனடியாக இடித்துவிட்டு புதிய கட்டிடங்கள் கட்ட வேண்டும் என்றும் அரசிடம் சமர்ப்பிக்கப்பட்ட அறிக்கையில் சுட்டிக்காட்டப்பட்டுள்ளது. அனைத்து துறைகளிலும் முன்னிலை பெற்ற மாநிலமாக ஒரு காலத்தில் திகழ்ந்த தமிழகம், கடந்த 10 ஆண்டுகளாக பள்ளி பாடத்தில் எந்த மாற்றமும் செய்யாததால், உயர் கல்வியில் தேசிய அளவில் போட்டிகளை நம்பிக்கையுடன் எதிர்கொள்ள முடியாத நிலை மாணவ, மாணவியருக்கு ஏற்பட்டது. இப்போதுதான் பள்ளி பாடத்திட்டத்தில் மாற்றம் செய்யும் நடவடிக்கையில் அரசு இறங்கி உள்ளது.
தமிழகம் முழுவதும் பெரும் எதிர்ப்பு கிளம்பியபோதிலும் இளைஞர் சமுதாயத்தை சீரழிக்கும் மதுபான கடைகளை மூடுவதற்கு ஆட்சியாளர்கள் விரும்பவில்லை. காரணம், வருவாய். சமுதாயம் எப்படி போனால் என்ன என்ற சமூக அக்கறை இல்லாததைத்தான் இது காட்டுகிறது. தேசிய நெடுஞ்சாலைகளில் உள்ள மதுபான கடைகளை மூட உச்ச நீதிமன்றம் உத்தரவிட்டால், அந்த கடைகளை மூடிவிட்டு வேறு பகுதிகளில் அந்த கடைகளை திறக்கதான் அரசு முயற்சி செய்கிறதே தவிர எதற்காக மூடச் சொன்னார்கள் என்கிற சிந்தனையே இல்லை என்றுதான் சொல்ல வேண்டும். மக்களின் அடிப்படை வாழ்வாதாரத்தை பாதிக்கும் மணல் குவாரிகளை மூட நீதிமன்றம் தலையிட வேண்டிய நிலைதான் நிலவுகிறது. பக்கத்து மாநிலமான கேரளா 15 ஆண்டுகளுக்கு முன்பே விழித்துக் கொண்டு இயற்கை வளத்தை பாதுகாக்க ஆறு, நதிகளில் மணல் எடுக்க தடை விதித்தது. ஆனால், இங்கு தடையின்றி மணல் அள்ளி பெரும் இழப்பை ஏற்படுத்திவிட்டார்கள். இதையும் ஆட்சியாளர்கள் உணர்ந்ததாக தெரியவில்லை.
இப்படி எல்லா துறைகளிலும் நீதிமன்றங்கள் தலையிட்டு மக்களை காக்க வேண்டிய துரதிருஷ்டவசமான நிலையே நிலவுகிறது. சமுதாய அக்கறை இல்லாததே இதற்கு பிரதான காரணம் என்கின்றனர் சமூக ஆர்வலர்கள். எல்லா துறைகளிலும் தமிழகம் முன்னேறியபோதிலும் அரசியல் ரீதியாக முதிர்ச்சி பெறாததே இதற்கு காரணம் என்று சொன்னால் அதில் சந்தேகம் இல்லை என்றுதான் சொல்ல வேண்டும். இந்த நிலை மாற வேண்டும். மாற்றம் ஒன்றே முன்னேற்ற திற்கான வழி.
நன்றி
தினகரன்