நள்ளிரவில் சென்னை கல்லூரியில் பயங்கர கலவரம்!

சென்னை: தேர்வில் பிட் அடித்ததை கண்டுபிடித்து பேராசிரியர் திட்டியதால், மனமுடைந்த மாணவி தூக்கிட்டு தற்கொலை செய்துகொண்டார். இதனால் சோழிங்கநல்லூர் சத்யபாமா கல்லூரி விடுதியை தீவைத்து கொளுத்தி மாணவர்கள் பயங்கர வன்முறையில் ஈடுபட்டனர். அங்கு போலீசார் குவிக்கப்பட்டுள்ளனர். 



தெலங்கானா மாநிலம் ஐதராபாத்தை சேர்ந்தவர் ராஜாரெட்டி. இவரது மகள் துருவராக மவுலிகா (19), மகன் ராகேஷ். இருவரும் இரட்டைக் குழந்தைகள். ஐதராபாத்தில் பள்ளி படிப்பை முடித்தனர். பின்னர், இருவரும் கடந்த ஜூன் மாதம் சென்னை செம்மஞ்சேரியில் உள்ள தனியார் பொறியியல் கல்லூரியில் பி.இ.கம்ப்யூட்டர் சயின்ஸ் படிப்பில் சேர்ந்தனர். சென்னையில் உறவினர்கள் யாரும் இல்லாததால், கல்லூரியின் விடுதியிலேயே தங்கி இருவரும் படித்து வந்தனர். 
கல்லூரியில் செமஸ்டர் தேர்வு நடந்து வருகிறது. அதன்படி, முதலாமாண்டு மாணவர்களுக்கு நேற்று செமஸ்டர் தேர்வு நடந்தது. துருவராக மவுலிகாவும், அவரது சகோதரர் ரகேஷூம் வெவ்வேறு அறையில் செமஸ்டர் தேர்வு எழுதினர். தேர்வு நடந்துகொண்டு இருந்தபோது, ஒரு துறையின் தலைவர் ஆய்வுக்கு வந்துள்ளார். அப்போது, மவுலிகா நடவடிக்கையில் அவருக்கு சந்தேகம் எழுந்தது. இதனால் அவரை ஆசிரியர் தீவிரமாக கண்காணித்து உள்ளார். அப்போது, மவுலிகா பிட்டை (துண்டு சீட்டு) மறைத்து வைத்து காப்பி அடித்துக் கொண்டிருந்ததை கண்டுபிடித்தார். உடனே, அந்த துறை தலைவர் மவுலிகாவை கையும் களவுமாக பிடித்து, பிட் பேப்பரை பறிமுதல் செய்து, தேர்வு பேப்பரை வாங்கிக்கொண்டு அவரை அனைவரது முன்னிலையில் திட்டி வகுப்பறையை விட்டு வெளியே அனுப்பி உள்ளார். மேலும், ‘‘நீ விடுதிக்கு சென்று அனைத்து பொருட்களையும் எடுத்துக் கொண்டு ரெடியா இரு. உனக்கு டிசி கொடுத்து அனுப்புகிறேன்’’ என மாணவி மவுலிகாவை துறை தலைவர் மிரட்டி உள்ளதாகவும் கூறப்படுகிறது. 
நன்றி
விகடன்

இதனால், மனமுடைந்த மவுலிகா அவரிடம் வெகு நேரமாக கெஞ்சியுள்ளார். இருப்பினும் துறை தலைவர் அவரது முடிவில் உறுதியாக இருந்துள்ளார். இதனால் அவமானம் தாங்காமல் மவுலிகா அங்கிருந்து அழுதபடியே விடுதிக்கு சென்றுவிட்டார். செமஸ்டர் தேர்வு மதியம் முடிந்த பிறகு மவுலிகாவின் சகோதரர் அவரது அறைக்கு சென்றுள்ளார். பின்னர், தனது செல்போனை எடுத்து பார்த்துள்ளார். அப்போது, அவரது சகோதரி மவுலிகாவிடம் இருந்து தான் தற்கொலை செய்து கொள்வதாக ஒரு குறுஞ்செய்தியும், கையை அறுத்துக் கொள்வது போன்று ஒரு வீடியோவும் வந்திருந்தது. இதனால் அதிர்ச்சியடைந்த ராகேஷ் சகோதரி விடுதிக்கு பதறியடித்து ஓடினார். பின்னர், வார்டன் உதவியுடன் மவுலிகா அறைக்கு சென்றுள்ளார். அங்கு அவரது அறையின் கதவு உள்பக்கமாக பூட்டப்பட்டிருந்தது. கதவை பலமுறை தட்டியும் மவுலிகா திறக்கவில்லை. இதனால், சந்தேகமடைந்த ராகேஷ் மற்றும் வார்டன் கதவை உடைத்து உள்ளே சென்று பார்த்தனர். அப்போது, மவுலிகா மின்விசிறியில் தூக்கில் தொங்கிக் கொண்டிருந்தார். உடனே, அவரை மீட்டு கல்லூரி வளாகத்தில் உள்ள மருத்துவமனைக்கு அழைத்து சென்றனர். அங்கு பரிசோதித்த டாக்டர்கள் மவுலிகா ஏற்கனவே இறந்துவிட்டதாக தெரிவித்தனர்.