மலேசியாவில் இந்தியக் குடிமக்கள் எப்படி காணமல் போனார்கள்?

-Manjit Bhatia

கடந்த புதன்கிழமை எல்லாச் செய்தித்தாள்களிலும் மலேசியா வந்த 39,000 இந்திய குடிமக்கள் மாயமானார்கள் என்பதே தலைப்புச் செய்தி. அதாவது விசா காலம் தாண்டி இங்கேயே தங்கிவிட்டார்கள். அல்லது தடயமின்றி எங்கோ சென்றுவிட்டார்கள்.

குடிநுழைத்துறை வெளியிட்டுள்ள புள்ளிவிவரம் இது. கடந்த ஆண்டு ஜூன் மாதத்திலிருந்து இவர்கள் காணாமல்போய்விட்டனராம்.

இதைக் கண்டுச்சொல்ல இவ்வளவுகாலம் ஆனது ஏன்?

மலேசியக் குடிகளோ, குடிகள்-அல்லாதாரோ, நாட்டுக்குள் வரும்-போகும் அத்தனைப் பேரின் தகவல்களும் குடிநுழைத்துறையின் கணினி மையத்தில் பதிவு செய்யப்பட்டிருக்கும். பல்லூடகக் கணினி பெருவழி என்றெல்லாம் பெருமைப்பட்டுக்கொள்கிறோம்.

குடிமக்களின் அரசியல் விருப்புவெறுப்புகளைப் பற்றியெல்லாம் தீவிரமாகக் கண்காணிக்கும் நாடு என்று பெயர்பெற்றிருக்கும் மலேசியாவில், 39,000 அந்நியர்கள் தலைமறைவானதைக் கண்டுபிடிக்க முடியாமல் போனது எப்படி?

“விசா” காலம் தாண்டியும் நாட்டில் தங்கியுள்ள இந்த இந்தியர்களைப் பொறுப்பற்ற சில முதலாளிகள் வேலைக்கு வைத்திருக்கக்கூடும் என்று குடிநுழைவுத்துறை தலைமை இயக்குனர் அப்துல் ரஹ்மான் ஒத்மான் கூறியுள்ளார்.

அது சரியாகவே இருக்கலாம். அதே நேரத்தில் இன்னொரு உண்மையையும் அவர் குறிப்பிட்டிருக்கிறார். “தேவை இருக்கிறது அதை நிறைவுசெய்துகொள்கிறார்கள்”, என்றும் கூறியுள்ளார். உண்மை ஐயா, உண்மை.

இது, குடிநுழைவுத்துறையில் எவ்வளவு ஊழல் மலிந்திருக்கிறது என்பதையும் காண்பிக்கிறது. குடிநுழைவுத்துறை சும்மா இருக்கிறது என்றால் முதலாளிகள், குடிநுழைவுத்துறை அதிகாரிகளுக்குக் கொடுக்க வேண்டியதைக் கொடுத்து அவர்களின் கண்ணையும் வாயையும் கட்டி விடுகிறார்கள் என்று நாம் ஊகித்துக்கொள்ளலாமா?

இப்படித்தானே மலேசியாவில் எல்லாமே நடக்கிறது? மலேசியாவின் மொத்த நிர்வாகமும் இந்த அடிப்படையில்தானே சுழல்கிறது?

அப்துல் ரஹ்மானின் எஜமானர், பிரதமர் நஜிப் அப்துல் ரசாக், விசா காலத்தைத் தாண்டி நாட்டில் தங்கிவிட்ட மற்றவர்களைத் தம் கணக்கில் சேர்க்காது விட்டுவிட்ட வேளையில் குடிநுழைவுத்துறை தலைமை இயக்குனர், பாகிஸ்தானியர், வங்காள தேசிகள், சீனர்கள், இலங்கையர், பர்மியர்கள், பூட்டான் நாட்டவர், நேப்பாளிகள், தைவானியர் முதலியோரும் விசா காலத்தைத் தாண்டி நாட்டில் தங்கியிருப்பதாகக் குறிப்பிட்டுள்ளார்.

இது, இங்கு மட்டுமல்ல. அமெரிக்கா, ஆஸ்திரேலியா, நியு சிலாந்து என எல்லா நாடுகளிலும் நடப்பதுதான்.

ஆனால், அரசுக்குத் துதிபாடும் ஊடகங்கள், இங்கு இந்தியர்கள்மீது மட்டும் கவனம் செலுத்தி செய்திகளை வெளியிடுகின்றன. இதில் இனப்பாகுபாடும் கபடத்தனமும் நிறைந்திருப்பது தெரிகிறது. ஏன், மலேசியர்கள், பிரிட்டன் போன்ற நாடுகளில் விசா காலாவதியான பின்னரும் தங்கியிருக்கவில்லையா?

அரசாங்கத்துக்கு விசா காலம் தாண்டியும் தங்கியிருப்போர் பற்றிய ஞானதோதயம் திடீரென்று வந்திருக்கிறது. இப்பிரச்னை பற்றி 2006-இலேயே தெரிந்திருக்கும். தெரிந்திருந்தும் இதுவரை வாளாவிருந்தது, கொள்கைகளைச் செயல்படுத்துவதில் பாரிசான் அரசு திறனற்றிருப்பதைத்தான் காண்பிக்கிறது.

இவ்விவகாரம் பற்றிக் கருத்துரைத்த, மலேசிய முதலாளிகள் சங்கக் கூட்டமைப்பின் செயல்முறை இயக்குனர் சம்சுடின் பரதன், அரசின் கொள்கைகள் அடிக்கடி மாறும். ஆனால், அது பற்றி முதலாளிமாருக்குத் தெரிவிக்கப்படுவதில்லை என்று குறிப்பிட்டுள்ளார்.

இதெல்லாம் அரசின் திறமையையா காட்டுகிறது? இல்லவே இல்லை.

————————————————————————————-
MANJIT BHATIA- ஒரு கல்வியாளர், எழுத்தாளர். ஆஸ்திரேலியாவில் அரசியல், பொருளாதாரம், அவற்றில் உள்ள இடர்பாடுகள் ஆகியவற்றில் ஆலோசனை வழங்கும் ஆசியாரிஸ்க் நிறுவனத்தின் ஆராய்ச்சித்துறை இயக்குனருமாவார். அனைத்துலக பொருளாதாரத்திலும் அரசியலிலும் சிறப்புக் கவனம் செலுத்தி வருகிறார்.