பிரச்னைக்குரிய சமூக வலைதளங்கள், செயலிகளுக்கு தடை விதிக்க பரிசீலனை: மத்திய அரசுக்கு நீதிமன்றம் உத்தரவு

பிரச்னைக்குரிய சமூக வலைதளங்கள், செல்லிடப்பேசி செயலிகளை (ஆப்) நமது நாட்டில் தடை செய்வது குறித்துப் பரிசீலிக்க வேண்டுமென்று மத்திய அரசுக்கு தில்லி உயர் நீதிமன்றம் உத்தரவிட்டுள்ளது.
வெளிநாடுகளில் இருந்து செயல்படும் சில சமூக வலைதளங்கள், செல்லிடப்பேசி செயலிகளில் மோசமான மற்றும் தவறான கருத்துகள் அதிகம் பரப்பப்படுகின்றன. இதனை அனுப்புவது யார் என்பதைக் கண்டறியும் வசதியையும் அந்த வலைதள, செயலி நிறுவனங்கள் அளிப்பது இல்லை.
சவூதி அரேபியாவில் இருந்து செயல்படும் சராஹா செயலி சமீபத்தில் இந்தியாவில் மிக அதிகமான எண்ணிக்கையில் பதிவிறக்கம் செய்யப்பட்டது. அந்த சமூக வலைதளத்தையும் அதிகம் பேர் பயன்படுத்தினர். ஒருவர் தான் யார் என்று தன்னை காட்டிக் கொள்ளாமல், மற்ற நபர்களைப் பற்றி விமர்சனத்தை அவர்களுக்கு தெரிவிக்க முடியும் என்பதே இந்த செயலியின் சிறப்பம்சமாகும். இதேபாணியில் உருவாக்கப்பட்டுள்ள பல்வேறு செயலிகள் இப்போது பயன்பாட்டில் உள்ளன. இதில் ஒருவரைக் குறித்து ஆக்கப்பூர்வமான விமர்சனங்களை முன்வைக்க முடியும் என்றாலும், பலரும் தங்கள் காழ்ப்புணர்ச்சியை வெளிகாட்டும் வகையில்தான் இதனைப் பயன்படுத்துகின்றனர்.
இந்நிலையில், இதுபோன்ற செயலிகள், சமூக வலைதளங்களை தடை செய்ய மத்திய அரசுக்கு உத்தரவிடக் கோரி வழக்குரைஞர் ஷதாப் ஹுசைன் கான், தில்லி உயர் நீதிமன்றத்தில் பொது நல மனு தாக்கல் செய்தார். இதுபோன்ற செயலிகளால் தனிமனிதர்களின் மனநலன் பாதிக்கப்படுகிறது. ஒருவர் மீது மற்றொருவருக்கு உள்ள நம்பிக்கையை சிதைத்து சமூக அமைதிக்கு கேடு ஏற்படுகிறது. எனவே அவற்றைத் தடை செய்ய வேண்டுமென்று அந்த மனுவில் வலியுறுத்தியிருந்தார்.
இந்த மனு நீதிபதி கீதா மிட்டல் தலைமையிலான அமர்வு முன்பு வெள்ளிக்கிழமை விசாரணைக்கு வந்தது. அப்போது, மனுதாரரின் கோரிக்கை குறித்து மத்திய தகவல் தொழில்நுட்பத் துறை அமைச்சகம் மற்றும் உள்துறை அமைச்சகம் பரிசீலிக்க வேண்டும் என்று நீதிபதிகள் உத்தரவிட்டனர்

நன்றி

தினமணி