தமிழகம் முழுவதும் ஸ்மார்ட் கார்டு மூலம் ரேஷனில் பொருட்கள் வழங்கப்படுகிறதா?

வேலூர்: ஸ்மார்ட் கார்டு மூலம் முறையாக பொதுவினியோக பொருட்கள் வழங்கப்படுகிறதா என்று ரேஷன் கடைகளில் ஆய்வு நடத்த வேண்டும் என்று வழங்கல் அதிகாரிகளுக்கு பொதுவினியோகத்துறை உத்தரவிட்டுள்ளது. தமிழகம் முழுவதும் உள்ள 34 ஆயிரத்து 773 ரேஷன் கடைகளில் கடந்த ஏப்ரல் மாதம் முதல் ஸ்மார்ட் ரேஷன் கார்டுகள் மூலம் பொதுவினியோகப் பொருட்கள் வழங்கப்பட்டு வருகிறது. முறைகேடுகளை தடுக்க தான் இந்த ஸ்மார்ட் ரேஷன் கார்டு கொண்டுவரப்பட்டது. தற்போது இந்த கார்டுகள் மூலமாகவும் முறைகேடுகள் நடந்து வருகிறது என்று பல்வேறு புகார்கள் வருகிறது. அதாவது புதிதாக அச்சிடப்பட்டு வரும் ஸ்மார்ட் கார்டுகளை குடும்ப அட்டைதாரர்களுக்கு வழங்காமலேயே சில ரேஷன் ஊழியர்கள் பாயின்ட் ஆப் சேல் கருவிகளில் ஸ்கேன் மற்றும் பதிவு செய்து பொருட்களை ஜோராக பிளாக்கில் விற்பனை செய்து வருகின்றனர்.

மேலும் ஸ்மார்ட் ரேஷன் கார்டுகள் இருந்தும் குடும்ப அட்டையிலேயே பொதுவினியோக பொருட்களை வாங்கி வருகின்றனர். எனவே இந்த முறைகேடுகளை தடுக்க ஸ்மார்ட் கார்டு மூலம் முறையாக பொதுவினியோக பொருட்கள் வழங்கப்படுகிறதா என்று ரேஷன் கடைகளில் ஆய்வு நடத்த வேண்டும் என்று வழங்கல் அதிகாரிகளுக்கு பொதுவினியோகத்துறை உத்தரவிட்டுள்ளது. இதுகுறித்து அதிகாரிகளிடம் கேட்டபோது, `ஒவ்வொரு மாவட்டங்களில் உள்ள ரேஷன் கடைகளில் மொத்தம் எத்தனை ரேஷன் கார்டுகள் உள்ளது. இதில் எத்தனை கார்டுகள் ஸ்மார்ட் கார்டுகளாக வந்துள்ளன. மீதம் எத்தனை கார்டுகள் பழைய குடும்ப அட்டைகளாகவே உள்ளது. இதில் ஸ்மார்ட் கார்டு மூலம் முறையாக பொதுவினியோக பொருட்கள் வழங்கப்படுகிறதா?, ஸ்மார்ட் கார்டு வாங்கியவர்களின் பழைய அட்டைக்கு கேன்சல்டு என்று சீல் போடப்பட்டதா? என்பது உள்ளிட்ட பல்வேறு பணிகளை ஆய்வு செய்ய வழங்கல் அதிகாரிகளுக்கு பொதுவினியோகத்துறை உத்தரவிட்டுள்ளது’’என்றனர்.
நன்றி
தினகரன்