யார் ‘பெரியவங்க’? (ஒருபக்கக் கதை)

யார் ‘பெரியவங்க’? (ஒருபக்கக் கதை)

அரசாங்க அதிகாரி , ஊழியர்களை ஏவிக்கொண்டிருந்தார் ! ‘இதை எல்லாம் அடுக்கி வைக்கக் கூடாதா?’ என்று அலறிக்கொண்டிருந்தார்!
அப்போது ஒரு பையன் வந்தான்!
பையன் , “சார்! எங்கப்பா இறந்துவிட்டார் சார்!” என்றான் அதிகாரியிடம் !
“உங்கப்பா பேர் என்ன?” – உறுமும் குரலில் அதிகாரி.

“கோதண்டம் சார்” - பையன்.

கோதண்டம் ஓய்வு பெற்ற ஒரு பணியாளர் என்பது அதிகாரிக்குத் தெரியும்.

உடனே அதிகாரி, எதுவும் பையனிடம் பேசாமல் , “சரிப்பா! நீ கிளம்புப்பா!” என்றார் !

அப்போது , பதறிப்போய் , பக்கத்தில் கேட்டுக்கொண்டிருந்த கீழ்நிலை ஊழியர்கள் , “இருப்பா! கீழ் அறையில் பெரியவங்கள்ளாம் இருக்காங்க! அவங்க கிட்ட சொல்லுப்பா!” என்று பையனிடம் கூறி அனுப்பினர்!

அதிகாரிக்குச் சவுக்கடி கொடுத்தது போல இருந்தது !

‘பெரியவங்க’ என்று அக் கீழ்நிலை ஊழியர்கள் சொன்னது , அதிகாரிக்குக் கீழே, தரைத்தளத்தில், தனக்குக் கீழே பணிபுரிபவர்களைத்தான் என்பது அதிகாரிக்குத் தெரிந்ததுதான் !

அதுதான் அவருக்குச் சவுக்கடி !

‘பெரியவங்க’ என்றால் , பதவியால் அச் சொல் வருவதில்லை என்பது அந்த அதிகாரிக்கு அப்போது புரிந்தது !

தந்தை இறந்ததாக ஊழியரின் மகன் சொன்னதும் , அதற்கான வருத்தத்தைத் தெரிவிப்பதோடு , செய்யவேண்டிய பிற கடமைகளைப் பர்றி எந்த அக்கறையும் இல்லாமல் தான் அவனை விரட்டிவிட்டதால் , தனக்குக் கீழ் நிலைப் பணியாளர்கள் , தன்னைப் ‘பெரியவங்க’ பட்டியலில் சேர்க்கவில்லை! என்பதை அந்த அதிகாரி அப்போது உணர்ந்தார்!

போகட்டும், அப்போதாவது உணர்ந்தாரே?

***