அதிநவீன பெட்டிகளுடன் களமிறங்கும் சேரன் ரயில் நாளை முதல் தொடக்கம்!

கோயம்புத்தூர் - சென்னை சென்ட்ரல் சேரன் விரைவு ரயில் பெட்டிகள் அதிநவீன எல்.எச்.பி. பெட்டிகளாக மாற்றப்பட்டுள்ளன.


இந்திய ரயில்வே, ரயில் பயணத்தை பாதுகாப்பானதாக மாற்றும் நடவடிக்கைகளின் ஒரு பகுதியாக, அனைத்து ரயில்பெட்டிகளும் பாதுகாப்பான எல்.எச்.பி ரயில்பெட்டிகளாக மாற்றப்பட்டு வருகின்றன. அதன்படி, கோயம்புத்தூர் - சென்னை சென்ட்ரல் இடையே இயக்கப்படும் சேரன் விரைவு ரயிலின் பெட்டிகள் அதிநவீன மற்றும் பாதுகாப்பான எல்.எச்.பி (லிங்க் ஹாப்மான் புஷ் அல்ஸ்தாம்) ரயில் பெட்டிகளாக மாற்றப்பட்டுள்ளன. இந்த நவீன ரயில்பெட்டிகள் பொறுத்தப்பட்ட சேரன் விரைவு ரயில், கோயம்புத்தூரில் இருந்து நாளை முதலும், சென்னை சென்ட்ரலில் இருந்து நாளை மறுநாள் முதலும் இயக்கப்படுகிறது.
இந்த ரயில்களில் பயோடாய்லெட்கள், மேம்படுத்தப்பட்ட நவீன ஸ்பிரிங் பொறுத்தப்பட்ட போகிகள், விபத்துகளின்போது ஒரு ரயில்பெட்டி மற்ற ரயில்பெட்டியின் மீது மோதி பெரும் சேதம் விளைவிப்பதைத் தவிர்க்கும் வகையில் சென்டர் பப்பர் கப்ளர் இணைப்பு, தீப்பிடிக்காத பிட்டிங்குகள் மற்றும் ரயில்களின் உள்ளே சப்தம் கேட்பதைத் தவிர்க்கும் வகையில் இன்சுலேஷன் போன்ற வசதிகளும் செய்யப்பட்டுள்ளன. மேலும், பயணிகள் வசதிக்காக பெரிய ஜன்னல்கள், கால் வழுக்காத பிவிசி தரைவிரிப்புகள், ரயில்பெட்டிகள் இடையே தானியங்கிக் கதவுகள் போன்ற மேம்பாடுகள் செய்யப்பட்டுள்ளன. 22 ரயில்பெட்டிகள் கொண்ட 2 ரேக்குகள் சேலம் கோட்டத்துக்கு சேரன் விரைவு ரயிலுக்காக வந்துள்ளன. இவை கோயம்புத்தூரில் உள்ள ரயில்பெட்டி பணிமனையில் பராமரிக்கப்படும் என்று ரயில்வே அதிகாரிகள் தெரிவித்துள்ளனர்.
நன்றி
விகடன்