இளம் வயதில் ஆபாச படம் பார்த்திருக்கிறேன்: பரீக்கர்

பனாஜி:
இளம் வயதில் ஆபாச படங்களை பார்த்ததாக கோவா முதல்வர்
மனோகர் பரீக்கர் கூறியுள்ளார்.

கலந்துரையாடல்
குழந்தைகள் தினத்தை முன்னிட்டு பள்ளி குழந்தைகளுடன்
கோவா முதல்வர் பாரீக்கர் கலந்துரையாடினார். அப்போது
அவரிடம், இளம் வயதில் எந்த மாதிரியான படங்களை
பார்த்தீர்கள் என மாணவர்கள் கேள்வி எழுப்பினர்.

அதிர்ச்சி
அதற்கு பரீக்கர் அளித்த பதில்: இளம் வயதில் நான் ஆபாச
படங்களை பார்த்துள்ளேன். தற்போது, எங்களது காலத்தில்
இருந்த ஆபாச படங்களை விட, நீங்கள் மோசமான
காட்சிகளை டிவியில் பார்க்கிறீர்கள்.

என் இளம் வயதில் பிரபலமான ஆபாச படம் ஒன்று சினிமா
தியேட்டரில் வெளியானது. நானும், எனது சகோதரரும் அந்த
படத்திற்கு சென்றோம். இடைவேளையில், சினிமா
தியேட்டரில் விளக்குகள் போட்ட போது, அருகில் எங்களது
பக்கத்து வீட்டுக்காரர் அமர்ந்திருந்ததை பார்த்து அதிர்ச்சியில்
உறைந்தோம்.

அவர், எங்களது தாயாருடன் அடிக்கடி பேசுவார்.
நாங்கள் செத்தோம் என எனக்கு நானே கூறிக்கொண்டேன்.

திட்டம்

உடனடியாக நானும் எனது சகோதரனும் உடனடியாக, படத்தின்
பாதியிலேயே அங்கிருந்து கிளம்பி வீட்டிற்கு ஓடி வந்தோம்.
வழியில் பிரச்னையை சமாளிக்க திட்டம் தீட்டினோம்.

அதன்படி, வீட்டிற்கு வந்ததும் நான் எனது தாயாரிடம் சென்று,
நாங்கள் ஒரு படத்திற்கு சென்றோம். ஆனால், அந்த படம்
மோசமாக இருக்கும் என தெரியாது. இதனால்பாதியில் கிளம்பி
வந்துவிட்டோம் என சாதாரணமாக கூறினேன்.

அங்கு நமது பக்கத்து வீட்டுக்காரரும் வந்ததாக கூறிவிட்டு
அமைதி காத்தோம்.

மறுநாள் எதிர்பார்த்தது போல், பக்கத்து வீட்டுகாரரும்,
எனது தாயாரைஅழைத்து, நாங்கள் ஆபாச படத்திற்கு
சென்றதாக கூறினார். அதற்கு எனது தாயார் அவரிடம்,
நாங்கள் எந்த படத்திற்கு சென்றோம் என்பது தனக்கு தெரியும்.
நீ ஏன் அந்த படத்திற்கு சென்றாய் ? என கேள்வி எழுப்பினார்.
இவ்வாறு அவர் கூறினார்.
-
----------------------------------
தினமலர்